grant: ಕೈತಪ್ಪಿದ ಕೇಂದ್ರದ ಅನುದಾನ

ಉದಯಕುಮಾರ ಹಣಗಿ ಶಿರಹಟ್ಟಿ

ಸ್ಥಳೀಯ ಸಂಸ್ಥೆಗಳಿಗೆ ಕಳೆದ ಐದು ವರ್ಷಗಳಿಂದ ಚುನಾವಣೆ ನಡೆಯದ ಕಾರಣ ಗ್ರಾಮೀಣ ಭಾಗದ ಅಭಿವೃದ್ಧಿಗೆ ಶಾಪವಾಗಿ ಪರಿಣಮಿಸಿದೆ. ತಾಲೂಕು ಪಂಚಾಯಿತಿಯಲ್ಲಿ ಆಡಳಿತ ಮಂಡಳಿ ಅಸ್ತಿತ್ವ ಕಳೆದುಕೊಂಡಿದೆ. ಇದರ ಪರಿಣಾಮ ಕೇಂದ್ರ ಸರ್ಕಾರದ 15ನೇ ಹಣಕಾಸು ಆಯೋಗದ ಕೋಟ್ಯಂತರ ರೂಪಾಯಿ (GRANT) ಅನುದಾನ ಸ್ಥಗಿತಗೊಂಡಿದ್ದು, ಹಳ್ಳಿಗಳ ಪ್ರಗತಿ ಕುಂಟುತ್ತಾ ಸಾಗಿದೆ.

ಕೇಂದ್ರ ಸರ್ಕಾರದ ಮಾರ್ಗಸೂಚಿ ಪ್ರಕಾರ 15ನೇ ಹಣಕಾಸು ಆಯೋಗದಡಿ ಅನುದಾನ ಪಡೆಯಲು ಸ್ಥಳೀಯ ಸಂಸ್ಥೆಗಳಲ್ಲಿ (ಗ್ರಾ.ಪಂ, ತಾ.ಪಂ, ಜಿ.ಪಂ) ಕಡ್ಡಾಯವಾಗಿ ಚುನಾಯಿತ ಆಡಳಿತ ಮಂಡಳಿ ಇರಬೇಕು. ಆದರೆ, ಶಿರಹಟ್ಟಿ ತಾಪಂನಲ್ಲಿ 2021ರ ಫೆಬ್ರವರಿಯಿಂದ ಈವರೆಗೆ ಚುನಾವಣೆ ನಡೆದಿಲ್ಲ.

ಸ್ಥಗಿತಗೊಂಡಿರುವ ಮೊತ್ತ:  ಹಿಂದೆ ಶಿರಹಟ್ಟಿ ತಾ.ಪಂಗೆ ಅಂದಾಜು 64.54 ಲಕ್ಷ ರೂ. ಅನುದಾನ ಬಿಡುಗಡೆಯಾಗಿತ್ತು. ನಂತರ ಚುನಾಯಿತ ಮಂಡಳಿ ಇಲ್ಲದ ಕಾರಣಕ್ಕೆ ಈ ಪ್ರಕ್ರಿಯೆ ಸಂಪೂರ್ಣ ಸ್ಥಗಿತಗೊಂಡಿದೆ. ಅಧಿಕಾರಿಗಳು ಅಭಿವೃದ್ಧಿ ಕಾಮಗಾರಿಗಳ ಕ್ರಿಯಾಯೋಜನೆ ಸಿದ್ಧಪಡಿಸಿದರೂ, ಅದಕ್ಕೆ ಅನುಮೋದನೆ ನೀಡಲು ಚುನಾಯಿತ ಪ್ರತಿನಿಧಿಗಳ ಸಭೆ ನಡೆಯುತ್ತಿಲ್ಲ. ಇದು ಸರ್ಕಾರದ ಹಣ ಬೊಕ್ಕಸದಲ್ಲೇ ಉಳಿಯುವಂತೆ ಮಾಡಿದೆ.

ಹಣಕಾಸು ಹಂಚಿಕೆ ಹೇಗಿರುತ್ತಿತ್ತು?: 15ನೇ ಹಣಕಾಸು ಆಯೋಗದ ಅನುದಾನವು ಪ್ರಮುಖವಾಗಿ ಎರಡು ಹಂತಗಳಲ್ಲಿ ಬಳಕೆಯಾಗಬೇಕಿತ್ತು. ಮೊದಲನೇಯದು ಅನಿರ್ಬಂಧಿತ ಅನುದಾನ (ಶೇ. 40), ವೇತನ ಮತ್ತು ಆಡಳಿತಾತ್ಮಕ ವೆಚ್ಚಗಳನ್ನು ಹೊರತುಪಡಿಸಿ, ಸ್ಥಳೀಯ ಅಗತ್ಯತೆಗಳಿಗೆ ಬಳಸಲು ಮುಕ್ತ ಅವಕಾಶವಿತ್ತು.

ಎರಡನೇಯದು ನಿರ್ಬಂಧಿತ ಅನುದಾನ (ಶೇ. 60), ಈ ಹಣವನ್ನು ಕಡ್ಡಾಯವಾಗಿ ಕುಡಿಯುವ ನೀರು ಸರಬರಾಜು, ನೈರ್ಮಲ್ಯ ಕಾಮಗಾರಿ, ಮಳೆ ನೀರು ಕೊಯ್ಲು ಮತ್ತು ಬಯಲು ಬಹಿರ್ದೆಸೆ ಮುಕ್ತ ಗ್ರಾಮಗಳ ನಿರ್ಮಾಣಕ್ಕೆ ಬಳಸಬೇಕಿತ್ತು. ಅಲ್ಲದೆ, ಒಟ್ಟು ಮೊತ್ತದಲ್ಲಿ ಶೇ. 5ರಷ್ಟು ಹಣವನ್ನು ವಿಶೇಷ ಚೇತನರ ಅಭಿವೃದ್ಧಿಗೆ ಮೀಸಲಿಡಲು ಅವಕಾಶವಿತ್ತು. ಆದರೆ ಈಗ ಈ ಎಲ್ಲ ಸೌಲಭ್ಯಗಳು ಜನಸಾಮಾನ್ಯರಿಗೆ ಎಟುಕದಂತಾಗಿವೆ.

ಕೇವಲ ಅಧಿಕಾರಿಗಳ ಆಡಳಿತದಿಂದ ಸ್ಥಳೀಯ ಸಮಸ್ಯೆಗಳಿಗೆ ಸ್ಪಂದನೆ ಸಿಗುತ್ತಿಲ್ಲ ಎಂಬುದು ಸಾರ್ವಜನಿಕರ ದೂರು. ರಸ್ತೆ, ಚರಂಡಿ, ಕುಡಿಯುವ ನೀರು ಮತ್ತು ನೈರ್ಮಲ್ಯದಂತಹ ಮೂಲ ಸೌಕರ್ಯಗಳಿಗೆ ಮೀಸಲಾದ ಹಣ ತಲುಪಬೇಕಾದರೆ ಚುನಾವಣೆ ನಡೆಯಲೇಬೇಕಿದೆ. ಸರ್ಕಾರದ ವಿಳಂಬ ನೀತಿಯಿಂದಾಗಿ ಶಿರಹಟ್ಟಿ ತಾಲೂಕು ಅಭಿವೃದ್ಧಿಯಲ್ಲಿ ಹತ್ತು ವರ್ಷಗಳಷ್ಟು ಹಿಂದೆ ಹೋಗುವ ಭೀತಿ ಎದುರಾಗಿದೆ.

ಜಿಲ್ಲೆಯಲ್ಲಿ ಬೇಸಿಗೆಯ ಬಿಸಿ ಏರುತ್ತಿದ್ದಂತೆ ಕುಡಿಯುವ ನೀರಿನ ಸಮಸ್ಯೆ ತಲೆದೋರುತ್ತಿದೆ. ಈ ಹಿಂದೆ ಗ್ರಾ.ಪಂ ಮಟ್ಟದಲ್ಲಿ ಈ ಅನುದಾನ ಬರುತ್ತಿತ್ತಾದರೂ, ಪ್ರಸಕ್ತ ವರ್ಷದಲ್ಲಿ ಚುನಾಯಿತ ಮಂಡಳಿಗಳ ಕೊರತೆಯಿಂದಾಗಿ ಅಲ್ಲಿಯೂ ಹಣ ಬಿಡುಗಡೆ ಕಠಿಣವಾಗಿದೆ. ಕುಡಿಯುವ ನೀರಿನ ಯೋಜನೆಗಳಿಗೆ ಕೇಂದ್ರದ ಈ ನಿಧಿಯೇ ಆಧಾರವಾಗಿದ್ದು, ಈಗ ಅದು ಸ್ಥಗಿತಗೊಂಡಿರುವುದು ಹಳ್ಳಿಗಳಲ್ಲಿ ಕುಡಿಯುವ ನೀರಿನ ವ್ಯವಸ್ಥೆ ಹದಗೆಡಲು ಕಾರಣವಾಗಿದೆ.

15ನೇ ಹಣಕಾಸು ಆಯೋಗದ ಅನುದಾನವು ಗ್ರಾಮೀಣ ಭಾಗದ ಜೀವನಾಡಿಯಾಗಿತ್ತು. ಕಳೆದ ಐದು ವರ್ಷಗಳಿಂದ ಚುನಾವಣೆ ನಡೆಯದ ಕಾರಣ ಅಭಿವೃದ್ಧಿ ಶೂನ್ಯವಾಗಿದೆ. ಸರ್ಕಾರ ಕೂಡಲೇ ಚುನಾವಣೆ ನಡೆಸಿ ಜನಪ್ರತಿನಿಧಿಗಳಿಗೆ ಆಡಳಿತ ಹಸ್ತಾಂತರಿಸಬೇಕು.

— ತಿಪ್ಪಣ್ಣ ಕೊಂಚಿಗೇರಿ, ತಾಪಂ ಸ್ಥಾಯಿ ಸಮಿತಿ ಮಾಜಿ ಅಧ್ಯಕ್ಷ ಶಿರಹಟ್ಟಿ