ಪಟ್ಟಣದಲ್ಲಿನ ಈಶ್ವರ, ಸೋಮೇಶ್ವರ, ಬಸವೇಶ್ವರ, ಕೌಡೇಶ್ವರಿ, ರಂಭಾಪುರಿ, ಗಡ್ಡದೇವರಮಠ, ಮುಕ್ತಿ ನಗರ, ಜನ್ನತ್ ನಗರ, ಕರೆಗೋರಿ ಪ್ಲಾಟ್, ಆಶ್ರಯ ಬಡಾವಣೆ ಸೇರಿದಂತೆ ಅನೇಕ ಪ್ರದೇಶಗಳ ಸ್ಥಿತಿ ಒಂದೇ ಕಥೆ ಹೇಳುತ್ತಿದೆ. ಮಳೆ ಬಂದರೆ ರಸ್ತೆಗಳು ಕೆಸರಿನ ಕೊಳವಾಗುತ್ತವೆ. ಚರಂಡಿಗಳಿಲ್ಲದೆ ಕೊಳಚೆ ನೀರು ಮನೆಗಳ ಮುಂದೆ ನಿಂತು ದುರ್ವಾಸನೆ ಹರಡುತ್ತದೆ. ಬೀದಿ ದೀಪಗಳಿಲ್ಲದೆ ರಾತ್ರಿ ಕತ್ತಲೆ ಆವರಿಸುತ್ತದೆ. ಚರಂಡಿ, ಖಾಲಿ ನಿವೇಶನಗಳ ಗಿಡಗಂಟೆಗಳಲ್ಲಿ ಹಾವು-ಚೇಳುಗಳು ಆಶ್ರಯ ಪಡೆಯುತ್ತವೆ. ಬೀದಿ ನಾಯಿಗಳು ಮತ್ತು ಹಂದಿಗಳ ಹಾವಳಿ ಸಾರ್ವಜನಿಕರ ನೆಮ್ಮದಿ ಕಸಿದುಕೊಂಡಿದೆ. ರಸ್ತೆಗಳು ಕೊರಲು, ಕಂದಕ, ಗಿಡ ಗಡೆಗಳಿಂದ ಕೂಡಿದ್ದು ಸಂಚಾರಕ್ಕಾಗಿ ಹರಸಾಹಸವನ್ನೇ ಪಡಬೇಕಾಗಿದೆ. ದೇವರ ಹೆಸರಿನ ಬಡಾವಣೆಗಳಲ್ಲಿ ದೇವರ ಅನುಗ್ರಹಕ್ಕಾಗಿ ಅಲ್ಲ, ಅಭಿವೃದ್ಧಿಯ ಅನುಗ್ರಹಕ್ಕಾಗಿ ಜನರು ಕಾಯುವ ಪರಿಸ್ಥಿತಿ ನಿರ್ಮಾಣವಾಗಿರುವುದು ವಿಪರ್ಯಾಸ.
