ಹಂಪಿ: ಹಂಪಿ ಉತ್ಸವದಲ್ಲಿ ಪ್ರಥಮ ದಿನವಾದ ಶುಕ್ರವಾರ ವಿರೂಪಾಕ್ಷೇಶ್ವರ ದೇವಸ್ಥಾನದ ಆವರಣದಲ್ಲಿ ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆ, ಸಮಾಜ ಕಲ್ಯಾಣ ಇಲಾಖೆ ಮಹಿಳೆಯರಿಗಾಗಿ ಮೆಹಂದಿ ಹಾಗೂ ರಂಗೋಲಿ ಸ್ಪರ್ಧೆ ನಡೆಯಿತು. ಸ್ಥಳೀಯರೊಂದಿಗೆ ಬೆಲ್ಜಿಯಂ ದೇಶದ ಮೂವರು ಮಹಿಳೆಯರು ಮೆಹಂದಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದು ವಿಶೇಷವಾಗಿತ್ತು. ಕೈಗಳಿಗೆ ಮೆಹಂದಿ ಹಚ್ಚಿಕೊಂಡು ಸಂಭ್ರಮಿಸಿದರು. ಈ ಸ್ಪರ್ಧೆಯಲ್ಲಿ ಹಗರಿಬೊಮ್ಮನಹಳ್ಳಿಯ ಸೌರಭ ಪ್ರಥಮ, ಹೊಸಪೇಟೆ ಶೈಲಜಾ ದ್ವಿತೀಯ, ಬಳ್ಳಾರಿ ಕೃಪಾ ತೃತೀಯ ಬಹುಮಾನ ಪಡೆದರು. ಭಾಗ್ಯ, ರಾಕಿ, ಕಾವೇರಿ, ರೇಷ್ಮಾ, ಸಮತಾ ಸಮಾಧಾನಕರ ಬಹುಮಾನ ಪಡೆದರು. ಪರಿಶಿಷ್ಟ ವರ್ಗಗಳ ಕಲ್ಯಾಣ ಇಲಾಖೆ ಅಧಿಕಾರಿ ಶೋಭಾ, ಸಮಾಜ ಕಲ್ಯಾಣ ಇಲಾಖೆ ಅಧಿಕಾರಿ ಅಂಬಿಕಾ, ವಿನೋದಾ, ಉಷಾ ಇದ್ದರು.
