ನಗರದ ರಾಜಘಟ್ಟದಲ್ಲಿರುವ ಸುಮಾರು 12 ಎಕರೆ ವಿಸ್ತಾರದಲ್ಲಿ ನಿತ್ಯ 450 ಲಾರಿಗಳು ನಿಲ್ಲುತ್ತಿದ್ದು ಯಾವುದೇ ವ್ಯವಸ್ಥೆ ಇಲ್ಲವಾಗಿದೆ. ಬಿತ್ತನೆ ಆಲೂಗಡ್ಡೆ, ರಸಗೊಬ್ಬರ, ಆಹಾರ ಧಾನ್ಯಗಳನ್ನು ಹೊರ ರಾಜ್ಯದಿಂದ ತರುವ ಲಾರಿಗಳು ಮೂರ್ನಾಲ್ಕು ದಿನಗಳ ವರೆಗೆ ಇಲ್ಲಿಯೇ ನಿಲ್ಲಬೇಕಾಗುತ್ತದೆ. ಆದರೆ ಟ್ರಕ್ ಟರ್ಮಿನಲ್ಗೆ ಸ್ವಂತ ಜಾಗವಿಲ್ಲ. ಲಾರಿ ಚಾಲಕ ಹಾಗೂ ಕ್ಲೀನರ್ಗಳಿಗೆ ಕುಡಿಯಲು ಹನಿ ನೀರು ಸಿಗುವುದಿಲ್ಲ. ರಾತ್ರಿ ಸಮಯದಲ್ಲಿ ಓಡಾಡಲು ಬೆಳಕಿನ ವ್ಯವಸ್ಥೆ ಇಲ್ಲ. ವಿಶ್ರಾಂತಿ ಗೃಹ, ಶೌಚ ಹಾಗೂ ಸ್ನಾನ ಗೃಹ ವ್ಯವಸ್ಥೆ ದೂರದ ಮಾತಾಗಿದೆ. ನೂರಾರು ಕಿ.ಮೀ. ಲಾರಿ ಓಡಿಸಿಕೊಂಡು ಬರುವ ಚಾಲಕರು ವಾಹನದೊಳಗೆ ಸೊಳ್ಳೆ ಕಚ್ಚಿಸಿಕೊಂಡು ಮಲಗಬೇಕಾದ ದುಸ್ಥಿತಿ ನಿರ್ಮಾಣವಾಗಿದೆ. ಅಗತ್ಯ ಬೇಡಿಕೆ ಈಡೇರಿಕೆಗೆ ಲಾರಿ ಮಾಲೀಕರ ಸಂಘ ಸಾಕಷ್ಟು ಬಾರಿ ಜಿಲ್ಲಾಡಳಿತ ಹಾಗೂ ಜನಪ್ರತಿನಿಧಿಗಳ ಗಮನಕ್ಕೆ ತಂದರೂ ಯಾವುದೇ ಪ್ರಯೋಜನವಾಗಿಲ್ಲ.
