ನಿಲ್ಲದ ಗಜಗಳ ಗ್ರಾಮ ಸಂಚಾರ!

ತಾಲೂಕಿನ ಬಿಕ್ಕೋಡು-ಅರೇಹಳ್ಳಿ ಹೋಬಳಿಯ ವಿವಿಧ ಗ್ರಾಮಗಳಲ್ಲಿ ಐದಾರು ವರ್ಷಗಳಿಂದೀಚೆಗೆ ಸತತವಾಗಿ ಕಾಡಾನೆಗಳ ಉಪಟಳದಿಂದ ಮಲೆನಾಡು ಭಾಗದ ಜನರು ತತ್ತರಿಸಿ ಹೋಗಿದ್ದಾರೆ. ಬೇಲೂರು ತಾಲೂಕಿನಲ್ಲೇ ಸಾಕಷ್ಟು ಜೀವಗಳು ಕಾಡಾನೆಗಳ ದಾಳಿಗೆ ಸಿಲುಕಿ ಬಲಿಯಾಗಿವೆ. ಮತ್ತಷ್ಟು ಜನರು ಗಂಭೀರವಾಗಿ ಗಾಯಗೊಂಡು ಚಿಕಿತ್ಸೆ ಪಡೆದು ಗುಣಮುಖರಾಗಿದ್ದಾರೆ.

ತಾಲೂಕಿನ ಬಿಕ್ಕೋಡು ಸಮೀಪದ ಜಗಬೋರನಹಳ್ಳಿ ಅರಣ್ಯ ಪ್ರದೇಶದಲ್ಲಿ ಬೀಡು ಬಿಡುತ್ತಿದ್ದ ಕಾಡಾನೆಗಳು ಸಂಜೆಯಾಗುತ್ತಿದ್ದಂತೆಯೇ ಅಕ್ಕಪಕ್ಕದ ಗ್ರಾಮಗಳ ಜಮೀನುಗಳತ್ತ ನುಗ್ಗಿ ಬೆಳೆನಾಶಪಡಿಸುತ್ತಿದ್ದವು. 20ಕ್ಕೂ ಹೆಚ್ಚು ಕಾಡಾನೆಗಳು ಕಳೆದ ಕೆಲ ತಿಂಗಳಿಂದ ಬಿಕ್ಕೋಡು ಸಮೀಪದ ಚಿಕ್ಕಬಿಕ್ಕೋಡು, ಮತ್ತಾವರ, ನಿಡುಮನಹಳ್ಳಿ, ಜಗಬೋರನಹಳ್ಳಿ, ಕೋಗಿಲಮನೆ, ಬೊಮ್ಮಡಿಹಳ್ಳಿ, ಕುಶಾವರ, ಮೊಗಸಾವರ, ಚೌಡನಹಳ್ಳಿ ಹಾಗೂ ಕಸಬಾ ಹೋಬಳಿಯ ಕೊತ್ತನಹಳ್ಳಿ, ಹಿರಿಕೊಲೆ, ಚಿಕ್ಕೋಲೆ, ತಗರೆ ಗ್ರಾಮಗಳ ಜಮೀನುಗಳಿಗೆ ದಾಳಿ ಇಟ್ಟು ನೂರಾರು ಎಕರೆಯಲ್ಲಿ ಹುಲುಸಾಗಿ ಬೆಳೆದಿದ್ದ ಜೋಳ, ಭತ್ತ, ರಾಗಿ ಬೆಳೆ ತಿಂದು ನಾಶಪಡಿಸಿವೆ.

ಬೇಲೂರು ತಾಲೂಕಿನಲ್ಲಿ 80ಕ್ಕೂ ಹೆಚ್ಚು ಕಾಡಾನೆಗಳ ಹಿಂಡು ಸೋಮವಾರ ಮೊಗಸಾವರ, ಹಿರೆಹಸಡೆ, ಐಬಿಸಿ ಎಸ್ಟೇಟ್, ದೊಡ್ಡಸಾಲಾವರ, ಉಂಬಳಗೋಡು, ಕಸರಳ್ಳಿ, ಬೆಂಡೇಕಾಡು, ಹಂಜಿಹಳ್ಳಿ, ದಬ್ಬೆಗಡಿ ಭಾಗದ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಬೀಡು ಬಿಟ್ಟಿರುವುದು ಈ ಭಾಗದ ಗ್ರಾಮಗಳ ಜನರಲ್ಲಿ ಆತಂಕಕ್ಕೆ ಕಾರಣವಾಗುತ್ತಿದೆ.

ಆದರೆ ಇವುಗಳಲ್ಲಿ ಸಾಕಷ್ಟು ಆನೆಗಳನ್ನು ಅರಣ್ಯ ಇಲಾಖೆ ಸಿಬ್ಬಂದಿ ಕಾಡಿಗಟ್ಟುವಲ್ಲಿ ಯಶಸ್ವಿಯಾಗಿದ್ದರೂ ಇನ್ನೂ ಬಿಕ್ಕೋಡು ಮತ್ತು ಅರೇಹಳ್ಳಿ ಹೋಬಳಿಯ ಅರಣ್ಯ ಸೇರಿದಂತೆ ವಿವಿಧ ಗ್ರಾಮಗಳಲ್ಲಿ ಕಾಡಾನೆಗಳಿವೆ. ಗುಂಪಿನಿಂದ ಬೇರಾದ ಒಂದೆರಡು ಕಾಡಾನೆಗಳು ತೋಟ, ಜಮೀನು, ಮನೆಗಳ ಪಕ್ಕದಲ್ಲೇ ಹೋಗುತ್ತಿರುವುದು ಜನರಲ್ಲಿ ಆತಂಕಕ್ಕೆ ಕಾರಣವಾಗುತ್ತಿದೆ. ಜತೆಗೆ ಭಾನುವಾರ ಸಂಜೆ ಅರೇಹಳ್ಳಿ ಹೋಬಳಿಯ ವಿವಿಧ ಗ್ರಾಮಗಳ ಆಸುಪಾಸಿನಲ್ಲಿ 20 ರಿಂದ 22ಕ್ಕೂ ಹೆಚ್ಚು ಕಾಡಾನೆಗಳು ಐಬಿಸಿ ಎಸ್ಟೇಟ್ ಮೂಲಕ ಬೇಡಿ ಅವರ ತೋಟಕ್ಕೆ ಬಂದು ನಂತರ ಕೋಗೋಡು ಗ್ರಾಮದ ಸಂತೋಷ್ ಅವರ ತೋಟಕ್ಕೆ ನುಗ್ಗಿ ಅಲ್ಲಿಯೂ ಬೆಳೆ ನಾಶಪಡಿಸಿ, ಸಮೀಪದ ಅರಮನೆ ಗುಡ್ಡಕ್ಕೆ ಪ್ರವೇಶಿಸಿ ಬೀಡು ಬಿಟ್ಟಿದ್ದವು. ನಂತರದಲ್ಲಿ ಅಲ್ಲಿಂದ ಕೋಗೋಡು ಗ್ರಾಮದ ಮತ್ತೊಂದು ತೋಟದಲ್ಲಿ ಕಾಣಿಸಿಕೊಂಡಿದ್ದವು.

ಆದರೆ ಅಲ್ಲಿ ಜನರು ಪಟಾಕಿ ಸಿಡಿಸಿ ಆನೆಗಳನ್ನು ಓಡಿಸಿದ್ದರಿಂದ ಪುನಾ ಬೇಡಿ ಅವರ ತೋಟಕ್ಕೆ ತೆರಳಿ ಅಲ್ಲಿಂದ ಐಬಿಸಿ ತೋಟದಲ್ಲಿ ಹಿಂಡು ಸೋಮವಾರ ಬೀಡು ಬಿಟ್ಟಿವೆ. ಆದರೆ ಅರಣ್ಯ ಇಲಾಖೆ ಅಧಿಕಾರಿಗಳು ಕಾಡಾನೆಗಳ ಚಲನವಲನ ಗಮನಿಸುತ್ತಿದ್ದರೂ ತೋಟಗಳಿಂದ ದೂರದ ಕಾಡಿಗಟ್ಟುವಲ್ಲಿ ವಿಫಲರಾಗುತಿದ್ದಾರೆ ಎಂಬ ಮಾತುಗಳು ಕೇಳಿ ಬರುತ್ತಿವೆ. ಒಟ್ಟಾರೆಯಾಗಿ ದಿನದಿಂದ ದಿನಕ್ಕೆ ಮಾನವ-ಪ್ರಾಣಿ ಸಂಘರ್ಷ ತಾರಕಕ್ಕೇರುತ್ತಲೆ ಇದೆ.

ಜತೆಗೆ ಈ ಕಾಡಾನೆಗಳ ಉಪಟಳದಿಂದ ರೈತರು, ಬೆಳೆಗಾರರು, ಕಾರ್ಮಿಕರರನ್ನು ಮುಕ್ತರನ್ನಾಗಿಸಬೇಕೆಂದು ಸರ್ಕಾರ ಮತ್ತು ಅರಣ್ಯ ಇಲಾಖೆ ಅಧಿಕಾರಿಗಳನ್ನು ಬಿಕ್ಕೋಡು-ಅರೇಹಳ್ಳಿ ಹೋಬಳಿಗಳ ರೈತರು, ಬೆಳೆಗಾರರು ಮತ್ತು ಕಾರ್ಮಿಕರು, ವಿವಿಧ ಗ್ರಾಮಗಳ ಗ್ರಾಮಸ್ಥರು ಆಗ್ರಹಿಸಿದ್ದಾರೆ. ಇನ್ನಾದರೂ ಸಂಬಂಧಿಸಿದವರು ಎಚ್ಚೆತ್ತು ಬೆಳೆ ನಷ್ಟ ಹಾಗೂ ಮಾನವ-ಪ್ರಾಣಿ ಸಂಘರ್ಷಕ್ಕೆ ಇತಿಶ್ರೀ ಹಾಡುವರೇ ಎಂದು ಕಾದು ನೋಡಬೇಕಿದೆ.

ಬೇಲೂರು ತಾಲೂಕಿನಲ್ಲಿ 3 ವರ್ಷಗಳ ಹಿಂದೆ ಬೆರಳೆಣಿಕೆಯಷ್ಟಿದ್ದ ಕಾಡಾನೆಗಳು ಇತ್ತೀಚೆಗೆ ಲೆಕ್ಕ ಹಾಕಲು ಸಿಗದಷ್ಟು ಹೆಚ್ಚಾಗಿವೆ. ಎಲ್ಲಿ ನೋಡಿದರೂ ತೋಟ ಮತ್ತು ಕಾಡೇ ಕಾಣಿಸುವುದರಿಂದ ಆನೆಗಳು ಸಹ ತಮ್ಮ ವಂಶಾಭಿವೃದ್ಧಿ ಹೆಚ್ಚಿಸಿಕೊಳ್ಳುತ್ತಿರುವ ಕಾರಣ ದಿನದಿಂದ ದಿನಕ್ಕೆ ಆನೆಗಳ ಸಂಖ್ಯೆಯಲ್ಲಿ ಹೆಚ್ಚಳವಾಗುತ್ತಿದ್ದು, ನಿತ್ಯ ಕಾಡಾನೆಗಳ ದಾಂಧಲೆಗೆ ರೈತರು ಕಣ್ಣೀರು ಹಾಕುವಂತಾಗಿದ್ದು, ಸರ್ಕಾರ ಹಾಗೂ ಅರಣ್ಯ ಇಲಾಖೆ ಅಧಿಕಾರಿಗಳ ವಿರುದ್ಧ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.

ಭೀಮ ಹೆಸರಿನ ಒಂಟಿ ಕಾಡಾನೆ ಹಗಲು-ರಾತ್ರಿ ಎನ್ನದೆ ಆಹಾರ ಅರಸಿ ತಾಲೂಕಿನ ವಿವಿಧ ಗ್ರಾಮಗಳ ಆಸು ಪಾಸು, ಜನ ವಸತಿ ಪ್ರದೇಶಗಳ ಮುಂಭಾಗದಲ್ಲೇ ಹೆಚ್ಚಾಗಿ ಕಾಣಿಸಿಕೊಂಡು ಓಡಾಡುತ್ತಿದ್ದರೂ ಜನರಿಗೆ ತೊಂದರೆ ಕೊಡದ ಕಾರಣ ಈ ಭೀಮ ಆನೆ ಬಗ್ಗೆ ಯಾರೂ ಅಷ್ಟಾಗಿ ಹೆಚ್ಚು ತಲೆಕೆಡಿಸಿಕೊಂಡಿರಲಿಲ್ಲ. ಆದರೆ ಕಳೆದ ತಿಂಗಳು ಮದವೇರಿದ್ದ ಭೀಮ ಆನೆ ಕ್ಯಾಪ್ಟನ್ ಆನೆಯೊಂದಿಗಿನ ಕಾದಾಟದಲ್ಲಿ ತನ್ನ ಎಡಭಾಗದ ದಂತ ಕಳೆದುಕೊಂಡಿದ್ದರಿಂದ ಅದು ಹೆಚ್ಚಾಗಿ ಬೇಲೂರು-ಸಕಲೇಶಪುರ ಗಡಿ ಭಾಗದಲ್ಲಿ ಹೆಚ್ಚಾಗಿ ಕಾಣಿಸಿಕೊಳ್ಳುತ್ತಿರುವುದರಿಂದ ಜನರು ನಿಟ್ಟುಸಿರು ಬಿಡುವಂತಾಗಿದೆ.