ಅರಸೀಕೆರೆಯಲ್ಲಿ ಬಸವ ಜಯಂತಿ ಆಚರಣೆ

ತಾಲೂಕು ಪಂಚಾಯಿತಿ ಮಾಜಿ ಅಧ್ಯಕ್ಷ ಎಚ್.ಟಿ.ಶಿವಮೂರ್ತಿ ಮಾತನಾಡಿ, ಬಸವಣ್ಣನವರು 12ನೇ ಶತಮಾನದಲ್ಲಿ ತಳ ಸಮುದಾಯಗಳನ್ನು ಜಾತಿ ಸಂಕೋಲೆಯ ಬಂಧನದಿಂದ ವಿಮುಕ್ತಿಗೊಳಿಸಿ ಸಾಮಾಜಿಕ ಸಮಾನತೆ ಮತ್ತು ನ್ಯಾಯಕ್ಕಾಗಿ ಅಂತರ್ಜಾತಿ ವಿವಾಹಕ್ಕೂ ನಾಂದಿ ಹಾಡಿದ್ದರು. ಮಹಾ ಮಾನವತಾವಾದಿ ಬಸವಣ್ಣ ಎಲ್ಲರಿಗೂ ಸಮ ಸಮಾಜ ನಿರ್ಮಾಣದ ಅಗತ್ಯತೆ ತೋರಿಸಿಕೊಟ್ಟ ವಿಶ್ವಗುರುವಾಗಿದ್ದಾರೆ. ರಾಜ್ಯ ಸರ್ಕಾರ ಬಸವಣ್ಣನವರನ್ನು ಸಾಂಸ್ಕೃತಿಕ ರಾಯಭಾರಿ ಎಂದು ಘೋಷಿಸಿ ಗೌರವ ಸಮರ್ಪಿಸಿರುವುದು ಅರ್ಥಪೂರ್ಣವಾಗಿದೆ. ದೀನ ದಲಿತರನ್ನು ಎಲ್ಲರಂತೆ ಬದುಕಲು ಸಮಾಜ ಒಪ್ಪಿಕೊಂಡರೆ ಮಾತ್ರ ಬಸವಣ್ಣನವರ ಆಶಯ ಈಡೇರಿದಂತಾಗಲಿದೆ ಎಂದರು.

ಆಧುನಿಕ ಯುಗದ ಸಾಮಾಜಿಕ ವ್ಯವಸ್ಥೆಯಲ್ಲಿ ಇನ್ನೂ ಜಾತಿ ವ್ಯವಸ್ಥೆ ಜೀವಂತವಾಗಿರುವುದು ವಿಷಾದನೀಯ. ಬುದ್ಧ, ಬಸವ, ಅಂಬೇಡ್ಕರ್ ಈ ಮೂವರು ಮಹನೀಯರ ಆದರ್ಶಗಳು, ಮೌಢ್ಯದ ವಿರುದ್ಧದ ಹೋರಾಟಗಳು ವಿಶ್ವ ಮನ್ನಣೆಗೆ ಸಾಕ್ಷೀಭೂತವಾಗಿವೆ.

ರಾಜ್ಯ ಸರ್ಕಾರ ಮಾದಿಗ ಸಮುದಾಯಕ್ಕೆ ಒಳಮೀಸಲಾತಿ ವರ್ಗೀಕರಣ ಹಾಗೂ ಹೊಸದಾಗಿ ಸರ್ಕಾರಿ ಹುದ್ದೆಗಳ ನೇಮಕಾತಿ ಪ್ರಕ್ರಿಯೆಗೆ ಅವಕಾಶ ಮಾಡಿಕೊಟ್ಟಲ್ಲಿ ಬಸವಣ್ಣನವರ ಆಶಯ ಈಡೇರಿದಂತೆ ಆಗಲಿದೆ ಎಂದರು.

ಮಾದಿಗ ಸಮುದಾಯಕ್ಕೆ ನ್ಯಾಯ ಸಿಗುವವರೆಗೂ ರಾಜ್ಯ ಸರ್ಕಾರದ ವಿರುದ್ಧದ ನಮ್ಮ ಹೋರಾಟ ನಿಲ್ಲುವುದಿಲ್ಲ ಎಂದು ಘೋಷಿಸಿದರು.

ಬಸವೇಶ್ವರ ವೃತ್ತದಲ್ಲಿ ನೂತನವಾಗಿ ಅನಾವರಣಗೊಂಡ ಅಶ್ವಾರೂಢ ಬಸವೇಶ್ವರರ ಪ್ರತಿಮೆಗೆ ಮಾಲಾರ್ಪಣೆ ಮಾಡಿ ಗೌರವ ಸಲ್ಲಿಸಿದರು. ನಾಗವೇದಿ ಕರಿಯಪ್ಪ, ಜಯಕುಮಾರ್, ರುದ್ರೇಶ್, ಗುರುಮೂರ್ತಿ, ಮಹೇಶ್, ಚಂದ್ರಪ್ಪ, ರಂಗನಾಥ, ಮಂಜುನಾಥ್, ನಿಂಗಪ್ಪ, ಶಂಕರಪ್ಪ, ನರಸಿಂಹಮೂರ್ತಿ, ತಾಲೂಕು ಮಾದಿಗ ಸಮುದಾಯದ ಮುಖಂಡರು ಹಾಜರಿದ್ದರು.