ಗುಟ್ಕಾ ಸೇವನೆಗೆ 'ದಂಡ' ಬಾಣ...!

ಉಡುಪಿ ಜಿಲ್ಲಾಸ್ಪತ್ರೆಯಲ್ಲಿ ಕಡಿವಾಣ

ತೊಂದರೆ ತಡೆಗೆ ಪೊಲೀಸ್​ ಚೌಕಿ ನಿರ್ಮಾಣ

ಪ್ರಶಾಂತ ಭಾಗ್ವತ, ಉಡುಪಿ
ನಗರದ ಅಜ್ಜರಕಾಡಿನಲ್ಲಿರುವ ಉಡುಪಿ ಜಿಲ್ಲಾಸ್ಪತ್ರೆಗೆ ಬರುವಾಗ ಚಟಗಳ ದಾಸರು, ರೋಗಿಗಳು ತುಸು ಎಚ್ಚರಿಕೆಯಲ್ಲಿ ಬರುವುದು ಒಳಿತು. ಏಕೆಂದರೆ, ಗುಟ್ಕಾ-ಬೀಡಾ ಸೇವನೆ, ಧೂಮ್ರಪಾನ (ಬೀಡಿ-ಸಿಗರೇಟ್​) ಹಾಗೂ ಮದ್ಯಪಾನ ಮಾಡಿದರೆ ಇಲ್ಲಿ ದಂಡ ತೆರಬೇಕಾಗುತ್ತದೆ..!!

ಜಿಲ್ಲಾಸ್ಪತ್ರೆಯಲ್ಲಿ ಶುಚಿತ್ವ ಕಾಪಾಡುವ ನಿಟ್ಟಿನಲ್ಲಿ ಹಾಗೂ ಆರೈಕೆ, ಚಿಕಿತ್ಸೆಗಾಗಿ ದಾಖಲಾಗುವ ರೋಗಿಗಳ ಆರೋಗ್ಯ ದೃಷ್ಟಿಯಿಂದ ಈ ಕ್ರಮ ಕೈಗೊಳ್ಳಲಾಗಿದೆ. ಆಸ್ಪತ್ರೆಯೊಳಗೇ ಕದ್ದುಮುಚ್ಚಿ ಚಟ ಮಾಡಿ ಸಿಕ್ಕಿಬಿದ್ದರೆ 200 ರೂ. ದಂಡ ಕಟ್ಟಬೇಕಾಗುತ್ತದೆ.

ವಾರದಲ್ಲಿ 3 ದಿನ ತಪಾಸಣೆ

ಜಿಲ್ಲಾಸ್ಪತ್ರೆಗೆ ಪ್ರತಿದಿನವೂ ಚಿಕಿತ್ಸೆಗಾಗಿ ಸಾವಿರಾರು ಜನರು ಆಗಮಿಸುತ್ತಾರೆ. ನೂರಾರು ಜನರು ಆಸ್ಪತ್ರೆಯಲ್ಲಿ ದಾಖಲಾಗುತ್ತಾರೆ. ಅವರಲ್ಲಿ ಅನೇಕರು ಆಸ್ಪತ್ರೆಯಲ್ಲೇ ಗುಟ್ಕಾ-ಬೀಡಾಗಳನ್ನು ತಿಂದು ಆಸ್ಪತ್ರೆಯ ಆವರಣ ಅಥವಾ ಶೌಚಾಲಯದಲ್ಲಿ ಉಗುಳುತ್ತಾರೆ. ಇದರಿಂದ ಆಸ್ಪತ್ರೆಯಲ್ಲಿ ಅಸ್ವಚ್ಛತೆಯ ವಾತಾವರಣ ನಿರ್ಮಾಣಗೊಂಡು ಕೆಲವೆಡೆ ಗಬ್ಬೆದ್ದು ನಾರುತ್ತಿತ್ತು. ಹೀಗಾಗಿ ವಾರದಲ್ಲಿ 3 ದಿನಕ್ಕೊಮ್ಮೆ ರೋಗಿಗಳ ಬಳಿ ಗುಟ್ಕಾ-ಬೀಡಾ, ಬೀಡಿ-ಸಿಗರೇಟ್​ ಇದೆಯೇ ಎಂದು ತಪಾಸಣೆ ಮಾಡಲಾಗುತ್ತಿದೆ.

ವೈದ್ಯರ ಸಮಿತಿ ರಚನೆ

ಅನಾರೋಗ್ಯಕ್ಕೆ ತುತ್ತಾಗಿ ಆಸ್ಪತ್ರೆಯಲ್ಲಿ ದಾಖಲಾಗಿದ್ದರೂ ಸಹ ಕೆಲ ರೋಗಿಗಳು ಗುಟ್ಕಾ-ಬೀಡಾ, ಬೀಡಿ-ಸಿಗರೇಟ್​ ಚಟ ಮಾಡುತ್ತಾರೆ. ವಾರ್ಡ್​ನ ಶೌಚಾಲಯ, ವರಾಂಡದ ಕಿಟಕಿಗಳ ಮೇಲೆ ಹಾಗೂ ತಮ್ಮ ಬ್ಯಾಗ್​ಗಳಲ್ಲಿ ಅವುಗಳನ್ನು ಕದ್ದುಮುಚ್ಚಿ ಇಟ್ಟುಕೊಂಡು ಬಳಕೆ ಮಾಡುತ್ತಾರೆ. ಹೀಗಾಗಿ ಜಿಲ್ಲಾಸ್ಪತ್ರೆಯಲ್ಲಿ ಅವುಗಳ ಪತ್ತೆಗಾಗಿ ವೈದ್ಯರನ್ನೊಳಗೊಂಡ ಮಾನಿಟರಿಂಗ್​ ಆಫೀಸರ್​ ಕಮಿಟಿ ರಚಿಸಲಾಗಿದೆ.

ಮದ್ಯ ಬಾಟಲಿಯೂ ಪತ್ತೆ..!

ಆಸ್ಪತ್ರೆಯ ಒಳಗೆ ತಪಾಸಣೆ ಮಾಡುವಾಗ ಕೆಲವೊಮ್ಮೆ ಮದ್ಯದ ಬಾಟಲಿಯೂ ಪತ್ತೆಯಾಗುತ್ತದೆ. ಮಲಗುವ ಬೆಡ್​ನ ಕೆಳಭಾಗದಲ್ಲಿ, ಶೌಚಾಲಯದಲ್ಲಿ, ಆಸ್ಪತ್ರೆಯ ಸುತ್ತಮುತ್ತ ಇರುವ ಗಿಡಗಳ ಸಂದಿಯಲ್ಲಿ ಮದ್ಯದ ಬಾಟಲಿ ಇಟ್ಟುಕೊಂಡು ರಾತ್ರಿ ವೇಳೆ ಕುಡಿಯುತ್ತಾರೆ. ರೋಗಿಗಳು ಅಥವಾ ರೋಗಿಗಳನ್ನು ನೋಡಿಕೊಳ್ಳಲು ಬರುವವರು ಈ ಕಾರ್ಯ ಮಾಡುತ್ತಿದ್ದಾರೆ. ಕದ್ದುಮುಚ್ಚಿ ಮದ್ಯ ಕುಡಿಯುವಾಗ ಅಥವಾ ಗುಟ್ಕಾ-ಬೀಡಾ ಸೇವನೆ, ಬೀಡಿ-ಸಿಗರೇಟ್​ ಸೇದುವಾಗ ಸಿಕ್ಕಿಬಿದ್ದರೆ ಎನ್​ಟಿಸಿಪಿ (ನ್ಯಾಷನಲ್​ ಟೊಬ್ಯಾಕೋ ಕಂಟ್ರೋಲ್​ ಪ್ರೋಗ್ರಾಮ್​) ಕಾಯಿದೆಯ ಅನ್ವಯ 200ರೂ. ದಂಡ ಹಾಕಲಾಗುತ್ತದೆ.

ಭದ್ರತೆಗಾಗಿ ಹೊರ ಠಾಣೆ ಸ್ಥಾಪನೆ

ಉಡುಪಿ ಜಿಲ್ಲಾಸ್ಪತ್ರೆಯಲ್ಲಿ ಇದೀಗ ಪೊಲೀಸ್​ ಹೊರ ಠಾಣೆಯನ್ನೂ ಆರಂಭಿಸಲಾಗಿದ್ದು, ರೋಗಿಗಳ ಹಾಗೂ ವೈದ್ಯರ ಭದ್ರತೆಗಾಗಿ ಕ್ರಮ ವಹಿಸಲಾಗಿದೆ. ಇತ್ತೀಚೆಗಿನ ದಿನಗಳಲ್ಲಿ ವೈದ್ಯರ ಮೇಲೆ ಹಲ್ಲೆ ನಡೆಯುತ್ತಿರುವುದರಿಂದ, ಆಸ್ಪತ್ರೆಯಲ್ಲಿ ಕೆಲ ಸಂದರ್ಭಗಳಲ್ಲಿ ಗಲಾಟೆ ನಡೆಯುವುದರಿಂದ ಹಾಗೂ ಸಾರ್ವಜನಿಕರಿಂದ ಅನಗತ್ಯವಾಗಿ ಆಗುವ ತೊಂದರೆಗಳಿಗೆ ಕಡಿವಾಣ ಹಾಕಲು ಈ ಪೊಲೀಸ್​​ ಚೌಕಿ ಕೆಲಸ ಮಾಡಲಿದೆ. ಇದಲ್ಲದೆ, ಬೇರೆ ಬೇರೆ ಠಾಣಾ ವ್ಯಾಪ್ತಿಯಲ್ಲಿ ಅಪಘಾತಕ್ಕೊಳಗಾದ, ಮರಣ ಹೊಂದಿದ ರೋಗಿಗಳು ಅಥವಾ ಸಾರ್ವಜನಿಕರು ಜಿಲ್ಲಾಸ್ಪತ್ರೆಗೆ ಬರುವುದರಿಂದ ಎಲ್ಲ ಸೂಕ್ತ ಮಾಹಿತಿ ಸಂಗ್ರಹಿಸಿ, ರವಾನಿಸುವ ಕಾರ್ಯವೂ ಈ ಠಾಣೆಯಿಂದ ಆಗಲಿದೆ.