Rayaru: ಆಚಾರ್ಯರ ಸೇವೆಗೆ ಒಲಿದ ರಾಯರು

ಲಕ್ಷ್ಮೇಶ್ವರ: ಪಟ್ಟಣದಲ್ಲಿ ಅನೇಕ ಐತಿಹಾಸಿಕ ಸ್ಥಳಗಳಿದ್ದು ಅದರಲ್ಲಿ ಹಿರೇಬಣದಲ್ಲಿರುವ ರಾಘವೇಂದ್ರಸ್ವಾಮಿಗಳ (RAYARU) ಮಠವು ಒಂದಾಗಿದೆ. ಸುಮಾರು 306 ವರ್ಷಗಳ ಹಿಂದೆ ಪಟ್ಟಣದ ಇಟಗಿ ಮನೆತನದವರು ರಾಯರ ಮೃತ್ತಿಕಾ ಬೃಂದಾನವನ್ನು ಅವರ ಮನೆಯಲ್ಲಿ ಪ್ರತಿಷ್ಠಾಪಿಸಿದ್ದು ಅಂದಿನಿಂದ ಈ ಭಾಗದಲ್ಲಿ ರಾಯರ ಮಠ ಸ್ಥಾಪನೆಯಾಗಿ ಸಾವಿರಾರು ಭಕ್ತರನ್ನು ಸೆಳೆಯುತ್ತಿದೆ.

ಇಟಗಿ ಮನೆತನದವರು ಕರ್ಮಠ ಬ್ರಾಹ್ಮಣರು, ಅಗ್ನಿಹೋತ್ರಿಗಳು ಆಗಿದ್ದ ಆಚಾರ್ಯರೊಬ್ಬರು ರಾಘವೇಂದ್ರಸ್ವಾಮಿಗಳ ಆರಾಧನೆ ನಿಮಿತ್ತ ಪ್ರತಿವರ್ಷ ಮಂತ್ರಾಲಯಕ್ಕೆ ಸೇವೆ ಮಾಡಲು ಹೋಗುತ್ತಿದ್ದರು. ಕೆಲಕಾಲದ ನಂತರ ಆಚಾರ್ಯರ ಸಂಧ್ಯಾಕಾಲಕ್ಕೆ ಈ ಸೇವೆ ಅಸಾಧ್ಯವೆನ್ನುವಂತಾದಾಗ ಅವರು ಮನನೊಂದು ರಾಯರನ್ನು ಸ್ಮರಿಸಿದರು. ಆಗ ರಾಯರು ವೃದ್ಧ ಬ್ರಾಹ್ಮಣನ ವೇಷದಲ್ಲಿ ಆಚಾರ್ಯರ ಮನೆಗೆ ಬಂದು ಅವರ ಪತ್ನಿಗೆ ಲಕ್ಷ್ಮೀ ನೃಸಿಂಹ ಸಾಲಿಗ್ರಾಮ, ಮೃತ್ತಿಕೆ ಹಾಗೂ ಮಂತ್ರಾಕ್ಷತೆಗಳಿದ್ದ ದೇವರ ಪೆಟ್ಟಿಗೆಯನ್ನು ಕೊಟ್ಟು ಹೋದರು ಎಂಬ ಪ್ರತೀತಿ ಇದೆ.

ಮಂತ್ರಾಲಯಕ್ಕೆ ಹೋಗಲಾಗುತ್ತಿಲ್ಲ ಎಂಬ ಚಿಂತೆಯಲ್ಲಿದ್ದ ಆಚಾರ್ಯರಿಗೆ ಅದೇರಾತ್ರಿ ಸ್ವಪ್ನದಲ್ಲಿ ರಾಘವೇಂದ್ರಸ್ವಾಮೀಜಿಯವರು ಬಂದು ತಾವು ನೀಡಿದ ಪೆಟ್ಟಿಗೆಯನ್ನು ಅಲ್ಲಿಯೇ ಪ್ರತಿಷ್ಠಾಪಿಸಿದಲ್ಲಿ ತಾವು ಪೂರ್ಣ ಸನ್ನಿಧಾನದಲ್ಲಿರುವುದಾಗಿ ತಿಳಿಸಿದ್ದರಂತೆ. ಹೀಗಾಇ ಇಟಗಿ ಅವರ ಮನೆಯಲ್ಲಿಯೇ ಬೃಂದಾವನ ನಿರ್ಮಿಸಲಾಗಿದೆ. 1908ರವರೆಗೆ ಇಟಗಿ ಮನೆತನದವರಿಂದ ಸೇವೆ ನಡೆದು 1911ರ ಸುಮಾರಿಗೆ ಇಟಗಿ ಸಂತತಿಯವರಾದ ಹನುಮಂತಾಚಾರ್ಯ ಗೋಪಾಲಾಚಾರ್ಯ ಹೊಂಬಳ ಇವರಿಂದ ಈ ಬೃಂದಾವನದ ಸೇವೆ ನಡೆದು ಬಂದಿದೆ.

ರಾಯರ ಸನ್ನಿಧಿಯೇ ಇಲ್ಲಿರುವುದರಿಂದ ಅನೇಕ ಆಶ್ಚರ್ಯಕರ ಹಾಗೂ ಪವಾಡ ಘಟನೆಗಳು ಇಲ್ಲಿ ನಡೆಯುತ್ತಿದ್ದು, ಇಲ್ಲಿನ ಮಠಕ್ಕೆ ಭಕ್ತಿಯಿಂದ ಸೇವೆ ಸಲ್ಲಿಸಿ ಯಾರನ್ನೂ ರಾಯರು ಕೈಬಿಟ್ಟಿಲ್ಲ ಎನ್ನುವುದನ್ನು ಅನುಭವ ಪಡೆದ ಅನೇಕರು ಹೇಳುತ್ತಾರೆ.

ಕಲಿಯುಗದ ಕಾಮದೇನುವಾಗಿರುವ ರಾಘವೇಂದ್ರಸ್ವಾಮಿಗಳ ಆರಾಧನೆ ಪ್ರತಿವರ್ಷ ಶ್ರಾವಣ ಮಾಸದ ಬಹುಳ ಪ್ರತಿಪದ, ದ್ವಿತಿಯಾ ಹಾಗೂ ತೃತಿಯಾ ತಿಥಿಗಳಂದ ಆಚರಿಸಲಾಗುತ್ತಿದೆ. 306ನೇ ವರ್ಷದ ಆರಾಧನೆಯು ಆ. 29, 30 ಮತ್ತು 31 ರಂದು ನಡೆಯಲಿದೆ. ಆ. 31ರಂದು ಬೆಳಗ್ಗೆ 10 ಗಂಟೆಗೆ ರಾಘವೇಂದ್ರ ಸ್ವಾಮಿಗಳ ರಥೋತ್ಸವ ಜರುಗಲಿದೆ.

"