ಗ್ರಾಮದ ರಂಗಸ್ವಾಮಿ ದೇಗುಲದ ಅರ್ಚಕ ಮುನಿ ವೆಂಕಟೇಗೌಡ (65) ಗಾಯಗೊಂಡವರು. ಗ್ರಾಮದಲ್ಲಿ ಜಡೇಸ್ವಾಮಿ ಹಬ್ಬದ ಹಿನ್ನಲೆ ಸೋಮವಾರ ಸಂಜೆ 4.30ರಲ್ಲಿ ಕೊಂಡೋತ್ಸವ ಆಯೋಜಿಸಲಾಗಿತ್ತು. ಈ ವೇಳೆ ಹರಕೆ ಹೊತ್ತಿದ್ದ ಕೆಲವರು ಕೊಂಡ ಹಾಯ್ದರು. ಆದರೆ, ಮುನಿ ವೆಂಕಟೇಗೌಡ ಅವರು ಕೊಂಡ ಹಾಯುವಾಗ ಆಯತಪ್ಪಿ ಕೆಂಡದೊಳಗೆ ಬಿದ್ದರು. ಪರಿಣಾಮ ಗಾಯಗೊಂಡ ಇವರನ್ನು ಗ್ರಾಮಸ್ಥರು ಹನೂರು ಸರ್ಕಾರಿ ಪ್ರಾಥಮಿಕ ಆರೋಗ್ಯ ಕೇಂದ್ರಕ್ಕೆ ದಾಖಲಿಸಿ ಪ್ರಥಮ ಚಿಕಿತ್ಸೆ ಕೊಡಿಸಿದರು. ಈ ವೇಳೆ ಆಸ್ಪತ್ರೆಗೆ ಭೇಟಿ ನೀಡಿದ್ದ ಡಿಎಚ್ಒ ಡಾ. ಚಿದಂಬರಂ ಅವರು ಗಾಯಾಳುವನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಕೊಳ್ಳೇಗಾಲ ಸರ್ಕಾರಿ ಉಪ ವಿಭಾಗೀಯ ಆಸ್ಪತ್ರೆಗೆ ಕಳುಹಿಸಿ ಕೊಟ್ಟಿದ್ದು, ಚಿಕಿತ್ಸೆ ಪಡೆಯುತ್ತಿದ್ದಾರೆ.
