ಮೂಡುಗೊಪ್ಪ ಗ್ರಾಪಂ ಆವರಣದಲ್ಲಿ ಶುದ್ಧ ನೀರಿನ ಘಟಕ ನಿರ್ಮಿಸಲಾಗಿದೆ. ಆದರೆ ಈವರೆಗೂ ಘಟಕ ಆರಂಭಗೊಂಡಿಲ್ಲ. ಆದಾಗ್ಯೂ ಘಟಕದ ಮೇಲ್ವಿಚಾರಕರು ಬಂದು ಫೋಟೋ ತೆಗೆದು ಉತ್ತಮವಾಗಿದೆ ಎಂದು ಸುಳ್ಳು ಮಾಹಿತಿಯನ್ನು ಮೇಲಧಿಕಾರಿಗಳಿಗೆ ನೀಡುತ್ತಿದ್ದರು. ಶುಕ್ರವಾರ ಮೇಲ್ವಿಚಾರಕ ವಿಶಾಲ್ ಬರುತ್ತಿದ್ದಂತೆ ಮೂಡುಗೊಪ್ಪ ಅಧ್ಯಕ್ಷ ಕರುಣಾಕರಶೆಟ್ಟಿ ಸೇರಿದಂತೆ ಸ್ಥಳೀಯರು ತರಾಟೆ ತೆಗೆದುಕೊಂಡರು. ಉತ್ತಮವಾಗಿದೆ ಎಂದು ವರದಿ ನೀಡುವುದಲ್ಲ, ನೀರು ಬರಬೇಕು. ವ್ಯತ್ಯಾಸವಾದರೆ ಗ್ರಾಪಂನನ್ನು ಹೊಣೆ ಮಾಡಲಾಗುತ್ತದೆ. ಇದಕ್ಕೆ ಯಾರು ಹೊಣೆ ಎಂದು ಕರುಣಾಕರ ಶೆಟ್ಟಿ ಆಕ್ರೋಶ ವ್ಯಕ್ತಪಡಿಸಿದರು. ಘಟಕದಿಂದ ಕೂಡಲೆ ನೀರು ಹರಿಸಿ ತೋರಿಸಿ ಎಂದು ಪಟ್ಟು ಹಿಡಿದರು. ಸ್ಥಳಕ್ಕಾಗಮಿಸಿದ ಪೊಲೀಸರು, ಸಮಸ್ಯೆ ಕುರಿತು ಘಟಕದ ನಿರ್ವಹಣಾಧಿಕಾರಿಗಳಿಗೆ ಕರೆ ಮಾಡಿ ಮಾಹಿತಿ ನೀಡಿದರು. ಭಾನುವಾರ ಘಟಕವನ್ನು ದುರಸ್ತಿಗೊಳಿಸುವುದಾಗಿ ನಿರ್ವಹಣಾಧಿಕಾರಿ ಭರವಸೆ ನೀಡಿದ ಬಳಿಕ ಸ್ಥಳೀಯರು ತಣ್ಣಗಾದರು.
ಗ್ರಾಪಂ ಸದಸ್ಯ ಅರುಣ ಬೈಸೆ, ಪಿಡಿಒ ರಾಮಚಂದ್ರ, ಎಎಸ್ಐ ಶ್ರೀಪಾದ್, ಪೇದೆ ವೆಂಕಟೇಶ್, ಪ್ರಮುಖರಾದ ದೇವು ನಗರ, ಜುಡೋ ರವಿ, ಕಿಶೋರ್ ನಗರ ಇತರರಿದ್ದರು.
