ಹೊಸಕೋಟೆ ತಾಲೂಕು ನಂದಗುಡಿ ಗ್ರಾಪಂ ವ್ಯಾಪ್ತಿಯ ಗಿಡ್ಡನಹಳ್ಳಿ ರಸ್ತೆ ದಾರುಣವಾಗಿದ್ದು, ಮಣ್ಣಿನ ರಸ್ತೆಯಲ್ಲಿನ ಏರು ತಗ್ಗು, ಹೊಂಡ- ಗುಂಡಿಯ ಕೆಸರಿನಲ್ಲಿ ಓಡಾಡುವಂತಾಗಿದೆ. ನೂರಕ್ಕೂ ಹೆಚ್ಚು ಮನೆಗಳಿರುವ ಇಲ್ಲಿ ಎಸ್ಸಿ, ಎಸ್ಟಿ ಮತ್ತು ಗೊಲ್ಲ ಜನಾಂಗದವರೇ ಹೆಚ್ಚಿದ್ದಾರೆ. ಸುಮಾರು 300 ರಿಂದ 400 ಜನಸಂಖ್ಯೆ ಈ ಹಳ್ಳಿಯಲ್ಲಿದೆ. ಹೈನುಗಾರಿಕೆ ಕಸುಬನ್ನಾಗಿಸಿಕೊಂಡಿರುವ ಇಲ್ಲಿನ ಜನರು ಬೆಳಗ್ಗೆ ಎದ್ದರೆ ಬಹುತೇಕರು ಕೂಲಿ ಕೆಲಸಗಳಿಗೆ ತೆರಳುತ್ತಾರೆ. ಪ್ರತಿದಿನ ಶಾಲಾ ಮಕ್ಕಳು, ಕಾರ್ಖಾನೆಗೆ ಹೋಗುವ, ನಿತ್ಯ ಕೆಲಸ ಕಾರ್ಯಗಳಿಗೆ ತೆರಳುವವರು ನಂದಗುಡಿ ಮತ್ತು ಬೈಲನರಸಾಪುರ ಮುಖ್ಯರಸ್ತೆ ತಲುಪಬೇಕೆಂದರೆ ಈ ಕಚ್ಚಾ ರಸ್ತೆಯಲ್ಲೇ ಸಾಗಬೇಕು. ಶಾಲಾ ವಾಹನ, ತರಕಾರಿ ವಾಹನಗಳು ಇಲ್ಲೇ ಸಾಗಬೇಕು. ಗ್ರಾಮ ದೇವತೆಗಳ ದೇವಸ್ಥಾನಗಳಾದ ಕಾಟೇರಮ್ಮ, ವೀರಾಂಜನೇಯ, ಶನೈಶ್ಚರ, ಮುನೇಶ್ವರ ದೇಗುಲಗಳಿಗೆ ಭೇಟಿ ನೀಡುವವರು ಈ ಅಧ್ವಾನಗೊಂಡ ರಸ್ತೆಯಲ್ಲೇ ನಿತ್ಯ ಸಂಚಾರಿಸುವ ಅನಿವಾರ್ಯ ಎದುರಾಗಿದೆ.
