ಉಡುಪಿ: ತಂಪು ಪಾನೀಯ ಕುಡಿದು ಎಲ್ಲೆಂದರಲ್ಲಿ ಬಾಟ್ಲಿ ಎಸೆಯುವ ಜಾಯಮಾನ ಹೊಂದಿರುವವರ ಮಧ್ಯೆ ಮಲ್ಪೆಯ ಕಿದಿಯೂರು ಗ್ರಾಮದ ದಂಪತಿ ಪ್ಲಾಸ್ಟಿಕ್ ಬಾಟಲ್ ಮರುಬಳಕೆಗೆ ಉತ್ತೇಜನ ನೀಡುವ ನಿಟ್ಟಿನಲ್ಲಿ ಮನೆಯ ಆವರಣದಲ್ಲಿ ಪಾನೀಯ ಬಾಟಲಿಗಳಿಗೂ ಹಸಿರು ಸ್ಪರ್ಶ ನೀಡಿದ್ದಾರೆ. ಅಪರ ಜಿಲ್ಲಾಧಿಕಾರಿ ಆಪ್ತ ಕಾರ್ಯದರ್ಶಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಯತೀಶ್ ಹಾಗೂ ಸರ್ಕಾರಿ ಶಾಲೆ ಶಿಕ್ಷಕಿ ಅಶ್ವಿತಾ ದಂಪತಿ ಮನೆಯಲ್ಲಿ ಬಳಸಿದ ತಂಪು ಪಾನೀಯಗಳ ಬಾಟಲಿಗಳನ್ನು ಆಕರ್ಷಕವಾಗಿ ಕತ್ತರಿಸಿ ಆಲಂಕಾರಿಕ, ಹೂವಿನ ಗಿಡ, ಗಿಡ ಮೂಲಿಕೆ, ಆಯ್ದ ತರಕಾರಿ ಗಿಡಗಳನ್ನು ಬೆಳೆಸುವ ಪಾತ್ರೆಗಳಾಗಿ ಪರಿವರ್ತಿಸಿದ್ದಾರೆ. 50ಕ್ಕೂ ಅಧಿಕ ಬಾಟಲಿಗಳಲ್ಲಿ 30 ಬಗೆಯ ಗಿಡಗಳನ್ನು ಬೆಳೆಸಿದ್ದಾರೆ. ಇದರಿಂದ ಮನೆ ಆವರಣ ಅಂದವಾಗಿ ಕಾಣುತ್ತಿದ್ದು, ಪರಿಸರ ಕಾಳಜಿಗೂ ಪೂರಕವಾಗಿದೆ.
