ಸ್ಥಾಯಿ ಸಮಿತಿ ಅಧ್ಯಕ್ಷರ ವಿರುದ್ಧ ಮುನಿಸು

ದೊಡ್ಡಬಳ್ಳಾಪುರ : ನಗರಸಭೆ ಸ್ಥಾಯಿ ಸಮಿತಿ ಅಧ್ಯಕ್ಷ ವಿ.ಎಸ್​.ರವಿಕುಮಾರ್​ ವಿರುದ್ಧ ಸದಸ್ಯರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಮಂಗಳವಾರ ನಗರಸಭೆಯಲ್ಲಿ ವಿ.ಎಸ್​ ರವಿಕುಮಾರ್​ ಅಧ್ಯಕ್ಷತೆಯಲ್ಲಿ ನಡೆಯಬೇಕಿದ್ದ ಸಭೆಗೆ 11 ಸದಸ್ಯರಲ್ಲಿ ಕೇವಲ ಇಬ್ಬರು ಜೆಡಿಎಸ್​ ಸದಸ್ಯರು ಹಾಜರಾಗಿದ್ದರು. ಉಳಿದ ಕಾಂಗ್ರೆಸ್​ ಮತ್ತು ಬಿಜೆಪಿ ಸದಸ್ಯರು ಗೈರಾಗುವ ಮೂಲಕ ಸ್ಥಾಯಿ ಸಮಿತಿ ಅಧ್ಯಕ್ಷರ ಸರ್ವಾಧಿಕಾರಿ ಧೋರಣೆ ಖಂಡಿಸಿದ್ದಾರೆ ಎನ್ನಲಾಗಿದೆ. ಸಭೆಯಲ್ಲಿ ಹಾಜರಿದ್ದ ಪೌರಾಯುಕ್ತ ಕಾರ್ತಿಕೇಶ್ವರ, ನಗರಸಭೆ ಅಧ್ಯೆ ಸುಮಿತ್ರಾ, ಉಪಾಧ್ಯಕ್ಷ ಮಲ್ಲೇಶ್​ ಸೇರಿ ಅಧಿಕಾರಿಗಳು 1 ಗಂಟೆಗೂ ಹೆಚ್ಚು ಸದಸ್ಯರ ಆಗಮನಕ್ಕೆ ಕಾದು ಬಳಿಕ ಸಭೆ ಮುಂದೂಡಿದ್ದಾರೆ.

ಸರ್ವಾಧಿಕಾರಿ ಧೋರಣೆ: ಅಧ್ಯಕ್ಷ ರವಿಕುಮಾರ್​ ಸರ್ವಾಧಿಕಾರಿ ಧೋರಣೆ ಅನುಸರಿಸುತ್ತಾರೆ. ಕೆಲಸ ಹಂಚಿಕೆಯಲ್ಲಿಯೂ ತಾರತಮ್ಯ ಮಾಡುತ್ತಿದ್ದಾರೆ. ಸಣ್ಣಪುಟ್ಟ ವಿಚಾರದಲ್ಲಿಯೂ ಆಕ್ಷೇಪಣೆ ಹೇಳಿ ಕಾಲಹರಣ ಮಾಡುವುದಲ್ಲದೇ ಸುಖಾಸುಮ್ಮನೆ ವಾರ್ಡ್​ ಕೆಲಸಗಳನ್ನು ನಿಧಾನ ಮಾಡುತ್ತಾರೆ. ಸೌಜನ್ಯಕ್ಕೂ ಸಮಿತಿಯ ಸದಸ್ಯರನ್ನು ಮಾತನಾಡಿಸುವುದಿಲ್ಲ. ಅವರೇ ಎಲ್ಲವನ್ನೂ ತೀರ್ಮಾನಿಸುತ್ತಾರೆ. ಪ್ರಶ್ನಿಸಿದರೆ ಉತ್ತರ ಕೊಡುವುದಿಲ್ಲ. ಇಂತಹ ಸರ್ವಾಧಿಕಾರಿ ಧೋರಣೆ ಖಂಡಿಸಿ ನಾವು ಇಂದಿನ ಸಭೆಗೆ ಗೈರಾಗಿದ್ದೇವೆ ಎಂದು ಸ್ಥಾಯಿ ಸಮಿತಿ ಸದಸ್ಯ ಪದ್ಮನಾಭ ವಿಜಯವಾಣಿಗೆ ತಿಳಿಸಿದರು.