GOVERNMENT: ಸರ್ಕಾರ ‘ಬರಪೀಡಿತ ಪ್ರದೇಶ’ ಘೋಷಿಸಲಿ

ಶಿರಹಟ್ಟಿ: ಪ್ರಸಕ್ತ ವರ್ಷ ಮುಂಗಾರು ಮಳೆಯ ತೀವ್ರ ಕೊರತೆಯಿಂದಾಗಿ ಶಿರಹಟ್ಟಿ ತಾಲೂಕಿನ ರೈತಾಪಿ ವರ್ಗ ಸಂಪೂರ್ಣ ಕಂಗಾಲಾಗಿದ್ದು, ಸರ್ಕಾರ (GOVERNMENT) ತಾಲೂಕನ್ನು ತಕ್ಷಣವೇ ’ಬರಪೀಡಿತ ಪ್ರದೇಶ’ ಎಂದು ಘೋಷಿಸಿ ತೊಂದರೆಯಲ್ಲಿರುವ ಅನ್ನದಾತರಿಗೆ ಸೂಕ್ತ ಪರಿಹಾರ ಒದಗಿಸಬೇಕು ಎಂದು ಶಾಸಕ ಡಾ. ಚಂದ್ರು ಕೆ. ಲಮಾಣಿ ಆಗ್ರಹಿಸಿದರು. 

ತಾಪಂ ಸಾಮರ್ಥ್ಯ ಸೌಧದಲ್ಲಿ ಭಾನುವಾರ ಕರೆಯಲಾದ ವಿಪತ್ತು ನಿರ್ವಹಣಾ ಟಾಸ್ಕ್‌ಫೋರ್ಸ್ ಸಮಿತಿ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. ‘ತಾಲೂಕಿನಲ್ಲಿ ಸಕಾಲಕ್ಕೆ ಮಳೆಯಾಗದ ಕಾರಣ ಕಡಲೆ, ತೊಗರಿ, ಹತ್ತಿ, ಶೇಂಗಾ ಹಾಗೂ ಹೆಸರು ಸೇರಿದಂತೆ ಪ್ರಮುಖ ಬೆಳೆಗಳು ಒಣಗುತ್ತಿವೆ. ಇಂತಹ ಗಂಭೀರ ಪರಿಸ್ಥಿತಿಯಲ್ಲೂ ತಾಲೂಕಿನ 14 ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಮಳೆ ಮಾಪನ ಯಂತ್ರಗಳು ಕೆಟ್ಟು ನಿಂತಿವೆ. ಇದನ್ನು ಗಣನೆಗೆ ತೆಗೆದುಕೊಳ್ಳದ ಅಧಿಕಾರಿಗಳು ಕಚೇರಿಯಲ್ಲೇ ಕುಳಿತು ಕಾಲ್ಪನಿಕ ವರದಿ ಸಿದ್ಧಪಡಿಸಬಾರದು. ಅಧಿಕಾರಿಗಳು ತಾವೇ ಖುದ್ದಾಗಿ ರೈತರ ಹೊಲಗಳಿಗೆ ಭೇಟಿ ನೀಡಿ, ಬೆಳೆ ಹಾನಿಯ ನಿಖರ ಮತ್ತು ನೈಜ ಚಿತ್ರಣವನ್ನು ದಾಖಲೆ ಸಮೇತ ಸರ್ಕಾರಕ್ಕೆ ಸಲ್ಲಿಸಬೇಕು’ ಎಂದರು.

ಬೆಳೆಹಾನಿ ಸಮೀಕ್ಷೆಯ ನೆಪದಲ್ಲಿ ರೈತರ ಜಮೀನಿಗೆ ಭೇಟಿ ನೀಡುವ ಖಾಸಗಿ ವಿಮಾ ಏಜೆಂಟರು ಹಾಗೂ ಪಿಆರ್‌ಒಗಳ ದಬ್ಬಾಳಿಕೆ ಮಿತಿಮೀರಿದೆ. ಇವರ ಕಳಪೆ ಕಾರ್ಯವೈಖರಿಯಿಂದಾಗಿ ಅರ್ಹ ರೈತರು ವಿಮಾ ಸೌಲಭ್ಯದಿಂದ ವಂಚಿತರಾಗುತ್ತಿದ್ದಾರೆ. ವಿಮಾ ಕಂಪನಿಯ ಪ್ರತಿನಿಧಿಗಳು ರೈತರ ಮೇಲೆ ದೈಹಿಕ ಹಲ್ಲೆ ನಡೆಸಿ ಹಣ ಪೀಕುತ್ತಿರುವ ಪ್ರಕರಣಗಳು ವರದಿಯಾಗುತ್ತಿವೆ. ಇಷ್ಟೆಲ್ಲ ಕಾನೂನುಬಾಹಿರ ಕೃತ್ಯಗಳು ನಡೆಯುತ್ತಿದ್ದರೂ ತಹಸೀಲ್ದಾರ್ ಹಾಗೂ ಕೃಷಿ ಇಲಾಖೆ ಅಧಿಕಾರಿಗಳು ಮೌನವಾಗಿರುವುದರ ಹಿಂದಿನ ಮರ್ಮವೇನು ಎಂದು ಶಾಸಕರು ತರಾಟೆಗೆ ತೆಗೆದುಕೊಂಡರು. 

ತಾಲೂಕಿನ ಬೆಳ್ಳಟ್ಟಿ, ವಡವಿ, ಸುಗನಹಳ್ಳಿ, ನೆಲೋಗಲ್, ಸೂರಣಗಿ ಸೇರಿದಂತೆ ಹಲವು ಗ್ರಾಮಗಳಲ್ಲಿ ಓಸಿ ಮತ್ತು ಇಸ್ಪೀಟ್ ಜೂಜಾಟ ರಾಜಾರೋಷವಾಗಿ ನಡೆಯುತ್ತಿದ್ದು, ನೂರಾರು ಕುಟುಂಬಗಳು ಬೀದಿಗೆ ಬರುತ್ತಿವೆ. ಪ್ರಭಾವಿಗಳ ಮನೆ ಹಾಗೂ ಫಾರ್ಮ್ ಹೌಸ್‌ಗಳಲ್ಲಿ ಅಕ್ರಮ ಜೂಜು ದಂಧೆ ನಡೆಯುತ್ತಿದ್ದರೂ ಪೊಲೀಸ್ ಇಲಾಖೆ ಏಕೆ ಕಣ್ಣು ಮುಚ್ಚಿ ಕುಳಿತಿದೆ ಎಂದು ಪಿಎಸ್‌ಐ ಈರಪ್ಪ ರಿತ್ತಿ ಅವರನ್ನು ಶಾಸಕರು ಪ್ರಶ್ನಿಸಿದರು. ಅಮಾಯಕರನ್ನು ಸಂಕಷ್ಟಕ್ಕೆ ಸಿಲುಕಿಸುವುದನ್ನು ಬಿಟ್ಟು, ನೈಜ ಜೂಜುಕೋರರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಿ, ಅದಕ್ಕೆ ಬೇಕಾದ ದಾಖಲೆಗಳನ್ನು ನಾನೇ ನೀಡುತ್ತೇನೆ ಎಂದರು.

ತಹಸೀಲ್ದಾರ್ ಕೆ. ರಾಘವೇಂದ್ರ ರಾವ್, ತಾಪಂ ಇಒಗಳಾದ ರಾಮಪ್ಪ ದೊಡ್ಡಮನಿ, ಮಂಜುಳಾ ಹಕಾರಿ, ವಿಜಯಕುಮಾರ ಬೆಣ್ಣೆ ಸೇರಿದಂತೆ ವಿವಿಧ ಇಲಾಖೆಗಳ ತಾಲೂಕು ಮಟ್ಟದ ಅಧಿಕಾರಿಗಳು ಉಪಸ್ಥಿತರಿದ್ದರು.

"

ಶಿರಹಟ್ಟಿ ತಾಲೂಕಿನಲ್ಲಿ ಕಷ್ಟಪಟ್ಟು ಬೆಳೆವಿಮೆ ಪಾವತಿಸಿದ ನೈಜ ರೈತರಿಗೆ ಇಂದಿಗೂ ವಿಮಾ ಹಣ ತಲುಪಿಲ್ಲ. ಈ ಮಹಾವಂಚನೆಯಲ್ಲಿ ಕೆಲವು ಅಧಿಕಾರಿಗಳೂ ಶಾಮೀಲಾಗಿದ್ದಾರೆ. ಇಂತಹ ಜನವಿರೋಧಿ ಅಧಿಕಾರಿಗಳಿಗೆ ನೊಂದ ರೈತರ ಶಾಪ ತಟ್ಟದೇ ಇರದು.

— ಡಾ. ಚಂದ್ರು ಕೆ. ಲಮಾಣಿ, ಶಾಸಕರು