ಕೆಲ ರೈತರು ಕಡಲೆ ಬೀಜಗಳನ್ನು ಜೋಳದೊಂದಿಗೆ ಅಂತರ ಬೆಳೆಯಾಗಿ ಬಿತ್ತನೆ ಮಾಡಿದ್ದಾರೆ. ಲದ್ದಿ ಹುಳು ಕಡಲೆ ಹಾಗೂ ಜೋಳವನ್ನು ಹಾನಿ ಮಾಡುತ್ತಿದೆ. ಕೃಷಿ ವಿಜ್ಞಾನಿಗಳು ಶಿಫಾರಸು ಮಾಡಿದ ಕಾಲಕ್ಕೆ ಬಿತ್ತನೆ ಮಾಡಿದ್ದರೆ ಲದ್ದಿ ಹುಳುಗಳ ಕಾಟವನ್ನು ತಪ್ಪಿಸಬಹುದಿತ್ತು ಎಂಬ ಮಾತುಗಳ ಕೇಳಿ ಬರುತ್ತಿವೆ. ಆದರೆ, ಅಕಾಲಿಕ ಮಳೆ ಹಾಗೂ ಹವಾಮಾನ ವೈಪರಿತ್ಯದಿಂದಾಗಿ ಅನೇಕ ರೈತರು ವಾಡಿಕೆಯ ಬಿತ್ತನೆಯ ಅವಧಿಗೂ ಮುನ್ನವೇ ಕಡಲೆ ಬೀಜವನ್ನು ಬಿತ್ತನೆ ಮಾಡಿದ್ದಾರೆ. ಹೀಗಾಗಿ, ಬೆಳೆ ಲದ್ದಿ ಹುಳುವಿನ ಬಾಧೆಗೆ ತುತ್ತಾಗಿದೆ. ಇನ್ನು ಮುಂಗಾರಿನಲ್ಲಿ ಮೆಕ್ಕೆಜೋಳಕ್ಕೆ ದಾಳಿ ಮಾಡಿದ್ದ ಲದ್ದಿ ಹುಳು ಅದೇ ಜಮೀನು ಅಥವಾ ಅಕ್ಕಪಕ್ಕದ ಜಮೀನುಗಳಲ್ಲಿ ಕಡಲೆ, ಜೋಳ, ಅಲಸಂದಿ ಬೀಜ ಬಿತ್ತಿರುವ ಕಾರಣ ಹುಳುಗಳು ಪುನಃ ಬೆಳೆಗಳಿಗೆ ಹಾನಿ ಮಾಡಲು ಅನುಕೂಲ ಆಗಿದೆ ಎಂಬುದು ಕೃಷಿ ಅಧಿಕಾರಿಗಳ ಅಭಿಪ್ರಾಯವಾಗಿದೆ. ಈ ಲದ್ದಿ ಹುಳುಗಳ ಹತೋಟಿಗೆ ಕೊರಾಜಿನ್ ಅಥವಾ ಎಮಾಮೆಟೀನ್ ಬೆಂಜೋಯಿಟ್ ಕ್ರೀಮಿ ನಾಶಕವನ್ನು ಸಿಂಪಡಣೆ ಮಾಡುವಂತೆ ಕೃಷಿ ಅಧಿಕಾರಿಗಳು ಸಲಹೆ ನೀಡಿದ್ದಾರೆ.
