ಸಂಸದರ ತವರಲ್ಲೇ ಶಿಥಿಲಾವಸ್ಥೆಯಲ್ಲಿ ಸರ್ಕಾರಿ ಶಾಲೆ

ಕುಂಬಾರಹಳ್ಳಿ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆ ದುರವಸ್ಥೆ

ಕೋಲಾರ: ಲೋಕಸಭಾ ಸದಸ್ಯ ಎಂ.ಮಲ್ಲೇಶ್​ಬಾಬು ತವರೂರು ಕುಂಬಾರಹಳ್ಳಿ ಗ್ರಾಮದ ಸರ್ಕಾರಿ ಕಿರಿಯ ಪ್ರಾಥಮಿಕ ಶಾಲೆಯ ಕಟ್ಟಡ ಶಿಥಿಲಗೊಂಡಿದ್ದು, ಕಟ್ಟಡವನ್ನು ದುರಸ್ತಿಗೊಳಿಸಿ, ಕಾಂಪೌಂಡ್​ ನಿರ್ಮಿಸುವಂತೆ ಆಗ್ರಹಿಸಿ ಗ್ರಾಮಸ್ಥರು ಮಂಗಳವಾರ ಸಂಬಂಧಿಸಿದ ಗ್ರಾಮ ಪಂಚಾಯತಿ ಅಧಿಕಾರಿಗಳನ್ನು ಆಗ್ರಹಿಸುತ್ತಿದ್ದಾರೆ.

ಕುಂಬಾರಹಳ್ಳಿ ಶಾಲೆಯಲ್ಲಿ ಸುಮಾರು 30 ಮಕ್ಕಳು ಕಲಿಯುತ್ತಿದ್ದು, ಶಾಲಾ ಕಟ್ಟಡ ತೀರಾ ಹಳೆಯದಾಗಿದೆ. ಮಳೆ ಬಂದರೆ ನೀರು ಒಳಗೆ ಬರುತ್ತದೆ. ಕಟ್ಟಡವನ್ನು ದುರಸ್ತಿಗೊಳಿಸುವಂತೆ ಸಾಕಷ್ಟು ಬಾರಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಲಿಲ್ಲ. ಈ ಮಧ್ಯೆ ಶಾಲೆಗೆ ಕಲ್ಲಿನ ಕಾಂಪೌಂಡ್​ ಸದೃಢವಾಗಿದ್ದರೂ ಕೆಲವರು ಗೋಡೆಯನ್ನು ಕೆಡವಿ, ಮರು ನಿರ್ಮಾಣಕ್ಕೆ ಮುಂದಾಗಿದ್ದಾರೆ. ಆದರೆ ಮಕ್ಕಳ ಸುರಕ್ಷತೆ ದೃಷ್ಟಿಯಿಂದ ಹಳೇ ಕಟ್ಟಡವನ್ನು ದುರಸ್ತಿಗೊಳಿಸಿ, ಕಾಂಪೌಂಡ್​ ನಿರ್ಮಿಸಬೇಕು ಎಂದು ಗ್ರಾಮದ ಬಿ.ಎನ್​.ಅನಂತಕುಮಾರ್​, ವೆಂಕಟೇಶಪ್ಪ, ನಾರಾಯಣಸ್ವಾಮಿ, ಚಂಗಮ್ಮ ವೆಂಕಟೇಶಪ್ಪ, ಕೆ.ಎಚ್​.ಮಂಜುನಾಥ, ನಾರಾಯಣಮ್ಮ, ರತ್ನಮ್ಮ, ಸೊಣ್ಣಪ್ಪ, ನಾಗರಾಜ, ಅಭಿಲಾಷ, ಅರುಣ್​, ನವೀನ್​, ಹರೀಶ್​, ಕೆ.ಏನ್​.ಗಂಗಾಧರ್​, ರವಿ, ಕುಮಾರ್​, ಪೆದ್ದಣ್ಣ, ಗೊಂದೋಡಿಪಲ್ಲಿ ವೆಂಕಟೇಶಪ್ಪ ಒತ್ತಾಯಿಸುತ್ತಿದ್ದಾರೆ.