ಜೂನ್ ಆರಂಭದಲ್ಲಿ ಮುಂಗಾರು ವಿಫಲವಾದರೂ, ಜುಲೈ ಆರಂಭದಿಂದ ಮಳೆ ಬಿರುಸು ಕಂಡಿತ್ತು. ಆದರೆ ಆಗಸ್ಟ್ ತಿಂಗಳಲ್ಲಿ ಮಳೆ ಮಾಯವಾಗಿ ಬಿಸಿಲ ಝಳ ಜೋರಾಗಿದೆ. ನೀರಿನ ಕೊರತೆ ಭತ್ತದ ಬೆಳೆಯ ಮೇಲೆ ತೀವ್ರ ಪರಿಣಾಮ ಉಂಟು ಮಾಡಿದೆ. ತಾಲೂಕಿನಲ್ಲಿ ಈವರ್ಷ 1,652 ಮಿಮೀ ಮಳೆಯಾಗಿದೆ. ಆದರೆ ವಾಡಿಕೆ ಮಳೆ 2,541 ಮಿಮೀ ಆಗಿದ್ದು 889 ಮಿಮೀ ಮಳೆ ಕೊರತೆ ಕಂಡು ಬಂದಿದೆ. ತಾಲೂಕಿನಾದ್ಯಂತ ಬಿಸಿಲು ಝಳ ಹೆಚ್ಚಾಗಿದ್ದು ರೈತರು ಆತಂಕಕ್ಕೆ ಈಡಾಗಿದ್ದಾರೆ.
ತಾಲೂಕಿನಲ್ಲಿ ಈ ಬಾರಿ 8,600 ಹೆಕ್ಟೇರ್ ಪ್ರದೇಶದಲ್ಲಿ ಭತ್ತ ಬೆಳೆಯುವ ಗುರಿ ಹೊಂದಲಾಗಿತ್ತು. ಈಗಾಗಲೇ 7,000 ಹೆಕ್ಟೇರ್ ಪ್ರದೇಶದಲ್ಲಿ ಭತ್ತದ ಸಸಿಯ ನಾಟಿ ಕೂಡ ನಡೆದಿದೆ. ಆದರೆ ಗದ್ದೆಗಳಲ್ಲಿ ನೀರು ಒಣಗಿದ ಪರಿಣಾಮ ಬಹುತೇಕ ಕಡೆ ಇನ್ನೂ ನಾಟಿ ಆಗದೆ ಸಸಿ ಮುಡಿಗಳು ಅಲ್ಲೇ ಉಳಿಯುವಂತಾಗಿದೆ. ಇನ್ನು ನಾಟಿ ಮಾಡಿದ ಗದ್ದೆಗಳಲ್ಲಿ ನೀರು ಬತ್ತಿದ ಕಾರಣ ಭತ್ತದ ಸಸಿಗಳು ಒಣಗುತ್ತಿವೆ. ಇನ್ನು 500 ಹೆಕ್ಟೇರ್ ಪ್ರದೇಶದಲ್ಲಿ ಜೋಳ, 200 ಹೆಕ್ಟೇರ್ಮಲ್ಲಿ ಕಬ್ಬು ಬೆಳೆಯುವ ಗುರಿ ಇದೆ. ಈಗಾಗಲೇ 410 ಹೆಕ್ಟೇರ್ನಲ್ಲಿ ಜೋಳ ಬಿತ್ತನೆ ಮಾಡಲಾಗಿದೆ. 200 ಹೆಕ್ಟೇರ್ನಲ್ಲಿ ಕಬ್ಬು ಬೆಳೆಯಲಾಗುತ್ತಿದೆ.
ಆರ್ದ್ರಾ ಮಳೆ ಕೈಕೊಟ್ಟ ಕಾರಣ ಮುಂದಿನ ಮಳೆಗಳ ಬಗ್ಗೆ ರೈತರ ನಿರೀಕ್ಷೆ ಇತ್ತು. ಪುನರ್ವಸು ಮಳೆ ಅಬ್ಬರಿಸಿ ಒಂದಷ್ಟು ನೀರು ತಂದಿದೆ. ಆದರೆ ಬಹುನಿರೀಕ್ಷೆ ಇದ್ದ ಆಶ್ಲೇಷ ಮತ್ತು ಮಘಾ ಮಳೆ ಸಂಪೂರ್ಣ ವಿಫಲವಾಗಿದೆ. ಇದೀಗ ರೈತರ ದೃಷ್ಟಿ ಹುಬ್ಬೆ ಮಳೆಯ ಮೇಲೆ ನೆಟ್ಟಿದೆ.
