ಇ.ಹೊಸಳ್ಳಿ ಗ್ರಾಮದಲ್ಲಿ ಉದ್ವಿಗ್ನ ವಾತಾವರಣ

ತಾಲೂಕಿನ ಮಾದಿಹಳ್ಳಿ ಹೋಬಳಿಯ ಇ.ಹೊಸಳ್ಳಿ ಗ್ರಾಮದಲ್ಲಿ ಮಾರ್ಚ್ ಮೊದಲ ವಾರದಲ್ಲಿ ದೊಡ್ಡಮ್ಮ(ದೇವಿರಮ್ಮ) ಚಿಕ್ಕಮ್ಮ ಗ್ರಾಮ ದೇವತೆಗಳ ಜಾತ್ರಾ ಮಹೋತ್ಸವ ನಡೆಯುತ್ತಿತ್ತು. ಇದರಲ್ಲಿ ಒಂದು ಸಮುದಾಯ ಕೊಂಡೋತ್ಸವ ಆಚರಿಸಿದರೆ, ಅದೇ ಗ್ರಾಮದ ಮತ್ತೊಂದು ಸಮುದಾಯ ಸಿಡಿ ಉತ್ಸವ ಆಚರಿಸುವುದು ವಾಡಿಕೆ.

ಆದರೆ ಇತ್ತೀಚೆಗೆ ಜಾತ್ರೆ ನಡೆಸುವ ವಿಚಾರವಾಗಿ ಗ್ರಾಮದಲ್ಲಿರುವ ಎರಡು ಸಮುದಾಯಗಳ ನಡುವೆ ಭಿನ್ನಾಭಿಪ್ರಾಯ ಉಂಟಾಗಿ ಮೇ 1 ರಂದು ತಹಸೀಲ್ದಾರ್ ಹಾಗೂ ಪೊಲೀಸ್ ಇಲಾಖೆವರೆಗೂ ದೂರು ಹೋಗಿತ್ತು. ಈ ಸಂದರ್ಭ ಎರಡೂ ಕಡೆಯವರನ್ನೂ ತಾಲೂಕು ಆಡಳಿತದ ಅಧಿಕಾರಿಗಳು ಶಾಂತಿ ಸಭೆ ನಡೆಸಿ ಕೊಂಡೋತ್ಸವ ಹಾಗೂ ದೇಗುಲಕ್ಕೆ ತೆರಳಲು ಅವಕಾಶ ಕಲ್ಪಿಸಲಾಗುವುದು ಎಂದು ಯಾವುದೇ ಗಲಾಟೆ, ಘರ್ಷಣೆಗೂ ಮುಂದಾಗದಂತೆ ತಿಳಿವಳಿಕೆ ಹೇಳಿ ಕಳುಹಿಸಿದ್ದರು. ಇದಕ್ಕೆ ಎರಡೂ ಸಮುದಾಯದವರು ಒಪ್ಪಿ ವಾಪಸ್ ಬಂದಿದ್ದರು.

ಆದರೆ ಭಾನುವಾರ ರಾತ್ರಿ ಒಂದು ಸಮುದಾಯದವರು ತಮ್ಮ ಸಮುದಾಯದ ಜಯಂತಿ ಆಚರಣೆಗೆ ಮುಂದಾಗಿದ್ದರು. ಈ ಸಂದರ್ಭದಲ್ಲಿ ಮತ್ತೊಂದು ಸಮುದಾಯದವರು ಮೆರವಣಿಗೆಯಲ್ಲಿ ಬ್ಯಾಂಡ್‌ಸೆಟ್‌ಗೆ ಕುಣಿಯುತ್ತಿದ್ದರು. ಅಲ್ಲಿ ಎರಡೂ ಸಮುದಾಯದವರು ಒಟ್ಟಿಗೆ ಕುಣಿದಿದ್ದಾರೆ. ನಂತರ ಒಂದು ಸಮುದಾಯದವರು ಬ್ಯಾಂಡ್‌ಸೆಟ್ ತಂದಿರುವುದು ನಾವು, ನೀವು ಕುಣಿಯಬೇಡಿ ಎಂದು ಆಕ್ಷೇಪ ವ್ಯಕ್ತಪಡಿಸಿ ಬ್ಯಾಂಡ್ ನಿಲ್ಲಿಸಿದರು. ಇದರಿಂದ ಅಸಮಾಧಾನಗೊಂಡ ಇನ್ನೊಂದು ಸಮುದಾಯದವರು ಡಾ.ಬಿ.ಆರ್.ಅಂಬೇಡ್ಕರ್ ಭಾವಚಿತ್ರ ಹಿಡಿದು ದೇವಸ್ಥಾನದ ಮುಂದೆ ನಮಗೆ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲು ಅವಕಾಶ ನೀಡದ ಕಾರಣ ಕೊಂಡೋತ್ಸವ ನಡೆಯಲು ಬಿಡುವುದಿಲ್ಲ ಎಂದು ಪಟ್ಟುಹಿಡಿದು ಮೌನ ಪ್ರತಿಭಟನೆ ನಡೆಸಿದರು.

ವಿಷಯ ತಿಳಿಯುತ್ತಿದ್ದಂತೆ ಭಾನುವಾರ ರಾತ್ರಿಯೇ ತಹಸೀಲ್ದಾರ್ ಶ್ರೀಧರ್ ಕಂಕನಾವಾಡಿ ಹಾಗೂ ಡಿವೈಎಸ್ಪಿ ಗೋಪಿ, ಪಿಐ ರೇವಣ್ಣ ಮತ್ತು ಪೊಲೀಸ್ ಸಿಬ್ಬಂದಿ ಗ್ರಾಮಕ್ಕೆ ಭೇಟಿ ನೀಡಿ ಎರಡು ಜನಾಂಗದ ಮುಖಂಡರೊಂದಿಗೆ ಮಾತುಕತೆ ನಡೆಸಿ ಸೌಹಾರ್ದತೆಯಿಂದ ಜಾತ್ರ ಮಹೋತ್ಸವ ಆಚರಿಸುವಂತೆ ತಿಳಿಸಿದರು.

ಇದಕ್ಕೆ ಜನರು ಒಪ್ಪಲಿಲ್ಲ. ಮುನ್ನೆಚ್ಚರಿಕ ಕ್ರಮವಾಗಿ ತಹಸೀಲ್ದಾರ್ ಶ್ರೀಧರ್ ಕಂಕನವಾಡಿಯವರು ಕೊಂಡೋತ್ಸವವನ್ನು ರದ್ದುಗೊಳಿಸಿದ್ದರು. ನಂತರ ತಹಸೀಲ್ದಾರ್ ಮತ್ತು ಡಿವೈಎಸ್ಪಿ ನೇತೃತ್ವದಲ್ಲಿ ಮತ್ತೊಮ್ಮೆ ಗ್ರಾಮಸ್ಥರ ಶಾಂತಿ ಸಭೆ ನಡೆಸಿ, ಉಭಯ ಸಮುದಾಯದವರಿಗೆ ತಿಳಿ ಹೇಳಿ ಸಾಮರಸ್ಯ ಕಾಪಾಡುವಂತೆ ಸೂಚಿಸಿದ್ದರಿಂದ ಇಬ್ಬರೂ ಒಪ್ಪಿದರು.

ಅಧಿಕಾರಿಗಳ ಮನವಿ ಮೇರೆಗೆ ಸೋಮವಾರ ಬೆಳಗ್ಗೆ ಕೊಂಡೋತ್ಸವಕ್ಕೆ ಮಾತ್ರ ಅನುಮತಿ ನೀಡಿದ್ದರಿಂದ ಕೊಂಡೋತ್ಸವ ನೆರವೇರಿದರೆ, ಮತ್ತೊಂದು ಸಮುದಾಯದವರು ದೇವಸ್ಥಾನದ ಒಳಗೆ ಹೋಗಿ ದೇವರಿಗೆ ಪೂಜೆ ಸಲ್ಲಿಸಿ ಮಂಗಳಾರತಿ ಪಡೆದು ಬಂದರು. ಅವರು ಕೊಂಡೋತ್ಸವದಲ್ಲಿ ಭಾಗಿಯಾಗಲಿಲ್ಲ. ಆದರೆ ಸೋಮವಾರ ಸಂಜೆ ಗ್ರಾಮದಲ್ಲಿ ಆಯೋಜಿಸಿದ್ದ ಸಾಂಸ್ಕೃತಿಕ ಹಾಗೂ ವೇದಿಕೆ ಕಾರ್ಯಕ್ರಮವನ್ನು ರದ್ದುಗೊಳಿಸಲಾಗಿತ್ತು.

ಇ.ಹೊಸಳ್ಳಿ ಗ್ರಾಮದಲ್ಲಿ ಸದ್ಯಕ್ಕೆ ಪರಿಸ್ಥಿತಿ ಶಾಂತವಾಗಿದ್ದರೂ ಎರಡೂ ಸಮುದಾಯಗಳಲ್ಲೂ ಅಲ್ಪಮಟ್ಟಿನ ಅಸಮಾಧಾನ ಇನ್ನೂ ಹೊಗೆಯಾಡುತ್ತಿದೆ. ಗ್ರಾಮದಲ್ಲಿ ಮುಂಜಾಗ್ರತಾ ಕ್ರಮವಾಗಿ ಬೇಲೂರು ವೃತ್ತ ನಿರೀಕ್ಷಕ ರೇವಣ್ಣ ನೇತೃತ್ವದಲ್ಲಿ ಪೊಲೀಸ್ ಸಿಬ್ಬಂದಿ ನಿಯೋಜಿಸಲಾಗಿದ್ದು ಗ್ರಾಮದಲ್ಲಿ ಇನ್ನೂ ಬಿಗುವಿನ ವಾತಾವರಣವಿದೆ.