ಹನುಮಸಾಗರದಲ್ಲಿ ಯೂರಿಯಾಕ್ಕಾಗಿ ಅಲೆದಾಡುತ್ತಿರುವ ಅನ್ನದಾತರು

ಚೀಲಕ್ಕೆ 550 ರೂ.ವರೆಗೆ ಮಾರಾಟ | ಗೊಬ್ಬರಕ್ಕಾಗಿ ಕೃಷಿಕರ ಪರದಾಟ

ಹನುಮಸಾಗರ: ಸ್ಥಳೀಯ ಹಾಗೂ ಹನುಮನಾಳ ಹೋಬಳಿ ವ್ಯಾಪ್ತಿ ಯೂರಿಯಾ ಗೊಬ್ಬರದ ಅಭಾವ ಸೃಷ್ಟಿಯಾಗಿದೆ. ರೈತರು ಯೂರಿಯಾ ತರಲು ಪಟ್ಟಣದಿಂದ ಪಟ್ಟಣಕ್ಕೆ ಅಲೆದಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ.

ಕಳೆದ 20 ದಿನಗಳಿಂದ ಜಿಟಿಜಿಟಿ ಮಳೆ ಸುರಿಯುತ್ತಿದ್ದು, ರೈತರು ಬಿತ್ತಿದ ಸಜ್ಜೆ, ಮೇಕ್ಕೆಜೋಳ ಸೇರಿ ವಿವಿಧ ಬೆಳೆಗಳು ಬಿಳಿ ಬಣ್ಣಕ್ಕೆ ತಿರುಗಿದೆ. ಉತ್ತಮ ಫಸಲು ಬರುತ್ತದೆ ಎಂಬ ನಿರೀಕ್ಷೆಯಲ್ಲಿದ್ದವರಿಗೆ ಆತಂಕ ಶುರುವಾಗಿದೆ. ಏನಾದರೂ ಮಾಡಿ ಬೆಳೆಗಳನ್ನು ಕಾಪಾಡಬೇಕೆಂದು ಕೈಯಲ್ಲಿ ಹಣ ಹಿಡಿದು ಗೊಬ್ಬರಕ್ಕಾಗಿ ಸುತ್ತುತ್ತಿದ್ದಾರೆ. ಆದರೆ, ಯೂರಿಯಾ ಮಾತ್ರ ದೊರೆಯುತ್ತಿಲ್ಲ.

ಆದರೆ, ಕಾಳಸಂತೆಯಲ್ಲಿ ಯೂರಿಯಾ ಮಾರಾಟವಾಗುತ್ತಿದೆ. ಖಾಸಗಿ ವಾಹನಗಳ ಮೂಲಕ ವಿವಿಧ ಗ್ರಾಮಗಳಲ್ಲಿ ಯೂರಿಯಾ ಗೊಬ್ಬರ ತಂದು ಚೀಲಕ್ಕೆ 550 ರೂ.ಗೆ ಮಾರಾಟ ಮಾಡುತ್ತಿದ್ದಾರೆ. ಬೇರೆ ದಾರಿ ಇಲ್ಲದೆ ಅನ್ನದಾತರು 300 ರೂ. ಇರುವ ಚೀಲ ಯೂರಿಯಾಗೆ 550ಕ್ಕೂ ಹೆಚ್ಚು ಹಣ ನೀಡಿ ಖರೀದಿಸುತ್ತಿದ್ದಾರೆ. ಆದರೆ, ಅಧಿಕಾರಿಗಳು ಮಾತ್ರ ಕಣ್ಣಿದ್ದೂ ಕುರುಡರಂತೆ ವರ್ತಿಸುತ್ತಿದ್ದಾರೆ.