ಬಂಜರು ಭೂಮಿಯಲ್ಲಿ ಬಂಗಾರದ ಬೆಳೆ

ತಾಲೂಕಿನ ದಂಡಿಗನಹಳ್ಳಿ ಹೋಬಳಿಯ ಕುಂದೂರು ಗ್ರಾಮದ ನಿವಾಸಿ ನಂಜುಂಡೇಗೌಡರ ಪತ್ನಿ ಶಶಿರೇಖಾ ಕೃಷಿಯಲ್ಲಿ ಬದಲಾವಣೆ ಹೆಜ್ಜೆ ಹಾಕುವ ಮೂಲಕ ಹಲವು ಪ್ರಶಸ್ತಿಗಳನ್ನು ಮುಡಿಗೇರಿಸಿಕೊಂಡಿದ್ದಾರೆ. ಕೈ ಕೆಸರಾದರೆ ಬಾಯಿ ಮೊಸರು ಎಂಬ ನಾಣ್ನುಡಿ ಈ ರೈತ ಮಹಿಳೆಯ ವಿಚಾರದಲ್ಲಿ ಅಕ್ಷರಶಃ ಸತ್ಯವಾಗಿದೆ. ನಂಬಿದವರನ್ನು ಭೂಮಿತಾಯಿ ಕೈ ಬಿಡುವುದಿಲ್ಲ ಎಂಬುದು ಇಲ್ಲಿ ಸಾಬೀತಾಗಿದೆ.

ಮದುವೆಯಾದ ನಂತರ ಪತಿ ನಂಜುಂಡೇಗೌಡರೊಂದಿಗೆ ಕೃಷಿ ಕಾಯಕಕ್ಕೆ ಕೈಜೋಡಿಸಿದ ಶಶಿರೇಖಾ ಅವರು, ಬರಡು ಭೂಮಿಯಲ್ಲಿನ ಕಲ್ಲುಗಳನ್ನು ತೆಗೆದು ಕೃಷಿಗೆ ಮುಂದಾದರು. ಆದರೆ ಜಮೀನಿನಲ್ಲಿನ ಮಣ್ಣು ಸತ್ವ ಕಳೆದುಕೊಂಡಿದೆ ಎಂಬುದು ತಿಳಿದ ಬಳಿಕ ಹೊಲಕ್ಕೆ ಕೆರೆ ಮಣ್ಣು ಹಾಕಿಸಿದರು. ಇದಾದ ಬಳಿಕ ಹಾಸನದ ಕೃಷಿ ವಿಶ್ವವಿದ್ಯಾಲಯ, ಕೃಷಿ, ತೋಟಗಾರಿಕೆ ವಿವಿ ವಿಜ್ಞಾನಿಗಳಿಂದ ಮಾಹಿತಿ ಪಡೆಯಲು ಆರಂಭಿಸಿದರು. ಇದೀಗ ಒಟ್ಟು 5 ಎಕರೆ ಪ್ರದೇಶದಲ್ಲಿ ಬಹು ಬೆಳೆಗಳನ್ನು ಬೆಳೆಯುವ ಮೂಲಕ ಲಾಭ ಗಳಿಸಿದ್ದಾರೆ. ಜಮೀನಿನಲ್ಲಿ ಎರಡು ಕೊಳವೆ ಬಾವಿಯಿದ್ದು, ಅಡಕೆ, ತೆಂಗು, ಬಾಳೆ, ತೇಗ, ಸಿಲ್ವರ್, ಬೇವು, ಸಪೋಟ, ಸೀಬೆ, ಮಾವು, ಶುಂಠಿ, ಕಬ್ಬು, ರಾಗಿ, ಏಲಕ್ಕಿ, ಕಾಳು ಮೆಣಸು, ವೀಳ್ಯದೆಲೆ ತರಕಾರಿಗಳು, ಸೊಪ್ಪು, ಮೇವಿನ ಹುಲ್ಲು ಬೆಳೆಯುತ್ತಾರೆ.

ಇದರೊಂದಿಗೆ ಪಶುಸಂಗೋಪನೆಯಲ್ಲೂ ತೊಡಗಿಸಿಕೊಂಡಿರುವ ಶಶಿರೇಖಾ, ಬಾತುಕೋಳಿ, ನಾಟಿ ಕೋಳಿ, ಕುರಿ, ಮೊಲ, ವಿದೇಶಿ ಹಸುಗಳು, ಎಮ್ಮೆ, ದನ-ಕರುಗಳನ್ನು ಸಾಕುತ್ತಿದ್ದಾರೆ. ಜಮೀನಿನಲ್ಲಿ ಪ್ರಾತ್ಯಕ್ಷಿಕೆ ನೀಡುವ ಮೂಲಕ ಇತರ ರೈತರಿಗೆ ನೆರವಾಗುತ್ತಿದ್ದು, ಜಮೀನಿನಲ್ಲಿ ಕೃಷಿ ಹೊಂಡ ತೆಗೆಸಿ ಮೀನುಗಳನ್ನು ಸಾಕುತ್ತಿದ್ದಾರೆ. ಇನ್ನು ಜಮೀನಿನ ಕೆಲಸಕ್ಕೆ ಅಗತ್ಯವಿದ್ದಾಗ ಮಾತ್ರ ಕೂಲಿಯಾಳುಗಳನ್ನು ಕರೆಯುವ ದಂಪತಿ, ಬಹುತೇಕ ಸಂದರ್ಭಗಳಲ್ಲಿ ತಾವೇ ದುಡಿಮೆ ಮಾಡುತ್ತಾರೆ.

ಮಾರ್ಚ್, ಏಪ್ರಿಲ್‌ನಲ್ಲಿ ತರಕಾರಿಗೆ ಉತ್ತಮ ದರ ದೊರೆಯುವುದರಿಂದ ತರಕಾರಿ ಮತ್ತು ಸೊಪ್ಪನ್ನು ಬೆಳೆದು ಮಾರುಕಟ್ಟೆಗೆ ಸಾಗಿಸಲಾಗುತ್ತದೆ. ಈ ಸಂದರ್ಭದಲ್ಲಿ ಮಧ್ಯವರ್ತಿಗಳಿಗೆ ಅವಕಾಶ ನೀಡದ ಶಶಿರೇಖಾ ದಂಪತಿ ಸ್ವತಃ ತಾವೇ ಮಾರುಕಟ್ಟೆಯಲ್ಲಿ ಮಾರಾಟ ಮಾಡುತ್ತಾರೆ. ಆ ಮೂಲಕ ಲಾಭ ಕಂಡುಕೊಂಡಿದ್ದಾರೆ. ಜತೆಗೆ ಹೈನುಗಾರಿಕೆಯಿಂದಲೂ ಲಾಭ ಕಂಡುಕೊಂಡಿದ್ದಾರೆ. ಮನೆಯವರೆ ಕೆಲಸ ಮಾಡಿದರೆ ಆಳುಗಳಿಗೆ ಸಂಬಳ ಕೊಡಬೇಕಿಲ್ಲ. ಇದರಿಂದ ಸಾಕಷ್ಟು ಹಣ ಉಳಿತಾಯವಾಗಲಿದೆ. ಇದೇ ಕಾರಣಕ್ಕೆ ನಮ್ಮ ಜಮೀನು ಹಸಿರಿನಿಂದ ನಳನಳಿಸುತ್ತಿದೆ ಎನ್ನುತ್ತಾರೆ ಶಶಿರೇಖಾ.

ಕೂಲಿ ಕಾರ್ಮಿಕರನ್ನು ಹೆಚ್ಚಾಗಿ ನೆಚ್ಚಿಕೊಳ್ಳುವುದರಿಂದ ಅನಗತ್ಯ ಖರ್ಚು ಹೆಚ್ಚು. ಇದರಿಂದ ಅತಿ ಸಣ್ಣ ಹಿಡುವಳಿದಾರರು ಕೈಸುಟ್ಟುಕೊಳ್ಳುವ ಪ್ರಮೇಯವೇ ಅಧಿಕ. ಬೇರೆಲ್ಲ ಖರ್ಚನ್ನು ಸರಿದೂಗಿಸಲು ಹೈನುಗಾರಿಕೆಗೆ ಹೆಚ್ಚು ಒತ್ತು ನೀಡುವಂತಾಗಬೇಕು. ಇದರಿಂದ ಶುದ್ಧ ಹಾಲು ಮನೆ ಬಳಕೆಗೆ ದೊರೆಯುವುದರ ಜತೆಗೆ ಮಾರಾಟ ಮಾಡಬಹುದಾಗಿದೆ. ಇದರೊಂದಿಗೆ ಗುಣಮಟ್ಟದ ಗೊಬ್ಬರವೂ ದೊರಕಿದಂತಾಗುತ್ತದೆ. ಇದು ಸಾವಯವ ಕೃಷಿಗೆ ಬಲು ಸಹಕಾರಿ. ಅಲ್ಲದೆ ಎಲ್ಲ ಬೆಳೆಗಳಿಂದ ವರ್ಷಕ್ಕೆ ಸುಮಾರು 5 ಲಕ್ಷ ರೂ.ವರೆಗೆ ಆದಾಯ ಸಿಗುತ್ತಿದೆ. ಸ್ವಂತ ದುಡಿಮೆಯಿಂದ ನಮ್ಮ ಜಮೀನಿನಲ್ಲಿ ಇಷ್ಟೊಂದು ಆದಾಯ ಪಡೆಯುತ್ತಿದ್ದೇನಲ್ಲ ಎಂಬ ತೃಪ್ತಿ ನನಗಿದೆ ಎಂದು ಹೆಮ್ಮೆಯಿಂದ ಹೇಳುತ್ತಾರೆ ಶಶಿರೇಖಾ.

15 ವರ್ಷಗಳಿಂದ ಸಮಗ್ರ ಕೃಷಿಯನ್ನು ಅಳವಡಿಸಿಕೊಂಡಿರುವ ಶಶಿರೇಖಾ, ಸಂಘ-ಸಂಸ್ಥೆಗಳಲ್ಲಿ ಸಕ್ರಿಯವಾಗಿ ತೊಡಗಿಸಿಕೊಳ್ಳುವ ಮೂಲಕ ಅನೇಕ ರೈತರು ಹಾಗೂ ಮಹಿಳೆಯರಿಗೆ ಮಾರ್ಗದರ್ಶಕರಾಗಿದ್ದಾರೆ. ಸಮರ್ಪಕ ನಿರ್ವಹಣೆ ಹಾಗೂ ಸಮಯೋಚಿತ ನಿರ್ಧಾರದಿಂದ ಲಾಭದಾಯಕ ಕೃಷಿಯನ್ನು ಹೇಗೆ ಮಾಡಬಹುದು ಎಂಬುದಕ್ಕೆ ಶಶಿರೇಖಾ ಉದಾಹರಣೆ ಎಂದರೆ ತಪ್ಪಾಗಲಾರದು.