ತಾಲೂಕಿನ ಸಂಗಾಪುರದಲ್ಲಿ ವಿಜಯನಗರ ಸಾಮ್ರಾಜ್ಯದ ಆಡಳಿತಾವಧಿಯಲ್ಲಿ ಸ.ನಂ.48 ರಲ್ಲಿ 42.21 ಏಕರೆ ವ್ಯಾಪ್ತಿಯಲ್ಲಿ ಕೆರೆ ನಿರ್ಮಿಸಿದ್ದು, ಕೆಲವರು ಒತ್ತುವರಿ ಮಾಡಿಕೊಂಡಿದ್ದಾರೆ. ಕೆರೆ ಉಳಿಸುವುದಕ್ಕಾಗಿ ಶ್ರೀ ಲಕ್ಷ್ಮೀನಾರಾಯಣ ಕೆರೆ ಅಭಿವೃದ್ಧಿ ರೈತ ಸಂಘ ದವರು ಸಂಬಂಧಪಟ್ಟ ಇಲಾಖೆ ಯೊಂದಿಗೆ ಪತ್ರ ವ್ಯವಹಾರ ನಡೆಸಿದ್ದು, ಸರ್ವೇ ಕೈಗೊಂಡ ನಂತರ ಇತ್ಯರ್ಥಕ್ಕೆ ಕಂದಾಯ ಇಲಾಖೆ ಸೂಚನೆ ನೀಡಿತ್ತು. ಸರ್ವೇ ಇಲಾಖೆ ತಾಲೂಕಾಧಿಕಾರಿ ರಫೀಕ್ ನೇತೃತ್ವದ ತಂಡ ಡಿಜಿಟಲ್ ಮಾಪನದೊಂದಿಗೆ ಸ್ಥಳಕ್ಕೆ ಆಗಮಿಸಿದಾಗ ಒತ್ತುವರಿದಾರರು ಆಕ್ಷೇಪಿಸಿದ್ದು, ಕೆಲಕಾಲ ಗದ್ದಲ ಉಂಟಾಯಿತು. ಸ್ಥಳಕ್ಕೆ ಗ್ರಾಮೀಣ ಪಿಐ ರಂಗಪ್ಪ ದೊಡ್ಮನಿ ತೆರಳಿ ವಾತಾವರಣ ತಿಳಿಗೊಳಿಸಿದರು. ವಿವಾದಿತ ಪ್ರದೇಶದಲ್ಲಿ ಪೊಲೀಸ್ ಬಂದೋಬಸ್ತ್ ಇಲ್ಲದೇ ಸರ್ವೇಗೆ ಆಗಮಿಸಿದ ಕಂದಾಯ, ಸರ್ವೇ ಮತ್ತು ಗ್ರಾಪಂ ಅಧಿಕಾರಿಗಳನ್ನು ತೀವ್ರ ತರಾಟೆಗೆ ತೆಗೆದುಕೊಂಡರು. ಪೊಲೀಸ್ ಬಂದೋಬಸ್ತ್ಗೆ ಅರ್ಜಿ ಸಲ್ಲಿಸುವಂತೆ ತಿಳಿಸಿದ್ದರಿಂದ ಜು.4ರಂದು ಸರ್ವೇ ಮುಂದೂಡಲಾಯಿತು. ಗ್ರಾಪಂ ಪಿಡಿಒ ಕಾಶೀನಾಥ, ನೀರಾವರಿ ಇಲಾಖೆ ಎಇಇ ಅಮರೇಶಪ್ಪ, ಎಇ ಕೆ.ಅಮರೇಶ, ಸಂಘದ ಅಧ್ಯಕ್ಷ ಖಮರ್ ಪಾಷಾ ಇತರರಿದ್ದರು.
