ಚರ್ಮಗಂಟು ರೋಗಕ್ಕೆ 130 ಜಾನುವಾರು ಸಾವು

ಪಶುಪಾಲಕರಲ್ಲಿ ಆತಂಕ | ಸೂಕ್ತ ಪರಿಹಾರ ನೀಡಲು ಸರ್ಕಾರಕ್ಕೆ ಒತ್ತಾಯ

ಹರಪನಹಳ್ಳಿ: ಮಾರಣಾಂತಿಕ ಚರ್ಮಗಂಟು ರೋಗಕ್ಕೆ ತುತ್ತಾದ ಜಾನುವಾರುಗಳು ಚಿಕಿತ್ಸೆ ಫಲಿಸದೆ ಸಾವಿಗೀಡಾಗುತ್ತಿರುವುದು ತಾಲೂಕಿನ ರೈತರಲ್ಲಿ ಆತಂಕ ಸೃಷ್ಟಿಸಿದೆ.

ಜಮೀನು ಉಳುಮೆ ವೇಳೆಯೇ ಕುಸಿದು ಬೀಳುತ್ತಿರುವ ಎತ್ತುಗಳನ್ನು ಕಂಡು ತಾಲೂಕಿನ ಬಾಪೂಜಿ ನಗರ, (ಉದ್ದಗಟ್ಟಿ ದೊಡ್ಡ ತಾಂಡಾ) ಗೋವೆರಹಳ್ಳಿ, ಮಾಡಲಗೇರಿ, ಅಲ್ಮರಸೀಕೆರೆ, ಕಣಿವಿಹಳ್ಳಿ ರೈತರು ಆತಂಕಕ್ಕೆ ಒಳಗಾಗಿದ್ದಾರೆ.

ಕಳೆದ ಒಂದು ತಿಂಗಳಿನಿಂದ ಕಣಿವಿಹಳ್ಳಿಯಲ್ಲಿ ಚರ್ಮಗಂಟು ರೋಗಕ್ಕೆ ಅಲಮರಸೀಕೆರಿ ಅಜ್ಜಪ್ಪ, ಚಿಕ್ಕಣ್ಣನವರ ಗೋಣೆಪ್ಪ ಹಾಗೂ ಇಟ್ಟಿಗುಡಿ ರಾಮಪ್ಪನವರ ಮೂರು ಎತ್ತುಗಳು ಬಲಿಯಾಗಿವೆ. ಬಾಪೂಜಿನಗರದ ರೈತ ಎಚ್.ಕೆ. ಯಂಕ್ಯನಾಯ್ಕ ಅವರ ಎತ್ತು ಜಮೀನಿನಲ್ಲೇ ಮೃತಪಟ್ಟಿದೆ. ಇದೇ ರೀತಿ ವಿವಿಧ ಗ್ರಾಮಗಳಲ್ಲಿ ನೂರಕ್ಕೂ ಹೆಚ್ಚು ಜಾನುವಾರುಗಳು ಬಲಿಯಾಗಿವೆ. ಕಾಯಿಲೆಗೊಳಗಾದ ಹಸು, ಎತ್ತುಗಳಿಗೆ ಪಶು ವೈದ್ಯಾಧಿಕಾರಿಗಳು ಚಿಕಿತ್ಸೆ ನೀಡುತ್ತಿದ್ದರೂ ಹಲವು ಜಾನುವಾರು ಸಾವು ಬದುಕಿನ ನಡುವೆ ಹೋರಾಡುತ್ತಿವೆ.

ಪಶು ವೈದ್ಯಾಧಿಕಾರಿಗಳು ಕೂಡಲೇ ಚರ್ಮಗಂಟು ರೋಗಕ್ಕೆ ಸೂಕ್ತ ಚಿಕಿತ್ಸೆ ನೀಡಿ ಸಾವಿಗೀಡಾಗುತ್ತಿರುವ ಜಾನುವಾರುಗಳ ರಕ್ಷಣೆಗೆ ಮುಂದಾಗಬೇಕು. ಮೃತಪಟ್ಟಿರುವ ಎತ್ತು, ಹಸುಗಳಿಗೆ ಸೂಕ್ತ ಪರಿಹಾರ ನೀಡಬೇಕು. ಇಲ್ಲದಿದ್ದರೆ ನಮ್ಮಗಳ ಬದುಕು ನಶಿಸಿ ಹೋಗುತ್ತದೆ ಎಂದು ರೈತರು ಅಳಲು ತೋಡಿಕೊಳ್ಳುತ್ತಿದ್ದಾರೆ.