ಕೆ.ಎನ್​.ರಾಜಣ್ಣನಿಗೆ ಸಚಿವ ಸ್ಥಾನ ನೀಡಿ

ಜಾತ್ಯಾತಿತ ಯುವ ವೇದಿಕೆ ಜಿಲ್ಲಾಧ್ಯಕ್ಷ ಡ್ಯಾಗೇರಹಳ್ಳಿ ಹೇಳಿಕೆ

ಶಿರಾ: ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಬೆಂಬಲಿಗರಾಗಿದ್ದ ಅಹಿಂದ ನಾಯಕ ಕೆ.ಎನ್​.ರಾಜಣ್ಣ ಅವರ ಅಧಿಕಾರವನ್ನು ಕಿತ್ತುಕೊಳ್ಳಲು ಬಲಿಷ್ಠ ಸಮುದಾಯಗಳು ರೂಪಿಸಿದ ಸಂಚಿನ ವಿರುದ್ಧ ಅ.21ರಂದು ಬೃಹತ್​ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ ಎಂದು ಜಾತ್ಯಾತಿತ ಯುವ ವೇದಿಕೆ ಜಿಲ್ಲಾಧ್ಯಕ್ಷ ಡ್ಯಾಗೇರಹಳ್ಳಿ ತಿಳಿಸಿದರು.

ಶಿರಾ ನಗರದ ಪ್ರವಾಸಿ ಮಂದಿರದಲ್ಲಿ ಶುಕ್ರವಾರ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ, ಕಾಂಗ್ರೆಸ್​ ಅನ್ನು ಹಲವು ವರ್ಷಗಳಿಂದ ಅಹಿಂದ ಸಮುದಾಯ ಬೇಷರತ್​ ಆಗಿ ಬೆಂಬಲಿಸಿದ್ದೇವೆ. ಕಾಂಗ್ರೆಸ್​ ಅಧಿಕಾರಕ್ಕೆ ಬರಲು ನಮ್ಮ ಪಾಲಿದೆ. ಕೆ.ಎನ್​.ರಾಜಣ್ಣ ಅವರಿಗೆ ಸಮಯಾವಕಾಶ ಕೊಡದೆ ವಜಾ ಮಾಡಿದ್ದಾರೆ. ಇದರ ವಿರುದ್ಧ ಶಿರಾ ನಗರದ ಅಂಬೇಡ್ಕರ್​ ವೃತ್ತದಲ್ಲಿ ಮಂಗಳವಾರ ಬೆಳಗ್ಗೆ 10 ಗಂಟೆಗೆ ಬೃಹತ್​ ಪ್ರತಿಭಟನೆ ಹಮ್ಮಿಕೊಳ್ಳಲಾಗಿದೆ ಎಂದರು.

ಡಿಎಸ್​ಎಸ್​ ಅಂಬೇಡ್ಕರ್​ ವಾದ ಸಂಘಟನೆಯ ಜಿಲ್ಲಾ ಸಂಚಾಲಕ ಮುರುಳಿ ಕುಂದೂರು ಮಾತನಾಡಿ, ಜಿಲ್ಲೆ ಅಹಿಂದ ವರ್ಗದ ನಾಯಕ ರಾಜಣ್ಣ ಅವರನ್ನು ಕಾಂಗ್ರೆಸ್​ ಸರ್ಕಾರ ಕ್ಷುಲಕ ಕಾರಣಕ್ಕೆ ಸಚಿವ ಸ್ಥಾನದಿಂದ ವಜಾ ಮಾಡಿದೆ. ಅವರಿಗೆ ಈ ಕೂಡಲೇ ಸಚಿವ ಸ್ಥಾನ ನೀಡಬೇಕು ಎಂದು ಆಗ್ರಹಿಸಿದರು.

ಮುಖಂಡ ಹುಳಿಗೆರೆ ಡಾ.ಗುಡ್ಡಣ್ಣ ಮಾತನಾಡಿದರು. ವಾಲ್ಮೀಕಿ ಸೇನೆ ಜಿಲ್ಲಾಧ್ಯಕ್ಷ ಕಪ್ಪೂರು ಶ್ರೀಧರ್​, ಮುಖಂಡರಾದ ಕೊಟ್ಟ ರಾಜಣ್ಣ, ದೊಡ್ಡಗೂಳ ಪರುಷಣ್ಣ, ಶ್ರೀನಿವಾಸ್​, ಬಸವರಾಜು, ಗೋವಿಂದಪ್ಪ, ಅನಂತರಾಮು, ಸತೀಶ್​ ನಾಯಕ, ಎಸ್​.ರಂಗಪ್ಪ, ಮಂಜುನಾಥ, ರವೀಂದ್ರ ಪಾಳೇಗಾರ, ಅಭಿಷೇಕ್​ ಸೇರಿದಂತೆ ಹಲವರು ಇದ್ದರು.