ವಿಜಯವಾಣಿ ಸುದ್ದಿಜಾಲ ಧಾರವಾಡ
ತಾಲೂಕಿನ ನುಗ್ಗಿಕೇರಿ ಗ್ರಾಮದ ಹನುಮಂತ ದೇವಸ್ಥಾನ ಸೇರಿ ನಗರದ ವಿವಿಧ ಬಡಾವಣೆಗಳಲ್ಲಿ ದೇವಸ್ಥಾನದಲ್ಲಿ ಹನುಮ ಜಯಂತಿಯನ್ನು ಮಂಗಳವಾರ ವಿಜೃಂಭಣೆಯಿಂದ ಆಚರಿಸಲಾಯಿತು.
ನುಗ್ಗಿಕೇರಿ ದೇವಸ್ಥಾನದಲ್ಲಿ ಬೆಳಗ್ಗೆ 4 ಗಂಟೆಯಿಂದಲೇ ಅಭಿಷೇಕ, ಅಲಂಕಾರ ಆರಂಭಿಸಿ 6.11ಕ್ಕೆ ತೊಟ್ಟಿಲೋತ್ಸವ, 11 ಗಂಟೆಗೆ ಅದ್ಧೂರಿಯಾಗಿ ರಥೋತ್ಸವ ನಡೆಸಲಾಯಿತು.
ಉಳಿದಂತೆ ನಗರದ ಮುದಿ ಮಾರುತಿ ದೇವಸ್ಥಾನ, ಲೈನ್ ಬಜಾರ್ ಹನುಮಂತ ದೇವಸ್ಥಾನ, ಮದಿಹಾಳ ಮಾರುತಿ ದೇವಸ್ಥಾನ, ಮಾಳಮಡ್ಡಿ ಗೌಳಿಗಲ್ಲಿ, ಎಮ್ಮಿಕೇರಿ ಸೇರಿ ವಿವಿಧ ಕಡೆಗಳಲ್ಲಿನ ಹನುಮಂತನ ದೇವಸ್ಥಾನಗಳಲ್ಲಿ ದೇವರಿಗೆ ವಿಶೇಷ ಪೂಜೆ, ಹೋಮ ಹವನ ನೆರವೇರಿಸಲಾಯಿತು. ಬಳಿಕ ತೊಟ್ಟಿಲೋತ್ಸವ ನೆರವೇರಿಸಿ ಮಹಾ ಪ್ರಸಾದ ವಿತರಣೆ ಮಾಡಲಾಯಿತು.
