152 ರೈತರಿಗೆ 7.3 ಕೋಟಿ ರೂ. ಪರಿಹಾರ

ರಾಜ್ಯದಲ್ಲಿ ಬಿಜೆಪಿ ಸರ್ಕಾರದ ಅವಧಿ 2022ರಲ್ಲಿ ಕೆ.ಸಿಂಗೇನಹಳ್ಳಿ ಗ್ರಾಮದ ದೇವರಾಜು, ಮಂಜು, ಗಣೇಶ್ ಎಂಬುವರ ಜಮೀನಿನಲ್ಲಿ ಅಧಿಕಾರಿಗಳು ಕಾಮಗಾರಿ ಆರಂಭಿಸಿದ್ದರು. ಸ್ಥಳಕ್ಕೆ ಬಿಜೆಪಿ ಮುಖಂಡರು ಭೇಟಿ ನೀಡಿ ಪರಿಶೀಲಿಸಿದಾಗ, ರೈತರಿಂದ ಭೂಸಾಧೀನಪಡಿಸಿಕೊಳ್ಳದೆ ಕಾಮಗಾರಿ ಆರಂಭಿಸಿರುವುದು ಕಂಡುಬಂತು.

ಹೋರಾಟ ಮಾಡಿ ಕಾಮಗಾರಿ ಸ್ಥಗಿತಗೊಳಿಸಿ ಭೂಸ್ವಾಧೀನ ಪ್ರಕ್ರಿಯೆಗೆ ಒತ್ತಾಯಿಸಿದ ಹಿನ್ನೆಲೆಯಲ್ಲಿ ಅಂದಿನ ಜಲಸಂಪನ್ಮೂಲ ಸಚಿವರಾಗಿದ್ದ ಗೋವಿಂದ ಕಾರಜೋಳ ವಿಷಯವನ್ನು ಕ್ಯಾಬಿನೆಟ್ ಸಭೆಯಲ್ಲಿ ಚರ್ಚಿಸಿ ಮಂಜೂರಾತಿಗೆ ಅನುಮತಿ ಕೊಡಿಸಿದ್ದರು. ಅಂದಿನ ಸರ್ಕಾರದಲ್ಲಿ ಭೂಸ್ವಾಧೀನ ಪ್ರಕ್ರಿಯೆ ಪೂರ್ಣಗೊಳಿಸಲಾಯಿತು. ಇದೀಗ ಹಣ ಬಿಡುಗಡೆಯಾಗಿದೆ ಎಂದು ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.

ಈಗಿನ ರಾಜ್ಯ ಸರ್ಕಾರ ಇದೇ ತಿಂಗಳು 9ರಂದು ಅಧೀಕೃತ ಭೂಸ್ವಾಧೀನ ಗೆಜೆಟ್ ನೋಟಿಫಿಕೇಷನ್ ಹೊರಡಿಸಿದೆ. ಈ ಯೋಜನೆಗೆ ಭೂಸ್ವಾಧೀನ ಪಡಿಸಿಕೊಂಡ 152 ರೈತರ ಒಟ್ಟು 31.12 ಎಕರೆ ಜಮೀನು ಬಳಕೆಯಾಗಿದ್ದು, ಕೆ.ಸಿಂಗೇನಹಳ್ಳಿಯ 15 ರೈತರಿಗೆ 77 ಲಕ್ಷ ರೂ., ಕುಂಬೇನಹಳ್ಳಿಯ 7 ರೈತರಿಗೆ 25 ಲಕ್ಷ ರೂ., ಕಾಚೇನಹಳ್ಳಿಯ 39 ರೈತರಿಗೆ 1.05 ಕೋಟಿ ರೂ., ನಾಡನಹಳ್ಳಿಯ 22 ರೈತರಿಗೆ 1.29 ಕೋಟಿ ರೂ., ಪಡುವನಹಳ್ಳಿಯ 25 ರೈತರಿಗೆ 1.38 ಕೋಟಿ ರೂ. ಹಾಗೂ ಆನೆಕೆರೆಯ 44 ರೈತರಿಗೆ 1.8 ಕೋಟಿ ರೂ. ಬಿಡುಗಡೆ ಮಾಡಿದೆ ಎಂದು ತಿಳಿಸಿದರು.

ರಾಜಕೀಯವಾಗಿ ತೊಂದರೆ ಉಂಟಾದರೂ ಸಹ ಅದನ್ನು ಲೆಕ್ಕಿಸದೆ 2022ರಲ್ಲಿ ಸ್ಥಳೀಯ ರೈತರೊಂದಿಗೆ ಬಿಜೆಪಿ ಮುಖಂಡರು ಕೈಗೊಂಡ ಹೋರಾಟದ ಫಲವಾಗಿ ಹಿಂದಿನ ಪರಿಹಾರಕ್ಕೆ ಹೋಲಿಸಿದರೆ ಈಗ ಹೆಚ್ಚುವರಿಯಾಗಿ ಪರಿಹಾರ ನೀಡಬೇಕಾಗಿದೆ ಎಂದರಲ್ಲದೆ, ರೈತರು ಕಳೆದುಕೊಂಡಿರುವ ತೆಂಗು, ಅಡಕೆ ಮರಗಳನ್ನು ಸರಿಯಾಗಿ ಲೆಕ್ಕ ಮಾಡದೆ ವ್ಯತ್ಯಾಸ ಮಾಡಿರುವುದರಿಂದ ಜಿಲ್ಲಾಧಿಕಾರಿಗಳು ಪುನಃ ಸ್ಥಳಕ್ಕೆ ಭೇಟಿ ನೀಡಿ, ಅಥವಾ ಭೂಸ್ವಾಧೀನ ಅಧಿಕಾರಿಗಳ ಮೂಲಕ ಪರಿಶೀಲನೆ ನಡೆಸಿ ಹೆಚ್ಚುವರಿ ಅನುದಾನಕ್ಕೆ ಶಿಫಾರಸು ಮಾಡುವಂತೆ ಮನವಿ ಮಾಡಲಾಗುವುದು ಎಂದರು.

ಬಿಜೆಪಿ ಹೊಳೆನರಸೀಪುರ ಮಂಡಲ ಪ್ರಧಾನ ಕಾರ್ಯದರ್ಶಿ ವಿದ್ಯಾಪ್ರಸಾದ್, ಜಿಲ್ಲಾ ರೈತ ಮೋರ್ಚಾ ಪ್ರಧಾನ ಕಾರ್ಯದರ್ಶಿ ನಾಗೇಶ್ ಹಿರಿಬಿಳ್ಳಿ, ಜಿಲ್ಲಾ ಕಾರ್ಯದರ್ಶಿ ಗಿರೀಶ್ ತೂಬಿನಕೆರೆ ಭಾಗವಹಿಸಿದ್ದರು.