ಏ.26ರಂದು ಇಂಡಿಗನತ್ತ ಗ್ರಾಮದಲ್ಲಿ ನಡೆದ ಮತಗಟ್ಟೆ ಧ್ವಂಸ ಘಟನೆ ಹಿನ್ನೆಲೆ ಮೆಂದಾರೆ ಗ್ರಾಮದ ಜನರು ಹಲ್ಲೆಗೊಳಗಾಗಿ ಗಾಯಗೊಂಡಿದ್ದರು. ಇದರಿಂದ ಭಯಭೀತರಾದ ಗ್ರಾಮಸ್ಥರು ಗ್ರಾಮದಲ್ಲಿನ 13 ಮಕ್ಕಳನ್ನು ಇಂಡಿಗನತ್ತ ಶಾಲೆಗೆ ಕಳುಹಿಸುವುದಿಲ್ಲ ಎಂದು ಒಕ್ಕೊರಲಿನ ತೀರ್ಮಾನ ವ್ಯಕ್ತಪಡಿಸಿ, ಮ.ಬೆಟ್ಟದ ಬುಡಕಟ್ಟು ಆಶ್ರಮ ಶಾಲೆಗೆ ಮಕ್ಕಳನ್ನು ಕಳುಹಿಸುವುದಾಗಿ ನಿರ್ಧರಿಸಿದ್ದರು. ಈ ಬಗ್ಗೆ ಶಿಕ್ಷಣ ಇಲಾಖೆಯ ಅಧಿಕಾರಿಗಳಿಗೆ ತಿಳಿದಿತ್ತು. ಹಾಗಾಗಿ ಶಾಲಾ ಆರಂಭದ ಹಿನ್ನೆಲೆಯಲ್ಲಿ ಬುಧವಾರ ಇಂಡಿಗನತ್ತ ಶಾಲೆಯ ಶಿಕ್ಷಕ ರಾಘವೇಂದ್ರ ಅವರು ಗ್ರಾಮಕ್ಕೆ ತೆರಳಿ ಪಾಲಕರನ್ನು ಭೇಟಿಯಾಗಿ ಮಕ್ಕಳನ್ನು ಶಾಲೆಗೆ ಕಳುಹಿಸುವಂತೆ ಮನವಿ ಮಾಡಿದರು. ನಮ್ಮ ಮಕ್ಕಳನ್ನು ಇಂಡಿಗನತ್ತ ಶಾಲೆಗೆ ಕಳುಹಿಸುವುದಿಲ್ಲ, ನಾವು ಬುಡಕಟ್ಟು ಆಶ್ರಮ ಶಾಲೆಗೆ ದಾಖಲಿಸುವುದಾಗಿ ಪಾಲಕರು ತಿಳಿಸಿದರು.
