ನಗರದ ಉಣಕಲ್ನಿಂದ ಗಬ್ಬೂರು ಕ್ರಾಸ್ವರೆಗಿನ (9.25 ಕಿಮೀ) ಗ್ರೀನ್ ಕಾರಿಡಾರ್ ಕಾಮಗಾರಿ ಆರಂಭಿಸಲಾಗಿದೆ. ಮೊದಲ ಹಂತದ 640 ಮೀಟರ್ ಪ್ರಾಯೋಗಿಕ ಕಾಮಗಾರಿ ಪೂರ್ಣಗೊಂಡಿದ್ದು, ಎರಡನೇ ಹಂತದ ಕಾಮಗಾರಿ ಇನ್ನೆರಡು ತಿಂಗಳಲ್ಲಿ ಮುಗಿಯುವ ಲಕ್ಷಣಗಳು ಕಂಡಬರುತ್ತಿವೆ. ಇದರ ಮಧ್ಯೆ ಪೂರ್ಣಗೊಂಡ ಗ್ರೀನ್ ಕಾರಿಡಾರ್ನಲ್ಲಿ ಕಸ, ಹಸಿರು ಸಸ್ಯಗಳು ಬೆಳೆದು ದುರ್ನಾತ ಬೀರಲಾರಂಭಿಸಿದೆ.
ರಾಜಕಾಲುವೆ ಗ್ರೀನ್ ಕಾರಿಡಾರ್ನಲ್ಲಿ ವಾಣಿಜ್ಯ ನಗರಿಯ ಕೊಳಚೆ ನೀರು ಹರಿದು ಬರುತ್ತಿದೆ. ರಾಜಕಾಲುವೆಯ ಎರಡೂ ಬದಿ ಕಲ್ಲುಗೋಡೆ ಕಟ್ಟಲಾಗಿದೆ. ಮಧ್ಯೆ ಬಿದ್ದಿದ್ದ ಮಣ್ಣು ಸಾಗಿಸಿ ಸಿಮೆಂಟ್ ನೆಲಹಾಸು ಮಾಡಲಾಗಿದೆ. ಉಣಕಲ್ ಕೆರೆಯಿಂದ ಹನುಮಂತ ನಗರದ ಮಾರ್ಗವಾಗಿ ಮುಂದೆ ಹೋಗುವ ಗ್ರೀನ್ ಕಾರಿಡಾರ್ ತುಂಬೆಲ್ಲ ತ್ಯಾಜ್ಯ, ಸಸಿಗಳು ಬೆಳೆದು ನಿಂತಿವೆ. ನಿರ್ವಹಣೆ ಇನ್ನೂ ಸ್ಮಾರ್ಟ್ ಸಿಟಿ ಕಂಪನಿ ಕೈಯಲ್ಲಿದೆ. ಆದರೆ, ಅನಧಿಕೃತ ನಾಲಾದಿಂದ ಹರಿದು ಬರುವ ಚರಂಡಿ ನೀರು, ಮಾಡಿರುವ ಕಾಮಗಾರಿಯ ಅಂದಕೆಡಿಸುತ್ತಿದೆ.
