ಗುಂಡ್ಲುಪೇಟೆ: ತಾಲೂಕಿನ ಮಡಹಳ್ಳಿ ಸಮೀಪದ ಗುಮ್ಮಕಲ್ಲುಗುಡ್ಡದ ಬಿಳಿಕಲ್ಲು ಕ್ವಾರಿಯಲ್ಲಿ ಶನಿವಾರ ಇಬ್ಬರ ಶವ ಪತ್ತೆಯಾಗಿದ್ದು, ಆ ಪೈಕಿ ಒಂದನ್ನು ಹೊರತೆಗೆಯಲಾಯಿತು. ಸ್ಥಳದಲ್ಲಿ ಮೂವರು ಮೃತಪಟ್ಟಿರುವ ಶಂಕೆ ವ್ಯಕ್ತವಾಗಿದೆ. ಶನಿವಾರ ಬೆಳಗ್ಗೆ 7 ಗಂಟೆಗೆ ಕಾರ್ಯಾಚರಣೆ ಆರಂಭಿಸಿದ ಎನ್ಡಿಆರ್ಎಫ್, ಎಸ್ಡಿಆರ್ಎಫ್, ಅಗ್ನಿಶಾಮಕದಳ ತಂಡ ಸತತ 8 ಗಂಟೆಗಳ ಬಳಿಕ ದೊಡ್ಡ ಬಂಡೆಯ ಕೆಳಗೆ ಸಿಲುಕಿದ್ದ ಜೆಸಿಬಿಯಿಂದ ಚಾಲಕ ಅಜ್ಜೀಮುಲ್ಲಾ(24) ಶವವನ್ನು ಹೊರತೆಗೆಯಿತು. ಸಮೀಪದಲ್ಲೇ ಮತ್ತೊಂದು ಮೃತದೇಹದ ಕಾಲು ಕಾಣಿಸುತ್ತಿದ್ದು, ಅದನ್ನು ಹೊರತೆಗೆಯಲು ಬಂಡೆ ಕೊರೆಯುವ ಕಾರ್ಯ ಮುಂದುವರಿದಿದೆ. ಶುಕ್ರವಾರ ಘಟನೆ ನಡೆದ ಗಳಿಗೆಯಿಂದ ಉತ್ತರಪ್ರದೇಶ ಮೂಲದ ಅಜೀಮುಲ್ಲಾ, ಸರ್ಫರಾಜ್(18), ಮೀರಾಜ್(28) ಕಣ್ಮರೆಯಾಗಿರುವ ಬಗ್ಗೆ ಅವರ ಸ್ನೇಹಿತರು ಪೊಲೀಸರಿಗೆ ಮಾಹಿತಿ ನೀಡಿದರು. ರಕ್ಷಣೆಯಾಗಿರುವ ಮೃತದೇಹವನ್ನು ಅಜೀಮುಲ್ಲಾ ಎಂದು ಗುರುತಿಸಿದ್ದಾರೆ. ಬಂಡೆ ಕೆಳಗೆ ಕಾಣಿಸಿರುವ ಮತ್ತೊಂದು ಶವವನ್ನು ಹೊರತೆಗೆದ ಬಳಿಕವಷ್ಟೇ ಯಾರದೆಂದು ತಿಳಿಯಲಿದೆ. ಉಳಿದ ಇನ್ನೊಬ್ಬನ ಪತ್ತೆಗೆ ಕಲ್ಲಿನ ರಾಶಿಯ ನಡುವೆ ರಕ್ಷಣಾ ತಂಡ ಹುಡುಕುತ್ತಿದೆ.
