ಗುರುವಿನ ನಡಿಗೆ ಭಕ್ತರ ಕಡೆಗೆ

ಅಮೀನಗಡ: ಗಚ್ಚಿನಮಠದ ಶಂಕರಾಜೇಂದ್ರ ಮಹಾಸ್ವಾಮಿಗಳು ಹಮ್ಮಿಕೊಂಡಿರುವ ಗುರುವಿನ ನಡಿಗೆ, ಭಕ್ತರ ಕಡೆಗೆ ಪಾದಯಾತ್ರೆ ಭಕ್ತ ಸಮೂಹದಲ್ಲಿ ಭಕ್ತಿಯ ಪರಾಕಾಷ್ಠೆಗೆ ಸಾಕ್ಷಿಯಾಗುವ ಜತೆಗೆ ಗುಡಿ, ದರ್ಗಾ, ಎಲ್ಲವೂ ಮೀರಿ ಸಂಸ್ಕಾರ, ಪರಂಪರೆ ಹಾಗೂ ವಿಚಾರಗಳ ವಿನಿಮಯಕ್ಕೆ ಹೊಸ ನಾಂದಿ ಹಾಡಿದೆ.

ಸ್ಥಳೀಯ ಪ್ರಭುಶಂಕರೇಶ್ವರ ಅನುಭವ ಮಂಟಪದಲ್ಲಿ ಜ.5ರ ವರೆಗೆ ನಡೆಯುವ ಬಸವ ಪುರಾಣ ಹಿನ್ನೆಲೆಯಲ್ಲಿ ಶಂಕರಾಜೇಂದ್ರ ಶ್ರೀಗಳ ನೇತೃತ್ವದಲ್ಲಿ ವಿವಿಧ ಮಠಾಧೀಶರು ಪಾದಯಾತ್ರೆ ಕೈಗೊಂಡಿದ್ದು ಜನತೆಗೆ ದುರಾಚಾರ ಹಾಗೂ ದುಶ್ಚಟಗಳನ್ನು ತಮ್ಮ ಜೋಳಿಗೆಗೆ ಹಾಕಲು ತಿಳಿಸಿದ್ದಾರೆ.

ಮೊದಲ ದಿನ ಪಟ್ಟಣದ ಗಣೇಶ ದೇವಸ್ಥಾನದಿಂದ ಶ್ರೀಗಳ ಪಾದಯಾತ್ರೆ ಆರಂಭಗೊಂಡು ವಿವಿಧ ವಾರ್ಡ್‌ಗಳಲ್ಲಿ ಸಂಚರಿಸಿತು.

ಪಾದಯಾತ್ರೆ ಮಾರ್ಗದಲ್ಲಿ ರಸ್ತೆಯನ್ನು ತಳಿರು ತೋರಣದಿಂದ ಶೃಂಗರಿಸಿ, ರಂಗೋಲಿ ಬಿಡಿಸಲಾಗಿತ್ತು. ಈ ಯಾತ್ರೆಯಲ್ಲಿ ಎಲ್ಲ ಸಮುದಾಯದವರು ಭಾಗವಹಿಸುತ್ತಿದ್ದು, ಸಮಾಜದಲ್ಲಿ ಶಾಂತಿ ಸೌಹಾರ್ದತೆಯ ವಾತವರಣ ನಿರ್ಮಾಣವಾಗುತ್ತಿದೆ.