ರಾಜ್ಯ ಮಟ್ಟದ ಶಾಲೆಯಾಗಿ ಮಾದನಗೇರಿ ಮಾದರಿ ಶಾಲೆ( Madanageri Model School )

ಗೋಕರ್ಣ: ಸರ್ಕಾರ ಮಾದನಗೇರಿಯ ಮಾದರಿ ಹಿರಿಯ ಪ್ರಾಥಮಿಕ ಶಾಲೆ ( Madanageri Model School) ಯನ್ನು ಕರ್ನಾಟಕ ಸಾರ್ವಜನಿಕ ಶಾಲೆ (ಕೆಪಿಎಸ್) ಎಂದು ಗುರುತಿಸಿ ರಾಜ್ಯ ಮಟ್ಟದ ಶಾಲೆಯಾಗಿ ಗುರುತಿಸಿದೆ. ಇಲ್ಲಿನ ಶೈಕ್ಷಣಿಕ ಪ್ರಗತಿ, ವಿದ್ಯಾರ್ಥಿಗಳ ಸಂಖ್ಯೆ ಮತ್ತು ಮೂಲ ಸೌಕರ್ಯಗಳನ್ನು ಆಧರಿಸಿ ನೀಡಲಾದ ಈ ಗೌರವದಿಂದ ಶಾಲೆ ವಿಶೇಷ ಕೀರ್ತಿಗೆ ಪಾತ್ರವಾಗಿದೆ ಎಂದು ಶಾಸಕ ದಿನಕರ ಶೆಟ್ಟಿ ಹೇಳಿದರು.

ಮಾದನಗೇರಿ ಮಾದರಿ ಶಾಲೆಯಲ್ಲಿ ಇತ್ತೀಚೆಗೆ ಆಯೋಜಿಸಿದ್ದ ಪಾಲಕ-ಶಿಕ್ಷಕರ ಮಹಾಸಭೆಯಲ್ಲಿ ಅವರು ಮಾತನಾಡಿದರು.

ಈಗಾಗಲೇ ವಿವೇಕ ಯೋಜನೆಯಡಿ ಈ ಶಾಲೆ ಗುರುತಿಸಲ್ಪಟ್ಟಿದೆ. ಇದನ್ನು ಅನುಸರಿಸಿ ಶಾಲೆಗೆ ಅಗತ್ಯವಿರುವ ಹೆಚ್ಚುವರಿ ಕೊಠಡಿಗಳನ್ನು ಈಗಾಗಲೇ ಉತ್ತಮವಾಗಿ ನಿರ್ಮಿಸಲಾಗಿದೆ. ಅಗತ್ಯವಿರುವ ಭೋಜನಾಲಯವನ್ನು ಮಂಜೂರು ಮಾಡಿಸಲಾಗಿದೆ.

ಈ ಪೈಕಿ ನಿರ್ಮಾಣ ಹಂತದಲ್ಲಿರುವ ಭೋಜನಾಲಯ ಅನುದಾನದ ಕೊರತೆಯಿಂದಾಗಿ ಅಪೂರ್ಣವಾಗಿದೆ. ಇದಕ್ಕೆ ಅಗತ್ಯವಿರುವ ಹೆಚ್ಚುವರಿ ಅನುದಾನವನ್ನು ಆದಷ್ಟು ಬೇಗ ಮಂಜೂರು ಮಾಡಿಸಿ ಕಾಮಗಾರಿ ಪೂರ್ಣವಾಗಿಸಲಾಗುವುದು ಎಂದರು.

ನನ್ನ ಈ ಎರಡು ಅವಧಿಯಲ್ಲಿ ಮಾದನಗೇರಿ ಶಾಲೆಗೆ ಅಗತ್ಯವಿರುವ ಎಲ್ಲ ಮೂಲಭೂತ ವ್ಯವಸ್ಥೆಗಳನ್ನು ಒದಗಿಸುವ ಮೂಲಕ ಈ ಸರ್ಕಾರಿ ಶಾಲೆಯನ್ನು ಉತ್ತಮವಾಗಿ ಅಭಿವೃದ್ಧಿ ಪಡಿಸಲಾಗಿದೆ. ಕಾರಣ ಪಾಲಕರು ಇಲ್ಲಿನ ಸುಸಜ್ಜಿತ ಅನುಕೂಲಗಳನ್ನು ಗಮನಿಸಿ ಹೆಚ್ಚಿನ ಸಂಖ್ಯೆಯಲ್ಲಿ ತಮ್ಮ ಮಕ್ಕಳನ್ನು ಈ ಶಾಲೆಗೆ ದಾಖಲಿಸಿ ಇನ್ನೂ ಹೆಚ್ಚಿನ ಅಭಿವೃದ್ಧಿಗೆ ಪ್ರೇರಕರಾಗಬೇಕು ಎಂದು ಹಾರೈಸಿದರು.

ಶಾಲೆಯ ಸರ್ವಾಂಗೀಣ ಔನ್ನತ್ಯಕ್ಕೆ ತಮ್ಮ ಶಾಸಕತ್ವದ ಅವಧಿಯಲ್ಲಿ ಅವಿರತ ಶ್ರಮಿಸಿದ ಶಾಸಕ ದಿನಕರ ಶೆಟ್ಟಿ ಅವರನ್ನು ಪಾಲಕರು, ಶಾಲಾ ಅಭಿವೃದ್ಧಿ ಸಮಿತಿ ಮತ್ತು ಊರ ನಾಗರಿಕರು ಅಭಿನಂದಿಸಿದರು.

ಎಸ್‌ಡಿಎಂಸಿ ಅಧ್ಯಕ್ಷ ಮಂಜುನಾಥ ಎಲ್. ನಾಯ್ಕ, ಗ್ರಾಪಂ ಸದಸ್ಯ ಮಹೇಶ ನಾಯಕ, ಸಾಮಾಜಿಕ ಕಾರ್ಯಕರ್ತ ಸಂದೀಪ ಅಗಸಾಲಿ, ಗುತ್ತಿಗೆದಾರ ರಾಮು ಕೆಂಚನ್, ರಮೇಶ ಗೌಡ, ಸಿಆರ್‌ಪಿ ರೋಹಿದಾಸ ನಾಯಕ ಇತರರಿದ್ದರು. ಶಿಕ್ಷಕರಾದ ರಾಜೇಶ್ವರಿ ಜಿ., ಸಂಧ್ಯಾ ನಾಯ್ಕ, ಗೀತಾ ನಾಯ್ಕ, ನಿತ್ಯಾನಂದ ನಾಯ್ಕ, ಚಂದ್ರಕಲಾ ಗೌಡ ಸಹಕರಿಸಿದರು.

ಮುಖ್ಯ ಶಿಕ್ಷಕ ಮಂಜುನಾಥ ಆಚಾರಿ ಹಾಗೂ ಕಾವ್ಯಾ ಎಸ್.ಬಿ. ಕಾರ್ಯಕ್ರಮ ನಿರ್ವಹಿಸಿದರು.