Rain: ಮಳೆ ಕೊರತೆ ‘ರೈತರಿಗೆ ಭವಿಷ್ಯದ್ದೇ ಚಿಂತೆ’

ಮುಳಗುಂದ ವ್ಯಾಪ್ತಿಯ ಹೊಲದಲ್ಲಿ ಹೆಸರು ಬೆಳೆ ತೇವಾಂಶವಿಲ್ಲದ ಕಾರಣ ಒಣಗಿರುವದು.

Published on:

13 Aug 2026, 11:28 am

ಪ್ರಮುಖ ಮುಖ್ಯಾಂಶಗಳು

ಕೈ ಕೊಟ್ಟ ಮುಂಗಾರು
ಸಂಕಷ್ಟಕ್ಕೆ ಸಿಲುಕಿದ ಜಾನುವಾರು
ಆದಾಯವಿಲ್ಲದೆ ಅತಂತ್ರವಾದ ಕೃಷಿಕರ ಬದುಕು

ಎಂ.ಎಂ. ಜಮಾಲಸಾಬನವರ ಮುಳಗುಂದ

ಮುಂಗಾರು ವೈಫಲ್ಯದಿಂದ ಮುಳಗುಂದ ಹೋಬಳಿ ಸೇರಿದಂತೆ ಸುತ್ತಮುತ್ತಲಿನ ಗ್ರಾಮೀಣ ಪ್ರದೇಶಗಳಲ್ಲಿ ಕೃಷಿಗೆ ತೀವ್ರ ಹೊಡೆತ ಬಿದ್ದಿದೆ. ಅರ್ಧ ಮುಂಗಾರು ಕಳೆದರೂ ಸಮರ್ಪಕ ಮಳೆಯಾಗದ (RAIN) ಕಾರಣ ಶೇಂಗಾ, ಹೆಸರು, ಗೋವಿನ ಜೋಳ, ಉದ್ದು, ಮೆಣಸಿನಕಾಯಿ, ಉಳ್ಳಾಗಡ್ಡಿ ಸೇರಿದಂತೆ ವಿವಿಧ ಬೆಳೆಗಳು ತೇವಾಂಶದ ಕೊರತೆಯಿಂದ ಒಣಗಿ ನಲುಗುತ್ತಿವೆ.

ಮುಂಗಾರು ಪೂರ್ವದ ಮಳೆ ಕೂಡ ಈ ಬಾರಿ ನಿರೀಕ್ಷಿತ ಮಟ್ಟದಲ್ಲಿ ಸುರಿದಿಲ್ಲ, ಹೀಗಾಗಿ ಕೆರೆ-ಕಟ್ಟೆಗಳು, ಕೃಷಿ ಹೊಂಡಗಳು ಹಾಗೂ ಸಣ್ಣ ಜಲಾಶಯಗಳು ಬಹುತೇಕ ಬತ್ತಿಹೋಗಿವೆ. ಅಂತರ್ಜಲ ಮಟ್ಟ ಕುಸಿದಿರುವುದರಿಂದ ಕೊಳವೆ ಬಾವಿಗಳಲ್ಲೂ ನೀರಿನ ಪ್ರಮಾಣ ಕಡಿಮೆಯಾಗುವ ಆತಂಕ ಮೂಡಿದೆ. ತೋಟಗಾರಿಕೆ ಬೆಳೆಗಳಿಗೆ ನೀರುಣಿಸುವುದು ಅಸಾಧ್ಯವಾಗಿದೆ. ಜಾನುವಾರುಗಳಿಗೆ ಕುಡಿಯುವ ನೀರು ಮತ್ತು ಮೇವು ಒದಗಿಸುವುದೂ ಮುಂಬರುವ ದಿನಗಳಲ್ಲಿ ರೈತರಿಗೆ ಸವಾಲಾಗಿ ಪರಿಣಮಿಸಲಿದೆ.

ಮಳೆ ಅಭಾವದಿಂದ ಕೃಷಿ ಕೂಲಿ ಕಾರ್ಮಿಕರಿಗೂ ಉದ್ಯೋಗದ ಕೊರತೆ ಎದುರಾಗಿದ್ದು, ಗ್ರಾಮೀಣ ಆರ್ಥಿಕ ಚಟುವಟಿಕೆಗಳ ಮೇಲೂ ಪರಿಣಾಮ ಬೀರಿದೆ. ಹಲವು ರೈತ ಕುಟುಂಬಗಳು ಸಾಲದ ಹೊರೆಯಿಂದ ಸಂಕಷ್ಟಕ್ಕೀಡಾಗಿವೆ.

ಮುಳಗುಂದ ಭಾಗವನ್ನು ಬರಪೀಡಿತ ಪ್ರದೇಶವೆಂದು ಘೋಷಿಸಿ, ಬೆಳೆ ವಿಮೆ ಪರಿಹಾರವನ್ನು ಶೀಘ್ರ ಬಿಡುಗಡೆ ಮಾಡಬೇಕು. ರೈತರಿಗೆ ವಿಶೇಷ ಪರಿಹಾರ ಪ್ಯಾಕೇಜ್, ಬಡ್ಡಿರಹಿತ ಸಾಲ ಸೌಲಭ್ಯ ಹಾಗೂ ಜಾನುವಾರುಗಳಿಗೆ ಮೇವು ಮತ್ತು ಕುಡಿಯುವ ನೀರಿನ ವ್ಯವಸ್ಥೆ ಕಲ್ಪಿಸಬೇಕು ಎಂದು ರೈತರು ಸರ್ಕಾರವನ್ನು ಆಗ್ರಹಿಸಿದ್ದಾರೆ.

ಪ್ರತಿ ಎಕರೆಗೆ ಬೀಜ, ಗೊಬ್ಬರ, ಕೀಟನಾಶಕ ಹಾಗೂ ಕೃಷಿ ಕಾರ್ಯಗಳಿಗೆ 15-20 ಸಾವಿರು ರೂಪಾಯಿ ಖರ್ಚು ಮಾಡಿರುವ ರೈತರು ಬೆಳೆ ಕೈಗೆ ಬಾರದೇ ಆತಂಕದಲ್ಲಿದ್ದಾರೆ. ಮಳೆ ಕೊರತೆ ಮುಂದುವರಿದರೆ ಮುಂಗಾರು ಹಂಗಾಮಿನ ಬೆಳೆಗಳು ಸಂಪೂರ್ಣ ಹಾನಿಗೊಳಗಾಗುವ ಸಾಧ್ಯತೆ ಇದೆ.

— ದೇವರಾಜ ಸಂಗನಪೇಟಿ, ರೈತ

ಗದಗ ತಾಲೂಕಿನಾದ್ಯಂತ ಕೃಷಿ ಭೂಮಿಯಲ್ಲಿ ಮುಂಗಾರಿನ ಒಟ್ಟು 55 ಸಾವಿರ ಹೆಕ್ಟರ್ ಭೂಪ್ರದೇಶದಲ್ಲಿ ಬಿತ್ತನೆ ಮಾಡಲಾಗಿದೆ. ಇದರಲ್ಲಿ ಈವರೆಗೆ ಹೆಸರು ಸಂಪೂರ್ಣ ಹಾನಿಯಾಗಿದೆ. ಈವರೆಗೆ 52 ಸಾವಿರ ಹೆಕ್ಟರ್ ಬೆಳೆ ಹಾನಿ ಅಂದಾಜಿಸಲಾಗಿದೆ.

— ಮಲ್ಲಯ್ಯ ಕೊರಣ್ಣವರ, ಸಹಾಯಕ ಕೃಷಿ ನಿರ್ದೇಶಕರು, ಗದಗ

Farmers