ಅಪೂರ್ವ ಜೀವಸಂಕುಲ ತಾಣ: ಕಂದೇಗಾಲ, ಮೊಳ್ಳಯ್ಯನಹುಂಡಿ, ಶಿಂಡನಪುರ ಕಗ್ಗಳದಹುಂಡಿ ನಡುವೆ ಇರುವ ಒಂಟಿಗುಡ್ಡ ಅಪೂರ್ವ ಜೀವಸಂಕುಲವನ್ನು ಹೊಂದಿದೆ. ಹಿಂದಿನಿಂದಲೂ ಸುತ್ತಮುತ್ತಲ ಗ್ರಾಮಗಳ ಜಾನುವಾರುಗಳಿಗೆ ಸಮೃದ್ಧ ಮೇವು ನೀಡುತ್ತಿರುವ ಗುಡ್ಡದ ಪೊಟರೆ ಹಾಗೂ ಬಂಡೆಗಳಲ್ಲಿ ನೂರಾರು ಸಂಖ್ಯೆಯ ಜೇನುಗೂಡುಗಳಿದ್ದು ಸೂರ್ಯಕಾಂತಿ ಮುಂತಾದ ಬೆಳೆಗಳಿಗೆ ಪರಾಗಸ್ಪರ್ಶ ಮಾಡುವ ಮೂಲಕ ರೈತರು ಬೆಳೆದ ಬೆಳೆಗಳ ಇಳುವರಿ ಹೆಚ್ಚಳಕ್ಕೆ ಸಹಾಯಕವಾಗಿವೆ. ಹಿಮವದ್ ಗೋಪಾಲಸ್ವಾಮಿ ಬೆಟ್ಟದಲ್ಲಿ ಕಂಡುಬರುವ ಆನೆಹುಲ್ಲು ಹಾಗೂ ಗುಲಗಂಜಿ ಮುಂತಾದ ಸಸ್ಯ ಸಂಕುಲಗಳು, ಪುನಗುಬೆಕ್ಕು, ಕಾಡುಬೆಕ್ಕು, ನವಿಲುಗಳು ಮುಂತಾದ ಜೀವಸಂಕುಲಗಳಿವೆ. ಬೇಸಿಗೆಯಲ್ಲೂ ಗುಡ್ಡದ ನೆತ್ತಿಯ ಮೇಲೆ ನೀರು ದೊರಕುತ್ತಿದ್ದ ಪರಿಣಾಮ ವನ್ಯಜೀವಿಗಳು ನಾಡಿನತ್ತ ಬರದೆ ಅಲ್ಲಿಯೇ ನೆಲೆಸಿದ್ದವು.
