ರಟ್ಟಿಹಳ್ಳಿ ಸರ್ಕಾರಿ ಶಾಲೆ ಆವರಣದಲ್ಲಿ ತ್ಯಾಜ್ಯ ಸಂಗ್ರಹ, ಮಕ್ಕಳ ಪಾಠ, ಪ್ರವಚನಕ್ಕೆ ತೊಂದರೆ

ರಟ್ಟಿಹಳ್ಳಿ: ಪಟ್ಟಣದ ಸರ್ಕಾರಿ ಗಂಡು ಮತ್ತು ಹೆಣ್ಣು ಮಕ್ಕಳ ಶಾಲೆಯ ಮೈದಾನದ ಸುತ್ತಲಿರುವ ಗಟಾರವು ಪಟ್ಟಣದ ವಿವಿಧೆಡೆಯ ತ್ಯಾಜ್ಯ ಬಂದು ಸೇರುವ ಕಾಲುವೆಯಂತಾಗಿದ್ದು, ಸುತ್ತಲಿನ ಪ್ರದೇಶವೆಲ್ಲ ದುರ್ವಾಸನೆಯಿಂದ ಕೂಡಿದೆ.

ಗಟಾರದ ಮೇಲೆ ಶಾಲೆಯ ಕೊಠಡಿ ನಿರ್ವಣವಾಗಿರುವುದರಿಂದ ಗಟಾರ ತುಂಬಿದರೆ ಒಂದು ಬದಿಯ ತ್ಯಾಜ್ಯವೆಲ್ಲ ಬಂದು ಶಾಲಾ ಆವರಣದಲ್ಲಿ ಶೇಖರಣೆಯಾಗುತ್ತದೆ. ಮತ್ತೊಂದು ಬದಿಯ ತ್ಯಾಜ್ಯ ಖೋಖೋ ಆಟದ ಮೈದಾನವನ್ನು ಆವರಿಸಿಕೊಂಡು ಮಕ್ಕಳು ಆಟವಾಡಲು ಬಾರದಂತ ಸ್ಥಿತಿ ನಿರ್ವಣವಾಗಿದೆ.

ಪಟ್ಟಣದಲ್ಲಿರುವ ಸರ್ಕಾರಿ ಮಾದರಿ ಕನ್ನಡ ಗಂಡು ಮತ್ತು ಹೆಣ್ಣು ಮಕ್ಕಳ ಶಾಲೆಗಾಗಿ ಸುಸಜ್ಜಿತವಾದ ಆಟದ ಮೈದಾನ ಇದೆ. ತಾಲೂಕಿನ ವಿವಿಧ ಶಾಲಾ ಮಟ್ಟದ ಕ್ರೀಡಾಕೂಟಗಳು ಈ ಮೈದಾನದಲ್ಲಿಯೇ ನಡೆಯುತ್ತವೆ. ಶಾಲೆಯ ಒಂದು ಬದಿಯಲ್ಲಿ ಸರ್ಕಾರಿ ಹಿರಿಯ ಪ್ರಾಥಮಿಕ ಹೆಣ್ಣು ಮಕ್ಕಳ ಶಾಲೆಗೆ ಕೆಆರ್​ಐಡಿಎಲ್ ವಿವೇಕ ಯೋಜನೆಯಡಿ 2022-23ನೇ ಸಾಲಿನಲ್ಲಿ 13.90 ಲಕ್ಷ ರೂ. ವೆಚ್ಚದಲ್ಲಿ ಒಂದು ಶಾಲೆಯ ಕೊಠಡಿಯನ್ನು ಮಂಜೂರು ಮಾಡಲಾಗಿದೆ. ಈಗಾಗಲೇ ಈ ಕೊಠಡಿ ನಿರ್ಮಾಣ ಹಂತದಲ್ಲಿದ್ದು, ಈ ಕೊಠಡಿಯನ್ನು ನಿರ್ಮಾಣ ಮಾಡುವ ವೇಳೆ ಗಟಾರದ ಮೇಲೆ ಕೊಠಡಿಯ ಕಾಮಗಾರಿ ಮಾಡಿರುವುದರಿಂದ ಗಟಾರ ಸಂಪೂರ್ಣವಾಗಿ ಮುಚ್ಚಿ ಹೋಗಿದೆ.

ದುರ್ವಾಸನೆ-ಸಾಂಕ್ರಾಮಿಕ ರೋಗದ ಭೀತಿ

2-3 ತಿಂಗಳಿಂದ ಕಾಮಗಾರಿ ಆರಂಭಿಸಲಾಗಿದ್ದು, ಗಟಾರ ಬ್ಲಾಕ್ ಆಗಿರುವುದರಿಂದ ಮೈದಾನದಲ್ಲಿ ನಿಂತ ತ್ಯಾಜ್ಯ ದುರ್ವಾಸನೆ ಬೀರುತ್ತಿದೆ. ಗಟಾರದ ಪಕ್ಕದಲ್ಲಿ ಶಾಲೆಯ ಕೊಠಡಿ ಇರುವುದರಿಂದ ಮಕ್ಕಳಿಗೂ ದುರ್ವಾಸನೆ ಬೀರುತ್ತಿದೆ. ಹಲವು ದಿನಗಳಿಂದ ಮೈದಾನದಲ್ಲಿ ಶೇಖರಣೆಯಾದ ತ್ಯಾಜ್ಯದಿಂದ ಸೊಳ್ಳೆಗಳ ಕಾಟವೂ ವಿಪರೀತವಾಗಿದ್ದು, ಸಾರ್ವಜನಿಕರಲ್ಲಿ ಸಾಂಕ್ರಾಮಿಕ ರೋಗ ಭೀತಿ ಶುರುವಾಗಿದೆ.

ಗಟಾರದ ಬದಿಯಲ್ಲಿ ಶಾಲೆಗೆ ಸಂಬಂಧಿಸಿದ ಬೋರ್​ವೆಲ್ ಇದೆ. ಈ ಬೋರ್​ವೆಲ್​ನಿಂದ ಎರಡು ಶಾಲೆಗೆ ಅಡುಗೆ ಮತ್ತು ಇತರ ಕೆಲಸಗಳಿಗೆ ನೀರನ್ನು ಬಳಸಲಾಗುತ್ತದೆ. ಪದೇಪದೆ ಈ ಆವರಣದಲ್ಲಿ ಹೋಗಿ ಬೋರ್​ವೆಲ್ ಆನ್, ಆಫ್ ಮಾಡಬೇಕಾಗಿದೆ. ಬೋರ್​ವೆಲ್ ಸಂಪರ್ಕಸುವ ಕೇಬಲ್ ಸಹ ಕಲುಷಿತ ನೀರಿನಲ್ಲಿದ್ದು, ಏನಾದರೂ ಅವಘಡ ಸಂಭವಿಸಿದರೆ ಯಾರು ಹೊಣೆ ? ಎಂದು ಪಾಲಕರು ಪ್ರಶ್ನಿಸುತ್ತಾರೆ.