ಹನೂರು ತಾಲೂಕಿನ ಉದ್ದನೂರು ಗ್ರಾಮದ ಉಮೇಶ್ ಪತ್ನಿ ಚಂದ್ರಮ್ಮ ಕೃಷಿಯಲ್ಲಿ ಸಶಕ್ತಳಾದ ಮಹಿಳೆ. ಕೊಳ್ಳೇಗಾಲದ ನಿವಾಸಿಯಾಗಿದ್ದ ಇವರು ಪಟ್ಟಣದ ಸರ್ಕಾರಿ ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣ, ಸರ್ಕಾರಿ ವಸಂತಕುಮಾರಿ ಬಾಲಕಿಯರ ಪಪೂ ಕಾಲೇಜಿನಲ್ಲಿ ಪಿಯುಸಿ ಶಿಕ್ಷಣ ಹಾಗೂ ಜೆಎಸ್ಎಸ್ ಕಾಲೇಜಿನಲ್ಲಿ ಬಿ.ಎ ಪದವಿ ಪಡೆದಿದ್ದು, 2008ರಲ್ಲಿ ಆಟೋ ಚಾಲನಾ ವೃತ್ತಿ ಮಾಡಿಕೊಂಡಿದ್ದ ಹನೂರು ತಾಲೂಕಿನ ಉದ್ದನೂರು ಗ್ರಾಮದ ಉಮೇಶ್ ಅವರನ್ನು ವಿವಾಹವಾದರು. ಇವರಿಗೆ ಶಾಲಾ, ಕಾಲೇಜಿನ ರಜೆ ದಿನಗಳಲ್ಲಿ ತಂದೆ, ತಾಯಿಯೊಂದಿಗೆ ಕೃಷಿ ಚಟುವಟಿಕೆಗಳಲ್ಲಿ ಭಾಗಿಯಾಗಿ ವ್ಯವಸಾಯದ ಅನುಭವ ಪಡೆದುಕೊಂಡಿದ್ದರು. ಆದರೆ, ಸಂಪೂರ್ಣ ಕೃಷಿಯಲ್ಲಿ ತೊಡಗಲು ಸಾಧ್ಯವಾಗಿರಲಿಲ್ಲ. ವಿವಾಹವಾದ ಕೆಲ ವರ್ಷಗಳ ಬಳಿಕ ಕುಟುಂಬದ ನಿರ್ವಹಣೆ ಕಷ್ಟವಾಯಿತು. ಉಮೇಶ್ ಅವರ ತಂದೆ, ತಾಯಿ ಕೃಷಿ ಮಾಡುತ್ತಿದ್ದ ಜಮೀನು ಪಾಳು ಬಿಟ್ಟಿದ್ದನ್ನು ಅರಿತ ಚಂದ್ರಮ್ಮ ಕೃಷಿ ಮಾಡಲು ಮುಂದಾದರು. ಈ ಬಗ್ಗೆ ಪತಿ ಸಲಹೆ ಪಡೆದು 2 ವರ್ಷಗಳಿಂದ ಕೃಷಿ ಕಾಯಕಕ್ಕೆ ಧುಮುಕಿದರು. ಇದಕ್ಕೆ ಪತಿಯೂ ಸಂಪೂರ್ಣ ಸಹಕಾರ ನೀಡಿದರು.
