ಮುಳಬಾಗಿಲಿನ ತಾಪಂ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ಗ್ರಂಥಾಲಯ ಗ್ರಂಥ ಪಾಲಕರ ದಿನಾಚರಣೆಯಲ್ಲಿ ಇಒ ಡಾ.ಕೆ. ಸರ್ವೇಶ್, ಸಹಾಯಕ ನಿರ್ದೇಶಕ ರವಿಚಂದ್ರ, ಗ್ರಂಥಪಾಲಕರ ಸಂಘದ ತಾಲೂಕ ಅಧ್ಯಕ್ಷ ಕುರುಡುಮಲೆ ವಿನಾಯಕ, ಮಾಜಿ ಅಧ್ಯಕ್ಷ ನರಸಿಂಹ ಶೆಟ್ಟಿ, ಕಾರ್ಯದರ್ಶಿ ಮಿಟ್ಟೂರು ರಮೇಶ್, ಕನ್ನಸಂದ್ರ ಆರ್. ಸತ್ಯಣ್ಣ, ತಿಮ್ಮರಾವುತನಹಳ್ಳಿ ಕೆ.ಎಸ್. ದೀಪಿಕಾ ಇದ್ದರು.
ಮುಳಬಾಗಿಲು : ಓದುಗರ ಸಂಖ್ಯೆ ದಿನೇದಿನೆ ಹೆಚ್ಚುವಂತೆ ಮಾಡಬೇಕಾದ ಜವಾಬ್ದಾರಿ ಗ್ರಂಥಪಾಲಕರದಾಗಿರಬೇಕು. ಪುಸ್ತಕಗಳು, ದಿನಪತ್ರಿಕೆಗಳನ್ನು ಅಧ್ಯಯನ ಮಾಡುವುದರಿಂದ ಜ್ಞಾನಾರ್ಜನೆ ಹೆಚ್ಚಿಸಿಕೊಳ್ಳಲು ಸಾಧ್ಯವಾಗುತ್ತದೆ ಎಂದು ತಾಲೂಕು ಪಂಚಾಯಿತಿ ಕಾರ್ಯನಿರ್ವಹಣಾಧಿಕಾರಿ ಡಾ.ಕೆ.ಸರ್ವೇಶ್ ತಿಳಿಸಿದರು.
ತಾಪಂ ಸಭಾಂಗಣದಲ್ಲಿ ಮಂಗಳವಾರ ಗ್ರಂಥಾಲಯ ಪಿತಾಮಹ ಡಾ.ಎಸ್.ಆರ್.ರಂಗನಾಥನ್ ಅವರ ಸವಿ ನೆನಪಿನಲ್ಲಿ ಹಮ್ಮಿಕೊಂಡಿದ್ದ ಗ್ರಂಥಪಾಲಕರ ದಿನಾಚರಣೆ ಉದ್ಘಾಟಿಸಿ ಮಾತನಾಡಿದ ಅವರು, ರಂಗನಾಥನ್ ಅವರು ಬ್ರೆಜಿಲ್ ದೇಶಕ್ಕೆ ಹೋಗಿ ಸಮೂಹ ಗ್ರಂಥಾಲಯ ಮತ್ತು ಸಾರ್ವಜನಿಕ ಗ್ರಂಥಾಲಯಗಳ ಮೂಲಕ ಜನರಿಗೆ ಯಾವ ರೀತಿ ಉಪಯುಕ್ತತೆ ಉಂಟಾಗುತ್ತದೆ ಎಂಬುದನ್ನು ಅಧ್ಯಯನ ಮಾಡಿ ನಮ್ಮ ದೇಶದಲ್ಲಿ ಗ್ರಂಥಾಲಯಗಳ ಸ್ಥಾಪನೆಗೆ ಬುನಾದಿ ಹಾಕಿಕೊಟ್ಟಿದ್ದಾರೆ. ರಂಗನಾಥನ್ ಅವರ ಆದರ್ಶಗಳು ಪ್ರಜ್ವಲಿಸುವಂತೆ ಮಾಡಲು ಸದಾ ಓದುಗರ ಸಂಖ್ಯೆ ಗ್ರಾಮೀಣ ಪ್ರದೇಶಗಳಲ್ಲಿ ಹೆಚ್ಚುಗೊಳ್ಳುಬೇಕು ಎಂದರು.
ಈಗಾಗಲೇ ತಾಲೂಕಿನ 30 ಗ್ರಾಪಂ ಕೇಂದ್ರಗಳಲ್ಲಿ ಗ್ರಂಥಾಲಯಗಳು ಡಿಜಿಟಲ್ ಗ್ರಂಥಾಲಯಗಳು ತೆರೆಯಲಾಗಿದೆ. ಈಗ ಹೊಸದಾಗಿ ಹೆಚ್ಚುವರಿಯಾಗಿ 55 ಗ್ರಂಥಾಲಯವನ್ನು ಸರ್ಕಾರ ಮಂಜೂರು ಮಾಡಿದ್ದು, ಆರಂಭಿಕವಾಗಿ ಸರ್ಕಾರಿ ಶಾಲಾ ಶಿಕ್ಷಕರ ನೆರವು ಪಡೆದು ಆ ಶಾಲೆಗಳಲ್ಲಿ ಪ್ರಾರಂಭ ಮಾಡಲಾಗುವುದು, ನಂತರ ಗ್ರಂಥ ಪಾಲಕರನ್ನು ನೇಮಕ ಮಾಡಲಾಗುವುದು ಎಂದರು. ಉತ್ತಮ ಗ್ರಂಥಪಾಲಕರಿಗೆ ಸನ್ಮಾನ: 2024&25ನೇ ಸಾಲಿನ ಉತ್ತಮ ಗ್ರಂಥಪಾಲಕರಾಗಿ ಸೇವೆ ಸಲ್ಲಿಸಿದ ಬಲ್ಲ ಗ್ರಾಪಂ ಗ್ರಂಥಪಾಲಕ ಸತೀಶ್ ಕುಮಾರ್, ಗುಡಿಪಲ್ಲಿ ಗ್ರಂಥಪಾಲಕ ಚಂದ್ರಶೇಖರ್ ಅವರನ್ನು ಸನ್ಮಾನಿಸಲಾಯಿತು.
