ರಸ್ತೆ ಮೇಲೆ ರಾಶಿ, ಸವಾರರಿಗೆ ಕಿರಿಕಿರಿ

ಹನುಮಸಾಗರ: ಪಟ್ಟಣಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆಗಳ ಮೇಲೆ ರೈತರು ರಾಶಿ ಮಾಡುತ್ತಿರುವುದರಿಂದ ವಾಹನ ಸವಾರರು ತೊಂದರೆ ಅನುಭವಿಸುತ್ತಿದ್ದಾರೆ. ಹನುಮನಾಳ, ಗಜೇಂದ್ರಗಡ, ಇಲಕಲ್ಲ, ಗುಡೂರು, ಕುಷ್ಟಗಿಯಿಂದ ಪಟ್ಟಣಕ್ಕೆ ಸಂಪರ್ಕ ಕಲ್ಪಿಸುವ ಮುಖ್ಯ ರಸ್ತೆ ಮತ್ತು ಮುಖ್ಯ ರಸ್ತೆಗಳಿಗೆ ಸಂಪರ್ಕ ಕಲ್ಪಿಸುವ ವಿವಿಧ ಗ್ರಾಮಗಳ ರಸ್ತೆಗಳ ಮೇಲೆ ರಾಶಿ ಮಾಡುತ್ತಿದ್ದಾರೆ. ವಿಸ್ತರಣೆ ಮಾಡದ ರಸ್ತೆಯಲ್ಲೇ ರೈತರು ರಾಶಿ ಮಾಡುತ್ತಿದ್ದಾರೆ. ಬೈಕ್ ಸವಾರರ ಮೈಮೇಲೆ ಸುಂಕ ಬರುತ್ತಿದೆ, ಗಾಳಿಗೆ ಕಣ್ಣಲ್ಲಿ ಬೀಳುತ್ತಿದೆ. ಅಪಘಾತಗಳು ಸಂಭವಿಸುವ ಸಾಧ್ಯತೆಗಳು ಹೆಚ್ಚಾಗಿವೆ. ಅಧಿಕಾರಿಗಳು ಇತ್ತ ಗಮನಹರಿಸಬೇಕೆಂದು ಸವಾರರು ಒತ್ತಾಯಿಸಿದ್ದಾರೆ.