ಅವಸಾನದ ಹಂತಕ್ಕೆ: ನಿಪ್ಪಾಣಿ ತಾಲೂಕಿನ ಗಡಿಭಾಗದ ವಿವಿಧೆಡೆ ಬಸ್ ತಂಗುದಾಣಗಳು ಕುಸಿದು ಬೀಳುವ ಹಂತದಲ್ಲಿವೆ. ಕೆಲವೊಂದು ಬಸ್ ತಂಗುದಾಣಗಳು ನೆಲಸಮವಾಗಿವೆ. ಗಳತಗಾ-ಭೋಜ ಕ್ರಾಸ್, ಕಸನಾಳ, ಬೋರಗಾಂವವಾಡಿ, ಢೋಣೆವಾಡಿ, ಭೀಮಾಪುರವಾಡಿ, ಗಳತಗಾ, ಚಿಂಚಣಿ, ಗಿರಗಾಂವ, ಶಿರಗಾಂವ, ಶಿರಗಾಂವವಾಡಿ, ನಾಗಝರಿ ಮಠ, ಜನವಾಡ ಕ್ರಾಸ್ ಮತ್ತು ನೇಜ ಕ್ರಾಸ್, ಸಿದ್ದಾಪುರವಾಡಿ ಸೇರಿ ಕೆಲ ಬಸ್ ತಂಗುದಾಣಗಳು ಹಾಳಾಗಿವೆ. ಒಳಗಡೆ ಪ್ರಯಾಣಿಕರು ನಿಲ್ಲಲು ಹೆದರುತ್ತಿದ್ದಾರೆ. ಕೆಲವೊಂದು ಕಡೆ ಕೂಡು ರಸ್ತೆಗಳಲ್ಲಿ ತಂಗುದಾಣಗಳು ಇಲ್ಲದ ಕಾರಣ ಹತ್ತಿರದ ಗಿಡಗಳೇ ಪ್ರಯಾಣಿಕರಿಗೆ ಆಶ್ರಯವಾಗಿವೆ. ಕೆಲವೆಡೆ ಮಂದಿರ, ಹೋಟೆಲ್ಗಳಲ್ಲಿ ಆಶ್ರಯ ಪಡೆಯುವ ಪರಿಸ್ಥಿತಿ ಎದುರಾಗಿದೆ.
