'ಹರಿದಾಸರ ದಿನಚರಿ' ಚಿತ್ರ ಡಿಸೆಂಬರ್​ 5ಕ್ಕೆ ಬಿಡುಗಡೆ...

ಉಡುಪಿಯ ಭಾರತ್​ ಸಿನಿಮಾಸ್​ನಲ್ಲಿ ಪ್ರದರ್ಶನ

ಚಿತ್ರದ ನಿರ್ದೇಶಕ ಗಿರೀಶ್​ ನಾಗರಾಜ್​ ಮಾಹಿತಿ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಭಾರತೀಯ ಸಂಸ್ಕೃತಿ ಮತ್ತು ಆಧ್ಯಾತ್ಮಿಕ ಶ್ರೀಮಂತಿಕೆಯನ್ನು ಬೆಳ್ಳಿತೆರೆಗೆ ತರುವ ಉದ್ದೇಶದಿಂದ ಕರಿಗರಿ ಫಿಲ್ಮ್ಸ್​ ವತಿಯಿಂದ ಹರಿದಾಸರ ದಿನಚರಿ ಚಿತ್ರವನ್ನು ಅತ್ಯಂತ ಹೆಮ್ಮೆಯಿಂದ ಉಡುಪಿಯ 'ಭಾರತ್​ ಸಿನಿಮಾಸ್​'ನಲ್ಲಿ ಪರ್ಯಾಯ ಪುತ್ತಿಗೆ ಶ್ರೀಗಳ ಆಶೀರ್ವಾದದೊಂದಿಗೆ ಡಿ.5ರಂದು ಬಿಡುಗಡೆ ಮಾಡಲಾಗುತ್ತಿದೆ.

ಈ ಚಿತ್ರವು 15ನೇ ಶತಮಾನದ ದಾಸಶ್ರೇಷ್ಠರಾದ ಶ್ರೀ ಪುರಂದರ ದಾಸ ಅವರ ದೈನಂದಿನ ಜೀವನದ ಮನೋಹರ ದೃಶ್ಯ ಒಳಗೊಂಡಿದೆ. ಡಾ. ವಿದ್ಯಾಭೂಷಣ್​ ಅವರು ಪುರಂದರರಾಗಿ ಅಭಿನಯಿಸಿದ್ದಾರೆ ಎಂದು ಚಿತ್ರದ ನಿರ್ದೇಶಕ ಗಿರೀಶ್​ ನಾಗರಾಜ್​ ವಿಜಯವಾಣಿಗೆ ಮಾಹಿತಿ ನೀಡಿದರು.

ಆಳವಾದ ಭಕ್ತಿಯ ಪ್ರತೀಕ

ಇದು ಜೀವನಚರಿತ್ರೆಯ ಚಿತ್ರವಲ್ಲ. ಪ್ರೇಕ್ಷಕರನ್ನು ಆಳವಾದ ಭಕ್ತಿ ಮತ್ತು ಕಲಾತ್ಮಕ ಅಭಿವ್ಯಕ್ತಿಯ ಯುಗಕ್ಕೆ ಕರೆದೊಯ್ಯುವ ಒಂದು ಅನುಭವ. ಅದ್ಭುತ ದೃಶ್ಯಗಳು ಮತ್ತು ಆತ್ಮಸ್ಪರ್ಶಿ ನಿರೂಪಣೆಯೇ ಚಿತ್ರದ ಜೀವಾಳ. ಪುರಂದರರು ತಮ್ಮ ದಿನಚರಿಯಲ್ಲಿ ಮುನ್ನಡೆಯುವುದು, ಅವರ ಪ್ರಸಿದ್ಧ ಜಗದೋದ್ಧಾರನ ಆಡಿಸಿದಳೆ ಯಶೋದೆ ಹಾಡು ರಚಿಸುವುದು ಮತ್ತು 15ನೇ ಶತಮಾನದ ಸಂತಸಂಯೋಜಕನ ದೈನಂದಿನ ಆಚರಣೆಗಳಲ್ಲಿ ತೊಡಗುವುದನ್ನು ಚಿತ್ರ ಅನುಸರಿಸುತ್ತದೆ.

ಪುರಂದರದಾಸರ ನಿತ್ಯದ ಚಟುವಟಿಕೆ

ಪುರಂದರದಾಸರು ತಮ್ಮ ಗುರುಗಳಾದ ವ್ಯಾಸತೀರ್ಥರ ದರ್ಶನಕ್ಕೆಂದು ಅಬ್ಬೂರಿಗೆ ಭೇಟಿ ನೀಡಿದ್ದಾಗ, ದೊಡ್ಡ ಮಳೂರಿನ ಅಪ್ರಮೇಯ ಸ್ವಾಮಿ ದೇವಾಲಯದಲ್ಲಿ ನವನೀತ ಅಂಬೇಗಾಲು ಕೃಷ್ಣನ ಸುಂದರವಾದ ವಿಗ್ರಹದ ದರ್ಶನ ಪಡೆಯುತ್ತಾರೆ. ಅಲ್ಲಿಯೇ ಅವರು ಹಾಡು ರಚಿಸಿದ ಹಾಗೂ ಐತಿಹಾಸಿಕ ಘಟನೆಯ ಮೂಲ ಕಥೆ ಹೆಣೆಯಲಾಗಿದೆ. ಮುಂಜಾನೆಯ ಪ್ರಾರ್ಥನಾ ಕರ್ಮಗಳಿಂದ ಪ್ರಾರಂಭಿಸಿ, ರಾತ್ರಿ ಶಯನದ ವರೆಗಿನ ಚಿತ್ರಣ ಸಿನಿಮಾದಲ್ಲಿ ಇರಲಿದೆ. ಮಾಹಿತಿಗಾಗಿ ಮೊ.ಸಂ. 9980967783 ಸಂಪರ್ಕಿಸಬಹುದು ಎಂದು ತಿಳಿಸಿದ್ದಾರೆ.