ಗೌಳಿಗರ ಪ್ರಾಣಿ ಪ್ರೀತಿ ಅನುಕರಣೀಯ - ಧನಂಜಯ ಜಾಧವ್

ಬೆಳಗಾವಿ: ಇಲ್ಲಿನ ಕುವೆಂಪು ನಗರದಲ್ಲಿ ಭಾನುವಾರ ಸ್ವಯಂಭು ಗೌಳಿ ಸಮಾಜದಿಂದ ಪ್ರತಿವರ್ಷದಂತೆ ಈ ಬಾರಿಯೂ ಎಮ್ಮೆಗಳ ಓಟದ ಸ್ಪರ್ಧೆ ಏರ್ಪಡಿಸಲಾಗಿತ್ತು. ಗೌಳಿಗರ ನೂರಾರು ಎಮ್ಮೆಗಳು ಪಾಲ್ಗೊಂಡಿದ್ದವು.

ಸ್ಪರ್ಧೆಗೆ ಚಾಲನೆ ನೀಡಿದ ಬೆಳಗಾವಿ ತಾಲೂಕು ಬಿಜೆಪಿ ಗ್ರಾಮೀಣ ಘಟಕದ ಅಧ್ಯಕ್ಷ ಧನಂಜಯ ಜಾಧವ್ ಮಾತನಾಡಿ, ಎಮ್ಮೆಗಳ ಓಟದ ಸ್ಪರ್ಧೆಯೂ ಗೌಳಿ ಸಮಾಜದೊಂದಿಗೆ ಸಮ್ಮಿಳಿತಗೊಂಡಿದೆ. ಅಲ್ಲದೆ, ಎಮ್ಮೆಗಳ ಈ ಸ್ಪರ್ಧೆಗೆ ನೂರಾರು ವರ್ಷಗಳ ಇತಿಹಾಸ ಇದೆ. ಈ ಪರಂಪರೆ ಮನೋರಂಜನೆಯ ಜತೆಗೆ ಪ್ರಾಣಿ ಪ್ರೀತಿಗೂ ಸಹ ಸಾಕ್ಷಿಯಾಗಿದ್ದು, ಇದು ಅನುಕರಣೀಯ ಎಂದರು.

ಎಮ್ಮೆಗಳ ಓಟದ ಸ್ಪರ್ಧೆ ಪ್ರೇಕ್ಷಕರನ್ನು ರಂಜಿಸಿತು. ಸಮಾಜ ಸೇವಕ ಪೃಥ್ವಿ ಸಿಂಗ್, ಮಲ್ಲೇಶ ಚೌಗಲೆ, ಪ್ರವೀಣ ಪಾಟೀಲ, ಬಾಳು ಪಾಟೀಲ ಇತರರು ಉಪಸ್ಥಿತರಿದ್ದರು.