Peanut: ನರೇಗಲ್ಲ ಹೋಬಳಿಯಾದ್ಯಂತ ಶೇಂಗಾ ಇಳುವರಿ ಕುಂಠಿತ

ಮುಂಗಾರಿನಲ್ಲಿ ಅತಿಯಾದ ಮಳೆಯಿಂದ ಹೆಸರು ಬೆಳೆ ಸಂಪೂರ್ಣ ನಾಶವಾಗಿ ತೊಂದರೆ ಅನುಭವಿಸಿದ್ದ ರೈತರು ಶೇಂಗಾ ಬೆಳೆ ಕೈಹಿಡಿಯಬಹುದು ಎಂಬ ನಿರೀಕ್ಷೆಯಲ್ಲಿದ್ದರು. ಆದರೆ, ಶೇಂಗಾ ಇಳುವರಿ ಕುಂಠಿತವಾಗಿದ್ದು ನುಂಗಲಾರದ ತುತ್ತಾಗಿ ಪರಿಣಮಿಸಿದೆ.

ನರೇಗಲ್ಲ. ಕೋಡಿಕೊಪ್ಪ, ಕೋಚಲಾಪೂರ, ಮಲ್ಲಾಪೂರ, ದ್ಯಾಂಪೂರ, ತೋಟಗಂಟಿ, ಅಬ್ಬಿಗೇರಿ, ಜಕ್ಕಲಿ, ಬೂದಿಹಾಳ ಸೇರಿದಂತೆ ಹೋಬಳಿಯಾದ್ಯಂತ ಮಸಾರಿ ಭೂಮಿಯಲ್ಲಿ ಪ್ರಮುಖ ಮುಂಗಾರಿನ ವಾಣಿಜ್ಯ ಬೆಳೆಯಾದ ಶೇಂಗಾವನ್ನು ಮಳೆಯಾಶ್ರಿತ ಜಮೀನಿನಲ್ಲಿ 8000 ಹೆಕ್ಟೇರ್ ಪ್ರದೇಶದಲ್ಲಿ ಬಿತ್ತನೆ ಮಾಡಲಾಗಿತ್ತು. ಕಾಯಿ ಕಟ್ಟುವ ಸಂದರ್ಭದಲ್ಲಿ ಹೆಚ್ಚು ಮಳೆಯಾದ ಕಾರಣ ಗಿಡ ಹುಲಾಸಾಗಿ ಬೆಳೆದರೂ ಕಾಯಿ ಕಟ್ಟುವು ಪ್ರಮಾಣ ಇಳಿಕೆಯಾಗಿದೆ. ಗಿಡವೊಂದರಲ್ಲಿ 4-5 ಕಾಯಿಗಳು ಬೆಳೆದಿವೆ. 

ಶೇಂಗಾ Peanut ಬೆಳೆಯನ್ನು ದನಕರುಗಳಿಗೆ ಹೊಟ್ಟು ಆಗುತ್ತದೆ ಎಂಬ ಉದ್ಧೇಶದಿಂದ ಬಿತ್ತನೆ ಮಾಡಲಾಗುತ್ತದೆ. ಶೇಂಗಾ ಹೊಟ್ಟನ್ನು ಜಾನುವಾರುಗಳು ಇಷ್ಟಪಟ್ಟು ತಿನ್ನುತ್ತವೆ ಹಾಗೂ ಶೇಂಗಾ ಹೊಟ್ಟಿನಲ್ಲಿ ಹೆಚ್ಚಿನ ಪೊಷಕಾಂಶ ಇರುವುದರಿಂದ ಜಾನುವಾರುಗಳ ಆರೋಗ್ಯಕ್ಕೂ ಉತ್ತಮವಾದ ಆಹಾರವಾಗಿದೆ. ಈ ಕಾರಣಕ್ಕಾಗಿಯೂ ರೈತರು ತಮಗೆ ಶೇಂಗಾ ಬಂದರೆ ಜಾನುವಾರುಗಳಿಗೆ ಹೊಟ್ಟು ಬರುತ್ತದೆ ಎಂದು ಶೇಂಗಾ ಬಿತ್ತನೆ ಮಾಡುತ್ತಾರೆ. ಪ್ರಸಕ್ತ ವರ್ಷ ಉತ್ತಮ ಹೊಟ್ಟು ಮಾತ್ರ ಬಂದಿದ್ದು ಶೇಂಗಾ ಬರದೇ ಇರುವುದು ಬೆಳೆಗಾರರನ್ನು ಚಿಂತೆಗೀಡು ಮಾಡಿದೆ.

ಶೇಂಗಾ ಬೆಳೆಯನ್ನು ಪ್ರತಿವರ್ಷ ಒಂದೇ ಜಮೀನಿನಲ್ಲಿ ಬೆಳೆದರೆ ಭೂಮಿಯ ಫಲವತ್ತತೆ ಕಡಿಮೆಯಾಗಿ ಇಳುವರಿ ಕುಂಠಿತಗೊಳ್ಳುತ್ತದೆ. ಆದರೂ, ಪ್ರಸಕ್ತ ವರ್ಷದಲ್ಲಿ ಮಳೆಯ ಕೊರತೆಯಿಂದಾಗಿ ಇಳುವರಿ ಸಾಕಷ್ಟು ಕುಂಠಿತಗೊಂಡಿದೆ. ಪ್ರತಿ ವರ್ಷ ಬೇರೆ ಬೇರೆ ಬೆಳೆಗಳನ್ನು ಆವರ್ತನ ಮಾಡುವುದರಿಂದ ಮತ್ತು ಅಂತರ ಬೆಳೆ ಬೆಳೆಯುವುದರಿಂದ ಭೂಮಿಯ ಫಲವತ್ತತೆ ಸುಧಾರಿಸುತ್ತದೆ.

— ಬಸವರಾಜ ಗದುಗಿನ, ಕೃಷಿ ಅಧಿಕಾರಿಗಳು, ರೈತ ಸಂಪರ್ಕ ಕೇಂದ್ರ ನರೇಗಲ್ಲ