‘ಜಮೀನು ದುರಸ್’್ತ 25 ಸಾವಿರ ಅರ್ಜಿ ಬಾಕಿ

ಸಚಿವರು ಕೆಲ ಸಮಸ್ಯೆಗಳಿಗೆ ಸ್ಥಳದಲ್ಲೆ ಪರಿಹಾರ ನೀಡಿದರೆ, ಮತ್ತೆ ಕೆಲವೊಂದನ್ನು ಪರಿಶೀಲಿಸಿ ಕ್ರಮ ಕೈಗೊಳ್ಳುವಂತೆ ಸಂಬಂಧಿಸಿದ ಅಧಿಕಾರಿಗಳಿಗೆ ಸೂಚಿಸಿದರು.

ತಾಲೂಕು ಕಚೇರಿ ಆವರಣದಲ್ಲಿ ಕಂದಾಯ ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವ ಕೃಷ್ಣ ಬೈರೇಗೌಡರ ಅಧ್ಯಕ್ಷತೆಯಲ್ಲಿ ಕರೆಯಲಾಗಿದ್ದ ಜನಸ್ಪಂದನ ಕಾರ್ಯಕ್ರಮದಲ್ಲಿ 1450ಕ್ಕೂ ಹೆಚ್ಚು ಜನರು ಸಮಸ್ಯೆಗಳ ಪರಿಹಾರಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. ಕೃಷಿ ಮತ್ತು ತೋಟಗಾರಿಕಾ ಇಲಾಖೆಯಿಂದ ಸ್ಟಾಲ್‌ಗಳನ್ನು ನಿರ್ಮಿಸಿ ರೈತರಿಗೆ ಅಗತ್ಯ ಮಾಹಿತಿ ಒದಗಿಸಿದರೆ, ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಯಿಂದ ಪೌಷ್ಟಿಕ ಆಹಾರಗಳ ಪ್ರದರ್ಶನವಿತ್ತು. ಆರೋಗ್ಯ ಇಲಾಖೆಯಿಂದ ಕಾರ್ಯಕ್ರಮಕ್ಕೆ ಆಗಮಿಸಿದವರ ಆರೋಗ್ಯ ತಪಾಸಣೆ ನಡೆಸಿದರು.

ಜಿಲ್ಲಾ ಉಸ್ತುವಾರಿ ಸಚಿವ ಕೃಷ್ಣ ಬೈರೇಗೌಡ ಮಾತನಾಡಿ, ಸಾರ್ವಜನಿಕರು, ಸಚಿವರು, ಜಿಲ್ಲಾಡಳಿತದ ಮುಂದೆ ತಮ್ಮ ಸಮಸ್ಯೆಗಳನ್ನು ನೇರವಾಗಿ ಹೇಳಿಕೊಳ್ಳಲು ಇಂತಹ ಜನಸ್ಪಂದನ ಕಾರ್ಯಕ್ರಮವನ್ನು ಮೂರು ತಿಂಗಳಿಗೊಮ್ಮೆ ತಾಲೂಕು ಕೇಂದ್ರ ಮತ್ತು ಜಿಲ್ಲಾ ಮಟ್ಟದ ಕಾರ್ಯಕ್ರಮ ಆಯೋಜಿಸಲಾಗುತ್ತದೆ. ಅಲ್ಲದೆ ರಾಜ್ಯ ಸರ್ಕಾರ ಜನರ ಮನೆ ಬಾಗಿಲಿಗೆ ಹೋಗಿ ಅವರ ಸಮಸ್ಯೆ ಅರ್ಥ ಮಾಡಿಕೊಳ್ಳುವ ಪ್ರಯತ್ನ ಮಾಡುತ್ತಿದೆ. ಇದರಿಂದ ಜನರು ಮಧ್ಯವರ್ತಿಗಳ, ಪುಡಾರಿಗಳ ಮಧ್ಯಸ್ಥಿಕೆ ಇಲ್ಲದೆ ನೇರವಾಗಿ ತಮ್ಮ ಸಮಸ್ಯೆಗಳನ್ನು ಹೇಳಿಕೊಳ್ಳಬಹುದು. ಈಗಾಗಲೇ ಜಿಲ್ಲಾ ಕೇಂದ್ರ ಹಾಸನ, ಚನ್ನರಾಯಪಟ್ಟಣ ಹಾಗೂ ಸಕಲೇಶಪುರದಲ್ಲಿ ಜನಸ್ಪಂದನ ಕಾರ್ಯಕ್ರಮ ನಡೆಸಿದಾಗ ಒಟ್ಟು 2,893 ಅರ್ಜಿಗಳು ಬಂದಿದ್ದು, ಅದರಲ್ಲಿ 2837 ವಿಲೇವಾರಿ ಆಗಿದೆ. ಮನೆ ಕಟ್ಟಿಕೊಂಡವರು ಸೂಕ್ತ ದಾಖಲಾತಿ ಹಕ್ಕುಪತ್ರ ಇಲ್ಲದೆ ಇರುವ 700ಕ್ಕೂ ಹೆಚ್ಚು ವಸತಿ ಪ್ರದೇಶ ಗುರ್ತಿಸಿದ್ದು 29,000 ಕುಟುಂಬಗಳಿಗೆ ಹಕ್ಕು ಪತ್ರ ವಿತರಿಸಲು ಪೂರ್ವ ತಯಾರಿ ಮಾಡಲಾಗಿದೆ. ಅಲ್ಲದೆ ಇಲ್ಲೆ ಜನರ ಎಲ್ಲ ಸಮಸ್ಯೆಗಳನ್ನೂ ಬಗೆಹರಿಸಲು ಸಾಧ್ಯವಿಲ್ಲ. ಆದರೆ ಬಗೆಹರಿಸಲು ಯಾವುದಕ್ಕೆ ಸಾಧ್ಯತೆ ಇದೆಯೋ ಅದನ್ನು ಬಗೆಹರಿಸಲಾಗುವುದು ಎಂದರು.

ಜನರ ನೂರಾರು ಸಮಸ್ಯೆಗಳು ಇರುತ್ತವೆ. ಅದರಲ್ಲಿ ಎಷ್ಟು ಸಾಧ್ಯವೋ ಅಷ್ಟನ್ನು ಸರಿ ಮಾಡುವ ಕೆಲಸ ಆಗಬೇಕು. ಎಲ್ಲ ದಾಖಲೆಗಳನ್ನು ಪರಿಹಾರ ಮಾಡಲಿಕ್ಕೆ ಆಗುವುದಿಲ್ಲ. ಕಾನೂನು ಚೌಕಟ್ಟಿನಲ್ಲಿ ನ್ಯಾಯಯುತವಾಗಿ ಸಮಸ್ಯೆ ಬಗೆಹರಿಸಬಹುದು. ಕಂದಾಯ ಇಲಾಖೆಯಲ್ಲಿ ಅತಿ ಹೆಚ್ಚು ದುರಸ್ತ್ ಮತ್ತು ತಾತ್ಕಾಲಿಕ ಪೋಡಿಗೆ ಒತ್ತಡ ಇದೆ. ಐದು ವರ್ಷಗಳ ಹಿಂದೆ 300 ರಷ್ಟು ಮಾತ್ರ ದುರಸ್ತ್ ನಡೆದಿದ್ದವು, ಆದರೆ ಇಂದು ಸುಮಾರು 20 ಸಾವಿರ ಅರ್ಜಿಗಳ ದುರಸ್ತ್ ಕಾರ್ಯಗಳು ಈಗಾಗಲೇ ನಡೆದಿದೆ. ಇನ್ನೂ 25 ಸಾವಿರಕ್ಕೂ ಅಧಿಕ ದುರಸ್ತ್ ಮಾಡಬೇಕಾಗಿದೆ. ಸದ್ಯದಲ್ಲೇ ಈ ದುರಸ್ತಿ ಕಾರ್ಯಗಳನ್ನು ನೆರವೇರಿಸಲಾಗುವುದು ಎಂದರು.

ಶಾಸಕ ಎಚ್.ಕೆ.ಸುರೇಶ್ ಮಾತನಾಡಿ, ಬೇಲೂರು ತಾಲೂಕು ಮಲೆನಾಡು-ಅರೆಮಲೆನಾಡು ಬಯಲು ಸೀಮೆ ಪ್ರದೇಶಗಳನ್ನು ಹೊಂದಿದ್ದು, ಸಮಸ್ಯೆಗಳ ಸರ ಮಾಲೆಯೇ ಇದೆ. ಎಲ್ಲ ಇಲಾಖೆಗಳಲ್ಲಿ ಕಂದಾಯ ಇಲಾಖೆ ತಾಯಿ ಸ್ಥಾನದಲ್ಲಿದೆ. ಇಲ್ಲಿಯ ಸಮಸ್ಯೆಗಳನ್ನು ಸಚಿವರು ಆದಷ್ಟು ಬೇಗ ಬಗೆಹರಿಸುವ ನಂಬಿಕೆ ಇದೆ. ಈ ಹಿಂದೆ ಜಿಲ್ಲಾ ಉಸ್ತುವಾರಿ ಸಚಿವರನ್ನು ಕರೆ ತರುವುದಾಗಿ ಭರವಸೆ ನೀಡಿದ್ದೆ. ಅದರಂತೆ ತಮ್ಮ ಮಾತನ್ನು ಉಳಿಸಿಕೊಂಡಿದ್ದೇನೆ ಎಂದರು.

ಈ ಸಂದರ್ಭದಲ್ಲಿ ಸಾವಿರಾರು ಜನರು ತಮ್ಮ ಸಮಸ್ಯೆಗಳ ಅರ್ಜಿಗಳನ್ನು ಸರದಿ ಸಾಲಿನಲ್ಲಿ ನಿಂತು ಸಚಿವರಿಗೆ ಸಲ್ಲಿಸಿದರು. ಸಂಸದ ಶ್ರೇಯಸ್.ಎಂ.ಪಟೇಲ್, ಜಿಲ್ಲಾಧಿಕಾರಿ ಲತಾ ಕುಮಾರಿ, ಪೊಲೀಸ್ ವರಿಷ್ಠಾಧಿಕಾರಿ ಶುಭನ್ವಿತಾ, ಉಪ ಅರಣ್ಯ ಸಂರಕ್ಷಣಧಿಕಾರಿ ಸೌರವ್ ಕುಮಾರ್, ಪುರಸಭೆ ಪ್ರಭಾರ ಅಧ್ಯಕ್ಷೆ ಉಷಾ ಸತೀಶ್, ಬೇಲೂರು-ಹಲೇಬೀಡು ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ತೌಫಿಕ್, ತಹಸಿಲ್ದಾರ್ ಶ್ರೀಧರ್ ಕಂಕನವಾಡಿ ಸೇರಿದಂತೆ ಇತರರಿದ್ದರು.

ಗುತ್ತಿಗೆದಾರರು ಕೆಲ ವರ್ಷಗಳಿಂದ ಕಾರ್ಮಿಕರ ಪಿಎಫ್ ಹಣ ಕಟ್ಟುತ್ತಿಲ್ಲ ಎಂದು ಪುರಸಭೆ ನೀರು ಸರಬರಾಜು ವಿಭಾಗದ ನೌಕರರು ಸಚಿವರಿಗೆ ಮನವಿ ಸಲ್ಲಿಸಿದ ಸಂದರ್ಭ ಪುರಸಭೆ ಮತ್ತು ಕಾರ್ಮಿಕ ಇಲಾಖೆ ಅಧಿಕಾರಿಗಳನ್ನು ಕರೆದು ಗುತ್ತಿಗೆದಾರ ಪಿಎಫ್ ಹಣ್ಣ ಕಟ್ಟುತ್ತಿಲ್ಲವೆಂದರೆ ಅದನ್ನು ಅಧಿಕಾರಿಗಳಾಗಿ ನೀವು ಗಮನಿಸಬೇಕು. ಅದನ್ನು ಬಿಟ್ಟು ನೀವು ಏನು ಮಾಡುತಿದ್ದೀರಿ. ತಕ್ಷಣವೇ ಕ್ರಮ ಕೈಗೊಂಡು ಕಾರ್ಮಿಕರ ಪಿಎಫ್ ಹಣ ಕಟ್ಟಿಸಿ ಎಂದು ಕೃಷ್ಣ ಬೈರೇಗೌಡ ಅಧಿಕಾರಿಗಳನ್ನು ತರಾಟೆ ತೆಗೆದುಕೊಂಡರು.

ವಿದ್ಯುತ್ ಕಂಬ ಶಿಫ್ಟ್ ಮಾಡಬೇಕೆಂದರೆ ನೀವಾದರು ಸರಿ ನಾನಾದರು ಸರಿ ಇಲಾಖೆಗೆ ಹಣ ಕಟ್ಟಬೇಕು. ಈ ಬಗ್ಗೆ ಗಮನ ಹರಿಸಿ ಸೆಸ್ಕ್ ಅಧಿಕಾರಿಗಳು ಕೆಲಸ ಮಾಡಿಸಿಕೊಡಿ. ಸರ್ಕಾರಿ ಜಾಗವನ್ನು ಇಬ್ಬರೂ ಒತ್ತುವರಿ ಮಾಡಿಕೊಂಡಿರುವವರ ವಿರುದ್ಧ ಪ್ರಕರಣ ದಾಖಲಿಸಿ ಜಾಗವನ್ನು ವಶಕ್ಕೆ ಪಡೆಯಿರಿ ಎಂದು ತಹಸೀಲ್ದಾರ್‌ಗೆ ಸೂಚಿಸಿದರು. ತಾಲೂಕಿನ ಅರೇಹಳ್ಳಿಯಿಂದ-ಗೆಂಡೇಹಳ್ಳಿಗೆ ವಿದ್ಯುತ್ ಸಂಪರ್ಕ ಕಲ್ಪಿಸುವ ಕಾಮಗಾರಿಗೆ ಗುತ್ತಿಗೆದಾರ ಜಮೀನಿನವರಿಗೆ ಪರಿಹಾರ ಕೊಡದೆ ಲೈನ್ ಹೇಗೆ ಎಳೆಯುತ್ತಾನೆ. ಜಮೀನು ಮಾಲೀಕರಿಗೆ ಮೊದಲು ಪರಿಹಾರ ಕೊಟ್ಟ ನಂತರ ಗುತ್ತಿಗೆದಾರ ಕೆಲಸ ಮಾಡಲಿ. ಅದನ್ನು ಬಿಟ್ಟು ಜನರಿಗೆ ರಕ್ಷಣೆ ಕೊಡಬೇಕಾದ ಪೊಲೀಸರು ಗುತ್ತಿಗೆದಾರನಿಗೆ ಹೇಗೆ ರಕ್ಷಣೆ ಕೊಡುತ್ತೀರ ಎಂದು ತರಾಟೆ ತೆಗೆದುಕೊಂಡರು.

ಕಾರ್ಯಕ್ರಮದಲ್ಲಿ ಪ್ರಮುಖವಾಗಿ ಕಂದಾಯ, ಪುರಸಭೆ, ಗ್ರಾಮ ಪಂಚಾಯಿತಿ, ಕಾಡಾನೆಗಳ ಸಮಸ್ಯೆ, ಸರ್ಕಾರಿ ಪಸವಿ ಪೂರ್ವ ಕಾಲೇಜು ಮೈದಾನ ಸರಕ್ಷಣೆ, ಜಮೀನು ಒತ್ತುವರಿ, ಜಮೀನು ದುರಸ್ತ್, ಅಂಬೇಡ್ಕರ್ ಭವನ ಒತ್ತುವರಿ ತೆರವು, ಕನ್ಸರ್‌ವೆನ್ಸಿ ರಸ್ತೆ, ಅಕ್ರಮ ಖಾತೆ ಸೇರಿದಂತೆ ಇನ್ನಿತರ ಸಮಸ್ಯೆಗಳ ಸಂಬಂಧ ಸಾವಿರಾರು ಅರ್ಜಿಗಳು ಸಲ್ಲಿಕೆಯಾದವು.

ಕೇಂದ್ರ ಸರ್ಕಾರ ಜವಾಬ್ದಾರಿ ತೆಗೆದುಕೊಳ್ಳಲಿ

ರಾಜ್ಯದಲ್ಲಿ ವಾಣಿಜ್ಯ, ಗೃಹಬಳಕೆ, ಆಟೋ ಗ್ಯಾಸ್ ಅಭಾವ ದಿನೇ ದಿನೆ ಉಲ್ಬಣವಾಗುತ್ತಿದೆ. ಯುದ್ಧ ಇದೆ ನಿಜ, ಆದರೆ ಕೇಂದ್ರ ಸರ್ಕಾರ ಜವಾಬ್ದಾರಿ ತೆಗೆದುಕೊಂಡು ಏನಾದರೂ ಪರಿಹಾರ ಮಾಡಬೇಕು. ಸಣ್ಣಪುಟ್ಟ ಕಾಫಿ, ತಿಂಡಿ ಅಂಗಡಿಗಳಿಗೆ, ಲಕ್ಷಾಂತರ ಆಟೋದವರಿಗೆ ಗ್ಯಾಸ್ ಸಿಗದೆ ಅವರ ಸಂಪಾದನೆ ನಿಂತು ಹೋಗಿದೆ. ಕೇಂದ್ರ ಸರ್ಕಾರ ಇದನ್ನು ಜವಾಬ್ದಾರಿಯಾಗಿ ತಗೊಂಡು ಪರಿಹಾರ ಮಾಡಬೇಕು. ದೊಡ್ಡ ಹೋಟೆಲ್‌ಗಳು ಬ್ಲಾಕ್‌ನಲ್ಲಿ ತಗೊತಾರೆ. ಬ್ಲಾಕ್ ಮಾರ್ಕೆಟ್‌ನಲ್ಲಿ ಹೇಗೆ ಸಿಗುತ್ತಿದೆ. ಗ್ಯಾಸ್ ಸಪ್ಲೈ ಮಾಡುವ ಕಂಪನಿಗಳು ನಾಲ್ಕೈದು ಇವೆ. ಎಲ್ಲವೂ ಕೇಂದ್ರ ಸರ್ಕಾರದ ವ್ಯಾಪ್ತಿಯಲ್ಲಿವೆ. ಎಂದು ಕಂದಾಯ ಸಚಿವ ಕೃಷ್ಣ ಬೈರೇಗೌಡ ಅಸಮಾಧಾನ ವ್ಯಕ್ತಪಡಿಸಿದರು.