ಮನುಷ್ಯನ ಜ್ಞಾನ ವಿಕಸನಗೊಳಿಸುವ ಪುಸ್ತಕ

ಪಟ್ಟಣದ ಹಿರಿಯ ಲೇಖಕರ ಬಾಗಿವಾಳು ರಾಮಸ್ವಾಮಿ ಸುಬ್ಬರಾಯ(ಬಾರಾಸು) ಅವರ ಮನೆಯಲ್ಲಿ ಭಾನುವಾರ ಪುಸ್ತಕ ಪ್ರಾಧಿಕಾರ ಬೆಂಗಳೂರು ವತಿಯಿಂದ ಆಯೋಜಿಸಿದ್ದ ಮನೆಗೊಂದು ಗ್ರಂಥಾಲಯ ಜಾಗೃತಿ ಅನುಷ್ಠಾನ ಕಾರ್ಯಕ್ರಮವನ್ನು ಬಾರಾಸು ಅವರ ಮನೆಯ ಕಪಾಟಿನಲ್ಲಿದ್ದ ಕೃತಿಗಳನ್ನು ಪ್ರದರ್ಶಿಸುವ ಮೂಲಕ ಉದ್ಘಾಟಿಸಿ ಮಾತನಾಡಿದರು.

ಓದುವ ಸಂಸ್ಕೃತಿ ಹೆಚ್ಚಿದಷ್ಟು ಸಮಾಜದಲ್ಲಿ ಮಾನವೀಯತೆ ಉನ್ನತೀಕರಣಗೊಳ್ಳುತ್ತದೆ. ಪುಸ್ತಕಗಳಿಂದ ಪುಸ್ತಕಗಳು ಹುಟ್ಟಿ ಜ್ಞಾನದ ಬೆಳಕನ್ನು ನೀಡುತ್ತವೆ. ಆದ್ದರಿಂದ ಪ್ರತಿ ಮನೆಯಲ್ಲೂ ದೇವರ ಮನೆ ಇರುವಂತೆ ಪುಸ್ತಕದ ಮನೆಯು ಇರಬೇಕು. ಪುಸ್ತಕಗಳನ್ನೇ ದೇವರೆಂದು ಕಂಡಾಗ ಜ್ಞಾನದ ಬೆಳಕು ಹರಿಯುತ್ತದೆ ಎಂದರು.

ಲೇಖಕ ಬಾರಾಸು ಅವರ ನಮ್ಮೂರ ಜಾತ್ರೆ ಕೃತಿ ಪರಿಚಯ ಮಾಡಿಕೊಟ್ಟ ಬೈಚನಹಳ್ಳಿ ಸರ್ಕಾರಿ ಪಿಯು ಕಾಲೇಜಿನ ಪ್ರಾಂಶುಪಾಲ, ಲೇಖಕ ಡಿ.ಕೆ.ಕುಮಾರಯ್ಯ ಮಾತನಾಡಿ, ಇಂದಿನ ಯುವ ಪೀಳಿಗೆಯಲ್ಲಿ ಓದುವ ಸಂಸ್ಕೃತಿ ಬೆಳೆಸುವುದು ನಾಗರಿಕ ಸಮಾಜದ ಜವಾಬ್ದಾರಿ. ಪುಸ್ತಕವನ್ನು ಓದುತ್ತಿದ್ದರೆ ಮನುಷ್ಯನ ಎಲ್ಲ ಭಾವನೆಗಳು ಆ ಲೇಖನಕ್ಕೆ ಸ್ಪಂದಿಸುತ್ತವೆ. ಮನುಷ್ಯನ ಜ್ಞಾನವನ್ನು ವಿಕಸನಗೊಳಿಸುತ್ತವೆ ಎಂದರು.

ಪುಸ್ತಕ ಪ್ರಾಧಿಕಾರದ ಮನೆಗೊಂದು ಗ್ರಂಥಾಲಯ ಜಾಗೃತಿ ಸಮಿತಿಯ ಜಿಲ್ಲಾ ಸಮಿತಿ ಸದಸ್ಯ ಕಡವಿನಹೊಸಹಳ್ಳಿಯ ಕೆ ಎಂ ನಾಗರಾಜು ಮಾತನಾಡಿ, ಓದುವ ಹವ್ಯಾಸ ಮನುಷ್ಯರ ಮನಸ್ಸು, ಸಂಬಂಧಗಳನ್ನು ಬೆಸೆಯುತ್ತದೆ. ದೇಹವು ಶುದ್ಧೀಕರಣವಾಗಲು ನೀರುಬೇಕು. ಮನಸ್ಸು ಶುದ್ಧೀಕರಣವಾಗಲು ಓದಬೇಕು ಎಂದರು.

ಚುಟುಕು ಸಾಹಿತ್ಯ ಪರಿಷತ್ ಅಧ್ಯಕ್ಷ ಪ್ರೇಮಮಂಜುನಾಥ್ ಮಾತನಾಡಿ, ಪುಸ್ತಕಗಳನ್ನು ಓದುವ ಹವ್ಯಾಸ ಬೆಳೆಸಿಕೊಂಡರೆ ಬರವಣಿಗೆ ರೂಪಗೊಳ್ಳುತ್ತದೆ. ಬರವಣಿಗೆ ಬೆಳೆಯುತ್ತಾ ಹೋದಂತೆ ಜ್ಞಾನದ ಮೆರವಣಿಗೆಯಾಗುತ್ತದೆ. ಮನೆ ಮನೆಗಳಲ್ಲೂ ಪುಸ್ತಕ ಓದಿಗೆ ಪ್ರಾಮುಖ್ಯತೆ ನೀಡುವಂತಾಗಬೇಕು ಎಂದು ಆಶಿಸಿದರು

ಜಾಗೃತಿ ಸಮಿತಿಯ ಜಿಲ್ಲಾ ಸಂಚಾಲಕ ಹಾಗೂ ಹಿರಿಯ ಲೇಖಕ ಗೊರೂರು ಅನಂತರಾಜು ಮಾತನಾಡಿ, ಸಾಹಿತ್ಯದಿಂದ ಮಾತ್ರ ಸಮಾಜದ ಸುಧಾರಣೆ ಸಾಧ್ಯ. ಒಂದು ಗ್ರಾಮದಿಂದ ಹಿಡಿದು ತಾಲೂಕು ಜಿಲ್ಲೆ, ರಾಜ್ಯ ಹಾಗೂ ದೇಶಗಳಿಗೂ ತನ್ನದೇ ಆದ ಚರಿತ್ರೆ ಇರುತ್ತದೆ. ಈ ಇತಿಹಾಸವನ್ನು ಮುಂದಿನ ಪೀಳಿಗೆಗೆ ಪರಿಚಯಿಸಲು ಸಾಹಿತ್ಯದ ಅಗತ್ಯವಿದೆ. ಸಾಹಿತ್ಯವಿಲ್ಲದ ಸಮಾಜ ಇರಲು ಸಾಧ್ಯವೇ ಇಲ್ಲ. ಆದ್ದರಿಂದ ಮನೆಮನೆಗಳಲ್ಲೂ ಒಂದು ಗ್ರಂಥಾಲಯ ಸೃಷ್ಟಿಸಬೇಕೆಂಬ ಮಹಾದಾಸೆಯಿಂದ ಪುಸ್ತಕ ಪ್ರಾಧಿಕಾರ ಈ ಯೋಜನೆ ಅನುಷ್ಠಾನಗೊಳಿಸುತ್ತಿದೆ. ಈ ತಾಲೂಕಿನಲ್ಲಿ ಇನ್ನು ಅಲವೆಡೆ ಈ ಕಾರ್ಯಕ್ರಮಗಳನ್ನು ಅನುಷ್ಠಾನವಾಗಬೇಕು ಎಂದರು.

ಲೇಖಕ ಬಾರಾಸು ಮಾತನಾಡಿ, ನವಂಬರ್‌ನಲ್ಲಿ ನಮ್ಮ ಮತ್ತೊಂದು ಕಾದಂಬರಿ ಬಿಡುಗಡೆಯಾಗುತ್ತಿದೆ. ಓದುಗರಿಲ್ಲದೆ ನಾವಿಲ್ಲ. ಎಲ್ಲರನ್ನೂ ಓದುವ ಹವ್ಯಾಸಕ್ಕೆ ಮರಳಿಸಬೇಕೆಂಬುದು ನಮ್ಮ ಗುರಿ ಎಂದರು.

ಮನೆಗೊಂದು ಗ್ರಂಥಾಲಯ ಜಾಗೃತಿ ಸಮಿತಿಯ ಕರಪತ್ರ ಪ್ರದರ್ಶಿಸಲಾಯಿತು. ಲೇಖಕರಾದ ಬಾರಸು ದಂಪತಿಯನ್ನು ಪುಸ್ತಕ ಪ್ರಾಧಿಕಾರದಿಂದ ಅಭಿನಂದಿಸಲಾಯಿತು . ಪ್ರಾಧಿಕಾರದ ಸದಸ್ಯರಾದ ಡಾ. ಕುಶಲ್ ಬರಗೂರು ಅವರನ್ನು ಲೇಖಕರು ಸನ್ಮಾನಿಸಿದರು ಹಿರಿಯ ಲೇಖಕ ಕುಮಾರ್ ಚಲವಾದಿ, ವಾಸವಾಂಬ ಬ್ಯಾಂಕ್ ಮಾಜಿ ಅಧ್ಯಕ್ಷ ರವಿಕುಮಾರ್, ಪತಂಜಲಿ ವಾಸುದೇವಮೂರ್ತಿ, ಪತ್ರಕರ್ತರಾದ ಎಚ್.ಬಿ.ವೆಂಕಟೇಶ್, ಪತ್ರಕರ್ತ ವಿಶ್ವನಾಥ್ ನರಸಿಂಹಮೂರ್ತಿ, ಮಹಮದ್ ನಾಸಿರ್, ಸ್ವರೂಪ್ ಇತರರು ಇದ್ದರು.