ಬೆಳೆಹಾನಿ-ವಿಮೆ ಪರಿಹಾರ ನೀಡಿ

ಗಂಗಾವತಿ: ಭತ್ತದ ಬೆಳೆ ನಷ್ಟ ಮತ್ತು ಬೆಳೆ ವಿಮೆ ಪರಿಹಾರ ನೀಡುವಂತೆ ಒತ್ತಾಯಿಸಿ ರೈತ ಸಂಘ ಮತ್ತು ಹಸಿರು ಸೇನೆ ತಾಲೂಕು ಘಟಕದ ಸದಸ್ಯರು ನಗರದ ತಾಲೂಕಾಡಳಿತ ಸೌಧದ ಮುಂದೆ ಗುರುವಾರ ಪ್ರತಿಭಟನೆ ನಡೆಸಿ ತಹಸೀಲ್ದಾರ್ ಯು.ನಾಗರಾಜ್‌ಗೆ ಮನವಿ ಸಲ್ಲಿಸಿದರು.

ಸಂಘದ ರಾಜ್ಯ ಉಪಾಧ್ಯಕ್ಷ ಹನುಮಂತಪ್ಪ ಹೊಳೆಯಾಚೆ ಮಾತನಾಡಿ, ಹಿಂಗಾರು ಹಂಗಾಮಿನಲ್ಲಿ ಅಕಾಲಿಕ ಮಳೆಯಿಂದ ಮರಳಿ ಸೇರಿ ವಿವಿಧೆಡೆ ಭತ್ತದ ಬೆಳೆ ಹಾನಿಯಾಗಿದ್ದು, ರೈತರು ಸಂಕಷ್ಟಕ್ಕೊಳಗಾಗಿದ್ದಾರೆ. ಕೃಷಿ ಅಧಿಕಾರಿಗಳು ಜಿಪಿಎಸ್ ಮೂಲಕ ದಾಖಲೀಕರಿಸಿಕೊಂಡರೂ ಇದುವರೆ ಪರಿಹಾರ ಸಿಕ್ಕಿಲ್ಲ. ರೈತರು ಬೆಳೆ ವಿಮೆಗೆ ಕಂತು ಭರಿಸಿದ್ದರೂ ಸಂಬಂಧಪಟ್ಟ ಕಂಪನಿಯಿಂದ ವಿಮೆ ಪರಿಹಾರ ದೊರೆತಿಲ್ಲ.

ಇತ್ತೀಚಿಗೆ ಭತ್ತದ ಕಳಪೆ ಬೀಜ ಪೂರೈಕೆಯಾಗಿದ್ದು, ಕೀಟಗಳ ಹಾವಳಿ ಹೆಚ್ಚಾಗಿದೆ. ಇದರಿಂದ ಇಳುವರಿ ಮೇಲೆ ಪರಿಣಾಮ ಬೀರಲಿದ್ದು, ನಷ್ಟಕ್ಕೊಳಗಾದ ರೈತರಿಗೆ ಸೂಕ್ತ ಪರಿಹಾರ ನೀಡುವಂತೆ ಒತ್ತಾಯಿಸಿದರು.

ರಾಜ್ಯ ಕಾರ್ಯದರ್ಶಿ ಬಸವರಾಜ ಗೋಡಿಹಾಳ್, ಜಿಲ್ಲಾಧ್ಯಕ್ಷ ಶ್ರೀನಿವಾಸ ಎಂ.ಭೋವಿ, ತಾಲೂಕಾಧ್ಯಕ್ಷ ವೀರೇಶ ಅಳ್ಳಳ್ಳಿ, ಪದಾಧಿಕಾರಿಗಳಾದ ಬಿ.ವಿ.ಗೌಡ್ರು, ಅಮರೇಗೌಡ ಇತರರಿದ್ದರು.