North Karnataka : ಉತ್ತರ ಕರ್ನಾಟಕಕ್ಕೆ ವಿಶೇಷ ಅನುದಾನ ನೀಡಲಿ

ನರಗುಂದ: ಸದಾ ರೈತರ ಪರವಾಗಿದ್ದೇವೆ ಎಂದು ಜಂಬ ಕೊಚ್ಚಿಕೊಳ್ಳುತ್ತಿರುವ ರಾಜ್ಯ ಸರ್ಕಾರ (North Karnataka) ಪ್ರತಿಯೊಂದು ಸಮಸ್ಯೆಗಳಿಗೆ ಕೇಂದ್ರದ ಕಡೆಗೆ ಬೊಟ್ಟು ಮಾಡುವುದನ್ನು ಬಿಟ್ಟು ಮೆಕ್ಕೆಜೋಳ, ಕಳಸಾ-ಬಂಡೂರಿ, ಉತ್ತರ ಕರ್ನಾಟಕದ ಸರ್ವಾಂಗೀಣ ಅಭಿವೃದ್ಧಿಗೆ ವಿಶೇಷ ಅನುದಾನ ನೀಡಬೇಕು ಎಂದು ಶಾಸಕ ಸಿ.ಸಿ. ಪಾಟೀಲ ಹೇಳಿದರು.

ಪಟ್ಟಣದ ಕೃಷಿ ಉತ್ಪನ್ನ ಮಾರುಕಟ್ಟೆ ಸಮಿತಿ ಆವರಣದಲ್ಲಿ 1.25 ಕೋಟಿ ರೂ. ವೆಚ್ಚದ ರಸ್ತೆ ಡಾಂಬರೀಕರಣ, ಚರಂಡಿ, ಕಾಂಪೌಂಡ್ ನಿರ್ಮಾಣ ಕಾಮಗಾರಿಗೆ ಶನಿವಾರ ಭೂಮಿಪೂಜೆ ನೆರವೇರಿಸಿ ಅವರು ಮಾತನಾಡಿದರು. ‘ಪ್ರಸ್ತುತ ಬೆಳಗಾವಿ ಅಧಿವೇಶನ ಅತ್ಯಂತ ಅರ್ಥಪೂರ್ಣ ಹಾಗೂ ಸ್ಪಂದನಾತ್ಮಕವಾಗಿ ನಡೆಯುತ್ತಿರುವುದು ಒಳ್ಳೆಯ ಬೆಳವಣಿಗೆ. ಆದರೆ, ಇಲ್ಲಿನ ಅಧಿವೇಶನದಲ್ಲಿ ಚರ್ಚಿಸಿದಂತೆ ಉತ್ತರ ಕರ್ನಾಟಕದ ಅಭಿವೃದ್ಧಿಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯನವರು ಹೆಚ್ಚುವರಿ ವಿಶೇಷ ಅನುದಾನ ಬಿಡುಗಡೆ ಮಾಡಬೇಕು. ಕಳಸಾ-ಬಂಡೂರಿ ಯೋಜನೆಗೆ ಪ್ರತಿಯೊಬ್ಬರೂ ಹೋರಾಟ ಮಾಡಿದ್ದೇವೆ. ಹಲವಾರು ರೈತರು ಪ್ರಾಂಜಲ ಮನಸಿನಿಂದ ಹೋರಾಟ ಮಾಡಿದ್ದಾರೆ. ಇದರಲ್ಲಿ ಯಾವುದೇ ರೀತಿಯ ರಾಜಕಾರಣ ಮಾಡುವುದು ಬೇಡ. ಆದರೆ, ಈ ಮಹತ್ವದ ಯೋಜನೆಗೆ ಕೇಂದ್ರ ಸರ್ಕಾರದ ಮೇಲೆ ರಾಜ್ಯ ಸರ್ಕಾರದಿಂದ ಹೆಚ್ಚಿನ ಒತ್ತಡ ತಂದು ಯೋಜನೆ ಅನುಷ್ಠಾನಕ್ಕೆ ಶ್ರಮಿಸಬೇಕು’ ಎಂದರು.

ಅವೈಜ್ಞಾನಿಕ ಮೆಕ್ಕೆಜೋಳ ಬೆಂಬಲ ಬೆಲೆ ಖರೀದಿ ಕೇಂದ್ರಗಳನ್ನು ಪ್ರಾರಂಭಿಸಿರುವ ರಾಜ್ಯ ಸರ್ಕಾರ ಬೆರಳೆಣಿಕೆ ರೈತರ ನೋಂದಣಿ ಮಾಡಿ ಉತ್ಪನ್ನ ಖರೀದಿಸಲಾಗದೇ ಕೈ ಕಟ್ಟಿ ಕುಳಿತಿದೆ. ನರಗುಂದ ತಾಲೂಕೊಂದರಲ್ಲೇ 1.44 ಸಾವಿರ ಹೆಕ್ಟೇರ್ ಪ್ರದೇಶದಲ್ಲಿ ಮೆಕ್ಕೆಜೋಳ ಬೆಳೆದಿದ್ದು, 36 ಲಕ್ಷ ಟನ್ ಉತ್ಪನ್ನ (ಇಳುವರಿ) ಬರಲಿದೆ. ಆದರೆ, ರಾಜ್ಯ ಸರ್ಕಾರ ಪ್ರಾರಂಭಿಸಿರುವ ಬೆಂಬಲ ಬೆಲೆ ಖರೀದಿ ಕೇಂದ್ರಗಳಲ್ಲಿ ಗದಗ ಜಿಲ್ಲೆಯಾದ್ಯಂತ ಕೇವಲ 31 ಸಾವಿರ ಕ್ವಿಂಟಾಲ್ ಉತ್ಪನ್ನ ಖರೀದಿಸುತ್ತಿರುವುದು ದುಸ್ಸಾಹಸಕರ ಸಂಗತಿ. ಕೇಂದ್ರದ ನಿಯಮಾನುಸಾರ ಮೆಕ್ಕೆಜೋಳ ವಾಣಿಜ್ಯ ಬೆಳೆ ಆಗಿರುವುದರಿಂದ ಇದನ್ನು ಬೆಂಬಲ ಬೆಲೆ ಯೋಜನೆಯಡಿ ಖರೀದಿಸುವುದು ಅಸಾಧ್ಯಕರ ಮಾತು. ರಾಜ್ಯದ ಪ್ರತಿಯೊಂದು ಸಮಸ್ಯೆಗಳಿಗೆ ಸರ್ಕಾರ ಕೇಂದ್ರದ ಕಡೆಗೆ ಬೊಟ್ಟು ಮಾಡಿದರೆ ರೈತರು, ಸಾಮಾನ್ಯ ಜನರ ಪರಿಸ್ಥಿತಿ ಶೋಚನೀಯವಾಗುತ್ತದೆ ಎಂದು ಸಿ.ಸಿ. ಪಾಟೀಲ ಹೇಳಿದರು.

ಎನ್.ಕೆ. ಸೋಮಾಪೂರ, ಎ.ಎಂ. ಹುಡೇದ, ಚಂದ್ರು ದಂಡಿನ, ರಾಘವೇಂದ್ರ ಸಜ್ಜನ, ನಾಗನಗೌಡ ತಿಮ್ಮನಗೌಡ್ರ, ಎಂ.ಎಚ್.ತಿಮ್ಮನಗೌಡ್ರ, ಎಸ್.ಆರ್.ಪಾಟೀಲ, ಎನ್.ವಿ.ಮೇಟಿ, ರವಿ ಹೊಂಗಲ, ಪ್ರಕಾಶಗೌಡ ತಿರಕನಗೌಡ್ರ, ಬಿ.ಬಿ. ಐನಾಪೂರ, ಜಯಪ್ರಕಾಶ ಕಂಠಿ, ಮಂಜುನಾಥ ಆನೆಗುಂದಿ, ಈಶ್ವರಗೌಡ ಪಾಟೀಲ, ಎಸ್.ಬಿ. ಯಲ್ಲಪ್ಪಗೌಡ್ರ, ಶಂರಕಣ್ಣ ವಾಳದ, ದೇವಣ್ಣ ಕಲಾಲ, ಮಹೇಶ ಹಟ್ಟಿ, ಅಶೋಕನ ಕೊಪ್ಪಳ, ಬಸು ಪಾಟೀಲ, ವೆಂಕಟೇಶ ಹೊಸಮನಿ, ಇತರರಿದ್ದರು.

ರಾಜ್ಯ ಸರ್ಕಾರಕ್ಕೆ ಒಂದು ವರ್ಷಕ್ಕೆ 85 ರಿಂದ 100 ಕೋಟಿ ರೂ.ಗಳ ಆವರ್ತನಿಧಿ ಸಂಗ್ರಹವಾಗುತ್ತದೆ. 3 ವರ್ಷದಲ್ಲಿ ಸಂಗ್ರಹವಾಗಿರುವ ಅಂದಾಜು 300 ಕೋಟಿ ರೂಪಾಯಿ ಹಣ ಎಲ್ಲಿ ಹೋಯ್ತು. ಈ ಹಣವನ್ನಾದರೂ ಬಳಸಿಕೊಂಡು ರಾಜ್ಯದ ರೈತರು ಬೆಳೆದಿರುವ ಮೆಕ್ಕೆಜೊಳ ಸೇರಿದಂತೆ ವಿವಿಧ ಉತ್ಪನ್ನಗಳನ್ನು ಖರೀದಿಸಿ ರೈತರ ಕಲ್ಯಾಣ ಕೆಲಸ ಮಾಡಬಹುದಿತ್ತು. ಆದರೆ, ಈ ಸರ್ಕಾರಕ್ಕೆ ರೈತರ ಬಗ್ಗೆ ಕಿಂತಿಚ್ಚೂ ಕಾಳಜಿ ಇಲ್ಲ. ಆರ್ಥಿಕ ನಿರ್ವಹಣೆಯಲ್ಲಿ ಸರ್ಕಾರ ಸಂಪೂರ್ಣ ಕುಸಿತ ಕಂಡಿದೆ. ಇಲಾಖೆ ಅಧಿಕಾರಿ, ಸಚಿವರ ಮೇಲೆ ಮುಖ್ಯಮಂತ್ರಿ ಹಿಡಿತ ಕಳೆದುಕೊಂಡಿದ್ದಾರೆ. ಸಿಎಂ ಕುರ್ಚಿಗಾಗಿ ಬಡಿದಾಡುವ ಬದಲು ಕುರ್ಚಿ ಮೇಲೆ ಕುಳಿತಿರುವವರೆಗಾದರೂ ರೈತರು, ರಾಜ್ಯದ ಅಭಿವೃದ್ಧಿಯ ಪರವಾಗಿ ಯೋಚಿಸಬೇಕು. ಮೆಕ್ಕೆಜೋಳ ಖರೀದಿಗೆ ವಿಧಿಸಿರುವ ವಿವಿಧ ನಿಯಮಗಳ ಮಾರ್ಪಾಡಿಗೆ ಕೇಂದ್ರ ಸರ್ಕಾರದ ಮೇಲೆ ನಿರಂತರ ಒತ್ತಡ ಹೇರುವಂತೆ ಸರ್ಕಾರಕ್ಕೆ ಒತ್ತಾಯಿಸಿದರು.