ಮಂಗಳೂರಿಗಿನ್ನು ಹರೇಕಳ ನೀರು!

ವಿಜಯವಾಣಿ ಸುದ್ದಿಜಾಲ ಮಂಗಳೂರು

ತುಂಬೆಗೆ ಎಎಂಆರ್ ಡ್ಯಾಂನ ನೀರು ಹರಿಸಿ ನೀರಿನ ಮಟ್ಟ ಏರಿಸಿದ ಹೊರತಾಗಿಯೂ ತುಂಬೆಯಲ್ಲಿ ಸರಾಸರಿ 0.08 ಮೀ. ನೀರು ಪ್ರತೀ ದಿನ ಕುಸಿಯುತ್ತಿದೆ. ಈ ಹಿನ್ನೆಲೆಯಲ್ಲಿ ಹರೇಕಳ ಡ್ಯಾಂ ನೀರನ್ನು ಹೆಚ್ಚುವರಿ ಪಂಪ್ ಬಳಸಿ ತುಂಬೆಗೆ ರೀಫಿಲ್ ಮಾಡಲು ಪಾಲಿಕೆ ನಿರ್ಧರಿಸಿದೆ.

ತುಂಬೆ ಡ್ಯಾಂ ನೀರು ಇಳಿಕೆಯಾಗುತ್ತಿರುವ ಹಿನ್ನೆಲೆಯಲ್ಲಿ ಹರೇಕಳ ಡ್ಯಾಂನಿಂದ ಪ್ರತೀದಿನ 50ರಿಂದ 60 ಎಂಎಲ್‌ಡಿ ನೀರು ಡ್ಯಾಂಗೆ ಪಂಪ್ ಮಾಡಲಾಗುತ್ತಿದೆ. ಮಂಗಳೂರಿಗೆ ನಿತ್ಯ 155 ಎಂಎಲ್‌ಡಿ ನೀರು ಸರಬರಾಜು ಮಾಡುವ ಕಾರಣದಿಂದ ಶೇ.40ರಷ್ಟು ನೀರು ಡ್ಯಾಂನ ಕೆಳಭಾಗದಿಂದ(ಹರೇಕಳ ಡ್ಯಾಂ) ಪಡೆಯಲಾಗುತ್ತಿದೆ. ಮುಂದಿನ 50 ದಿನದವರೆಗೆ ಪ್ರತೀ ದಿನ 60 ಎಂಎಲ್‌ಡಿ ನೀರು ಇಲ್ಲಿ ಲಭ್ಯವಾಗುವುದರಿಂದ ಹರೇಕಳ ಡ್ಯಾಂಗೆ ಹೆಚ್ಚುವರಿ ಪಂಪ್ ಅಳವಡಿಸಿ ನೀರು ಪಂಪಿಂಗ್ ಮಾಡುವುದು ಪಾಲಿಕೆಗೆ ಅನಿವಾರ್ಯ.

ಮತ್ತೆ ಕುಸಿದ ನೀರಿನ ಮಟ್ಟ

ಗುರುವಾರ ತುಂಬೆಯಲ್ಲಿ 5.59 ಮೀ. ನೀರಿದ್ದು, ಈ ನೀರು ಮುಂದಿನ 50 ದಿನಗಳವರೆಗೆ ಮಾತ್ರ ಲಿಫ್ಟ್ ಮಾಡಲು ಸಾಧ್ಯ! ಈ ಮಧ್ಯೆ ಮಂಗಳೂರಿಗೆ ನೀರು ರೇಷನಿಂಗ್ ಮಾಡುವ ನಿರ್ಧಾರ ಸದ್ಯಕ್ಕಿಲ್ಲ ಎಂದು ಪಾಲಿಕೆ ಸ್ಪಷ್ಟಪಡಿಸಿದೆ. ಶುಕ್ರವಾರ ತುಂಬೆಯಲ್ಲಿ 5.53 ಮೀ., ಎಎಂಆರ್ ಡ್ಯಾಂನಲ್ಲಿ 15.68 ಮೀ. ನೀರಿತ್ತು. ಈ ಎರಡು ಡ್ಯಾಂನಲ್ಲಿ ಕಳೆದ 1 ವಾರದಿಂದ ಪ್ರತೀ ದಿನ 10 ಸೆಂ.ಮೀ. ನೀರು ತುಂಬೆ ಡ್ಯಾಂನಲ್ಲಿ ಕಡಿಮೆಯಾಗುತ್ತಿದೆ. ಮುಂದಿನ 30 ದಿನಗಳವರೆಗೆ ಎಎಂಆರ್ ನೀರನ್ನು ತುಂಬೆಗೆ ಹರಿಸಲು ಸಾಧ್ಯವಿಲ್ಲ. ಹರೇಕಳ ನೀರನ್ನೇ ತುಂಬೆಗೆ ಪಂಪಿಂಗ್ ಮಾಡುವಂತೆ ಜಿಲ್ಲಾಡಳಿತ ಸೂಚಿಸಿದೆ. ಈ ಹಿನ್ನೆಲೆಯಲ್ಲಿ ಮಂಗಳೂರಿಗೆ ಕುಡಿಯುವ ನೀರಿನ ಪೂರೈಕೆಯಲ್ಲಿ ತೊಂದರೆಯಾಗದಂತೆ ಜಿಲ್ಲಾಡಳಿತ ಕ್ರಮ ಕೈಗೊಂಡಿದೆ.

ಕುಡಿಯುವ ನೀರಿಗಾಗಿ ಕಂಟ್ರೋಲ್ ರೂಂ

ಕಳೆದ 1 ವಾರದಿಂದ ಪಾಲಿಕೆಯ ಕಂಟ್ರೋಲ್ ರೂಂಗೆ ಹಲವು ಕರೆಗಳು ಬಂದಿದ್ದು, ಇದರಲ್ಲಿ ಶೇ.50ರಷ್ಟು ನೀರಿನ ಕೊರತೆಯದ್ದೇ ಇತ್ತು. ಇದಕ್ಕಾಗಿ ಮಂಗಳೂರು ಪಾಲಿಕೆ ವ್ಯಾಪ್ತಿಯ ಕುಡಿಯುವ ನೀರಿನ ಸಮಸ್ಯೆ ಪರಿಹಾರಕ್ಕೆ ಅಧಿಕಾರಿಗಳು ಮುಂದಾಗಿದ್ದು, ಕುಡಿಯುವ ನೀರಿನ ಸಮಸ್ಯೆ ಇದ್ದಲ್ಲಿ ಕಂಟ್ರೋಲ್ ರೂಂ(0824- 2220306 ಅಥವಾ 0824- 2220303)ಗೆ ಕರೆ ಮಾಡಿದರೆ ವ್ಯವಸ್ಥೆ ಮಾಡಲಾಗುತ್ತದೆ. ಈಗಾಗಲೇ ಕುಡಿಯುವ ನೀರಿನ ಪೂರೈಕೆಯಲ್ಲಿ ಯಾವುದೇ ತೊಂದರೆಯಾಗದಂತೆ ಪ್ರತೀ ದಿನ ನಿಗಾ ಇರಿಸಲಾಗುತ್ತದೆ ಎಂದು ಪಾಲಿಕೆ ತಿಳಿಸಿದೆ.

https://www.vijayavani.net/modi-mangalore-road-show-time-change

https://www.vijayavani.net/modi-mangalore-road-show-traffic-system-will-change