ತಂದೆ ಸಾಗುವಳಿ ಮಾಡುತ್ತಿದ್ದ ಜಮೀನಿನಲ್ಲಿ ಸಹೋದರರಿಗೆಲ್ಲ ಭೂಮಿ ಹಂಚಿಕೆಯಾದಾಗ ಮಹಾಗುಂಡಪ್ಪ ಪಾಲಿಗೆ ಬಂದಿದ್ದು ಒಂದು ಎಕರೆ 25 ಗುಂಟೆಯ ಗುಡ್ಡ. ಇಲ್ಲೇ ಏನಾದರೂ ಸಾಧಿಸಬೇಕು ಎಂಬ ಛಲದಿಂದ ಒಂದೊಂದೆ ಕಲ್ಲು ಬಂಡೆ ಒಡೆದು ಪುಡಿ ಮಾಡಿ ಹಸನು ಮಾಡಿಕೊಂಡು ಒಂದು ಎಕರೆಯಲ್ಲಿ ಕೃಷಿ ಕಾಯಕ ಆರಂಭಿಸಿದರು. ಈ ಒಂದು ದಶಕದ ಅವಧಿಯಲ್ಲಿ ಆ ಕಲ್ಲಿನ ಜಾಗ ಹೂವಾಗಿ ಅರಳಿದೆ. ಗುಡ್ಡದಲ್ಲಿ ಇರುವುದರಿಂದ ಜಮೀನಿಗೆ ಎತ್ತಿನ ಬಂಡಿ, ವಾಹನಗಳು ಬರಲ್ಲ. ಹೀಗಾಗಿ ತಾವೇ ಸ್ವತಃ ಇಂಜನಿಯರ್, ವಿಜ್ಞಾನಿಯಾದರು. ಒಂದು ಸೈಕಲ್ ತಯಾರು ಮಾಡಿಕೊಂಡು ಅದಕ್ಕೆ ಮಡಿಕೆ, ಕುಂಟಿ, ಕೂರಗಿ, ಗುರದಾಳು, ಎಡೆಹೊಡೆಯುವ ಕುಂಟಿ ಹೀಗೆ ಎಲ್ಲ ಸಾಮಗ್ರಿಗಳನ್ನು ತಯಾರು ಮಾಡಿಕೊಂಡು, ಆ ಮೂಲಕ ಕೃಷಿ ಚಟುವಟಿಕೆ ಮಾಡುತ್ತಿರುವುದು ವಿಶೇಷ.
