MURDER: ಪತಿಯನ್ನೇ ಕೊಂದ ಹಂತಕಿ..!

ನರಗುಂದ: ತಾಲೂಕಿನ ರಡ್ಡೇರ ನಾಗನೂರಿನಲ್ಲಿ ಕಳೆದ ಮಂಗಳವಾರ ಪತಿಯನ್ನು ಬರ್ಬರವಾಗಿ ಹತ್ಯೆ ಮಾಡಿದ ಮೇಲೆ ಏನೂ ಗೊತ್ತಿಲ್ಲದಂತೆ ನಾಟಕವಾಡಿದ್ದ ಹೆಂಡತಿ ಕವಿತಾ ಹಾದಿಮನಿ, ಕೃತ್ಯಕ್ಕೆ ಮೊದಲು ಪತಿಗೆ ನಿದ್ರೆ ಮಾತ್ರೆ ಕೊಟ್ಟಿದ್ದಳು ಎನ್ನುವುದು ಪೊಲೀಸ್ ತನಿಖೆಯಲ್ಲಿ ಬಯಲಾಗಿದೆ.

ಗಂಡನೊಂದಿಗೆ ಮುನಿಸಿಕೊಂಡಿದ್ದ ಕವಿತಾ 3 ವರ್ಷಗಳ ಹಿಂದೆ ತವರು ಮನೆ ಸೇರಿದ್ದಳು. ಇತ್ತೀಚೆಗೆ ವಿಶ್ವನಾಥನ ಸಹೋದರಿ ಮದುವೆ ನಿಶ್ಚಯವಾಗಿದ್ದರಿಂದ ಆ ನೆಪದಲ್ಲಿ ಕವಿತಾ ರಡ್ಡೇರ ನಾಗನೂರಗೆ ಬಂದಿದ್ದಳು. ಮೇ 19ರಂದು ಇಬ್ಬರೂ ಒಂದೇ ಕೋಣೆಯಲ್ಲಿ ಇದ್ದರು. ಆಗ ಇಬ್ಬರ ಮಧ್ಯೆ ಮತ್ತೆ ಗಲಾಟೆಯಾಗಿತ್ತು. ಗಂಡನಿಗೆ ಗೊತ್ತಿಲ್ಲದಂತೆ ನಿದ್ದೆ ಮಾತ್ರೆ ಹಾಕಿದ್ದ ಹೆಂಡತಿ ನಂತರ ಕಬ್ಬಿಣದ ಹಾರೆಯಿಂದ ಹೊಡೆದು ಕೊಲೆಗೈದಿದ್ದಳು.

ಸಾಕ್ಷಿ ನಾಶ ಮಾಡುವ ಉದ್ದೇಶದಿಂದ ರಾತ್ರಿಯಿಡೀ ಬೆಡ್ ರೂಂನಲ್ಲಿದ್ದ ರಕ್ತದ ಕಲೆಗಳನ್ನು ಸ್ವಚ್ಛಗೊಳಿಸಿ ಮರುದಿನ ಪೊಲೀಸರ ಎದುರು ಕೊಲೆಗೂ ತನಗೂ ಏನೂ ಸಂಬಂಧವೇ ಇಲ್ಲ ಇಲ್ಲವೆನ್ನುವಂತೆ ನಾಟಕವಾಡಿದ್ದಳು. ಆದರೆ, ಪೊಲೀಸರ ತನಿಖೆಯಲ್ಲಿ ಸತ್ಯಾಂಶ ಬಯಲಾಗಿದೆ. ತಾನೇ ಕೊಲೆ ಮಾಡಿದ್ದಾಗಿ ಆರೋಪಿ ಕವಿತಾ ಒಪ್ಪಿಕೊಂಡಿದ್ದಾಳೆ. ಕವಿತಾಳನ್ನು ನ್ಯಾಯಾಂಗ ವಶಕ್ಕೆ ನೀಡಲಾಗಿದೆ ಎಂದು ಸಿಪಿಐ ಸತ್ಯಪ್ಪ ಮಾಳಗೊಂಡ ’ವಿಜಯವಾಣಿ’ಗೆ ತಿಳಿಸಿದರು.

ತಬ್ಬಿಲಿಯಾದ ಮಗು: ಗಂಡ-ಹೆಂಡತಿ ಜಗಳ ಕೊಲೆಯಲ್ಲಿ ಅಂತ್ಯವಾಗಿದ್ದರಿಂದ ಏನೂ ಅರಿಯದ ಮೂರು ವರ್ಷದ ಮಗು ಈಗ ಅನಾಥವಾಗಿದೆ. ಮಗುವಿನ ತಂದೆ ಹತ್ಯೆಯಾಗಿದ್ದರೆ ತಾಯಿ ಈಗ ಜೈಲು ಪಾಲಾಗಿದ್ದಾಳೆ.

ರಡ್ಡೇರ ನಾಗನೂರಿನ ಕವಿತಾ ಹಾಗೂ ಆಕೆಯ ಪತಿ ವಿಶ್ವನಾಥ ನಡುವೆ ವೈವಾಹಿಕ ಜೀವನ ಸರಿ ಇರಲಿಲ್ಲ. ಬಾಗಲಕೋಟೆಯಲ್ಲಿ ಕವಿತಾಳಿಗೆ ಅದೇ ಪ್ರದೇಶದ ಹುಡುಗನ ಜೊತೆಗೆ ಸ್ನೇಹ ಇತ್ತು. ಹೀಗಾಗಿ ಅವಳು ಪದೇಪದೆ ಬಾಗಲಕೋಟೆಗೆ ಹೋಗುತ್ತಿದ್ದಳು. ಇದನ್ನು ಪ್ರಶ್ನಿಸಿದ್ದಕ್ಕೆ ಅವರಲ್ಲಿ ವಿರಸ ಉಂಟಾಗಿತ್ತು ಎಂದು ಕುಟುಂಬಸ್ಥರು ಆರೋಪಿಸಿದ್ದಾರೆ.