ಚಿಕ್ಕಬಳ್ಳಾಪುರ: ಗಣೇಶ ಚತುರ್ಥಿಗೆ ದಿನಗಣನೇ ಆರಂಭವಾಗಿರುವುದರ ನಡುವೆ ಜಿಲ್ಲಾದ್ಯಂತ ವಿವಿಧ ಬಗೆಯ, ವಿವಿಧ ಗಾತ್ರದ ವಿಘ್ನ ವಿನಾಯಕನ ಮೂರ್ತಿಗಳು ಮಾರುಕಟ್ಟೆಗೆ ಬಂದಿದ್ದು ಲಕ್ಷಾಂತರ ರೂ ಬಂಡವಾಳ ಹೂಡಿರುವ ಮಾರಾಟಗಾರರು ಪ್ರತಿ ಬಾರಿಯಂತೆ ಪ್ರಸಕ್ತ ಹಬ್ಬದ ಸಂದರ್ಭದಲ್ಲೂ ಒಳ್ಳೆಯ ವ್ಯಾಪಾರದ ನಿರೀಕ್ಷೆಯಲ್ಲಿದ್ದಾರೆ.
ಹೌದು! ಸ್ಥಳೀಯ ಜತೆಗೆ ಬೆಂಗಳೂರು, ಆಂಧ್ರದ ತಿರುಪತಿ, ಹಿಂದೂಪುರ ಸೇರಿದಂತೆ ನಾನಾ ಭಾಗಗಳಿಂದ ಪ್ರತಿದಿನ ಆಕರ್ಷಕ ಮೂರ್ತಿಗಳನ್ನು ತರಿಸಿಕೊಳ್ಳುತ್ತಿದ್ದು ಪ್ರಮುಖ ರಸ್ತೆಗಳ ಬದಿ, ಖಾಸಗೀ ಗೋದಾಮಿನಲ್ಲಿಟ್ಟು ಗ್ರಾಹಕರನ್ನು ಸೆಳೆಯಲಾಗುತ್ತಿದೆ. ಗರಿಷ್ಠ 17 ಅಡಿ ಗಣಪನ ಮೂರ್ತಿಗಳು ಕಾಣಿಸುತ್ತಿವೆ. ಕನಿಷ್ಠ 100 ರೂಗಳಿಂದ ಹಿಡಿದು 60 ಸಾವಿರ ರೂಗಳಿಗೂ ಹೆಚ್ಚು ಹಣವನ್ನು ನಿಗದಿಪಡಿಸಲಾಗಿದೆ.
ಜಿಲ್ಲಾ ಕೇಂದ್ರದಲ್ಲಿನ ಬಿ.ಬಿ.ರಸ್ತೆಯ ಕೆಇಬಿ ಕಚೇರಿ, ಸೆಂಥ್ ಕ್ಸೇವಿಯರ್ ಚರ್ಚ್, ಜೀವನ್ ಆಸ್ಪತ್ರೆ ಮುಂಭಾಗ, ಬಜಾರ್ ರಸ್ತೆ, ಭುವನೇಶ್ವರಿ ವೃತ್ತ ಸೇರಿದಂತೆ ಹಲವೆಡೆ 25 ಕ್ಕೂ ಹೆಚ್ಚು ವ್ಯಾಪಾರಿಗಳು 2 ಸಾವಿರಕ್ಕೂ ಹೆಚ್ಚು ಗಣಪತಿ ಮೂರ್ತಿಗಳನ್ನು ಮಾರಾಟಕ್ಕಿಟ್ಟಿದ್ದು ಮುಂಬರುವ ದಿನಗಳಲ್ಲಿ ಮತ್ತಷ್ಟು ತರಿಸಿಕೊಳ್ಳಲಾಗುತ್ತಿದೆ. ನವಿಲು, ರಾಜಾಸನ, ವೀಣೆಯ ಸೇರಿದಂತೆ ವಿವಿಧ ಮಾದರಿಯಲ್ಲಿನ ಗಣಪ ಗಮನ ಸೆಳೆಯುತ್ತಿದ್ದಾನೆ.
