JJM ಗುತ್ತಿಗೆದಾರರ ಹಣ ದಾಹಕ್ಕೆ ಶಿರಹಟ್ಟಿಯಲ್ಲಿ ಜೆಜೆಎಂ ಆಪೋಶನ

ಅಧಿಕಾರಿಗಳಿಗೂ ತಲೆನೋವು: ಯೋಜನೆಯ ಅನುಷ್ಠಾನದಲ್ಲಿ ತಾಲೂಕು ಮಟ್ಟದ ಅಧಿಕಾರಿಗಳ ಸ್ಥಿತಿ ’ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ’ ಎಂಬಂತಾಗಿದೆ. ಮೇಲ್ಮಟ್ಟದಿಂದ ಕೆಲಸ ಮುಗಿಸಲು ಒತ್ತಡವಿದ್ದರೂ, ಕೆಳಮಟ್ಟದಲ್ಲಿ ಗುತ್ತಿಗೆದಾರರು ತೋರುತ್ತಿರುವ ಬೇಜವಾಬ್ದಾರಿಯಿಂದ ಅಧಿಕಾರಿಗಳು ಸಾರ್ವಜನಿಕರ ಕೆಂಗಣ್ಣಿಗೆ ಗುರಿಯಾಗಿದ್ದಾರೆ. ನಾವು ಎಷ್ಟೇ ಸೂಚನೆ ನೀಡಿದರೂ ಗುತ್ತಿಗೆದಾರರು ಗುಣಮಟ್ಟ ಕಾಪಾಡುತ್ತಿಲ್ಲ. ಸರಿಯಾಗಿ ಕೆಲಸ ಮಾಡದ ಗುತ್ತಿಗೆದಾರರನ್ನು ಕಪ್ಪುಪಟ್ಟಿಗೆ ಸೇರಿಸುವ ಪ್ರಕ್ರಿಯೆ ನಡೆದಿದೆ. ಕೆಲವು ಪಂಚಾಯತಿಗಳಲ್ಲಿ ಮುರು ಟೆಂಡರ್ ಕರೆದರೂ ಪ್ರಯೋಜನವಾಗಿಲ್ಲ. ಸಾರ್ವಜನಿಕರಿಗೆ ಉತ್ತರ ನೀಡಲಾಗದೆ ಕೆಲಸ ಮಾಡುವುದೇ ತಲೆನೋವಾಗಿದೆ ಎನ್ನುತ್ತಾರೆ ಅಧಿಕಾರಿಗಳು.

ಗುತ್ತಿಗೆದಾರರ ’ಕೈಚಳಕ’ಕ್ಕೆ ಯೋಜನೆ ಬಲಿ: ತಾಲೂಕಿನಲ್ಲಿ ಕಾಮಗಾರಿ ಪೂರ್ಣಗೊಳಿಸಲು 36.36 ಕೋಟಿ ರೂ.ಅನುದಾನ ನೀಡಲಾಗಿದೆ. 18,372ಕ್ಕೂ ಹೆಚ್ಚು ಮನೆ ಹಾಗೂ ಸಾರ್ವಜನಿಕ ಕಟ್ಟಡಗಳಿಗೆ ನಳದ ಸಂಪರ್ಕ ನೀಡಲಾಗಿದೆ ಎಂದು ಹೇಳಲಾಗುತ್ತಿದೆ. ಆದರೆ ವಾಸ್ತವವೇ ಬೇರೆ ಇದೆ. ನೀರು ಬರುವ ಮೊದಲೇ ಮೀಟರ್ ಬಾಕ್ಸ್‌ಗಳು ಒಡೆದಿವೆ. ನಿಯಮಬಾಹಿರವಾಗಿ ಅವುಗಳನ್ನು ಅಳವಡಿಸಲಾಗಿದೆ. ಸಿಮೆಂಟ್ ರಸ್ತೆಗಳನ್ನು ಅಗೆಯಲು ಸಣ್ಣ ಯಂತ್ರಗಳನ್ನು ಬಳಸುವ ಬದಲು ಜೆಸಿಬಿ ಬಳಸಿ ರಸ್ತೆಗಳನ್ನೇ ಹಾಳುಗೆಡವಲಾಗಿದೆ. ಪೈಪ್ ಅಳವಡಿಸಿದರೂ ಮೇಲ್ಮಟ್ಟದ ಜಲಸಂಗ್ರಹಗಾರಕ್ಕೆ ಸಂಪರ್ಕ ಕಲ್ಪಿಸದ ಕಾರಣ ನಳಗಳು ಒಣಗಿವೆ.

ತಾಲೂಕಿನ 50 ಹಳ್ಳಿಗಳಲ್ಲಿ 39 ಕಡೆ ಕೆಲಸ ಪೂರ್ಣವಾಗಿದೆ ಎಂದರೂ ಛಬ್ಬಿ, ಮಾಗಡಿ, ಇಟಗಿ, ಸಾಸಲವಾಡ ಹಾಗೂ ಇತರ ಗ್ರಾಮಗಳಲ್ಲಿ ಕೆಲಸ ಪ್ರಗತಿಯ ಹಂತದಲ್ಲೇ ಇದೆ. ವರವಿ, ತಂಗೋಡ, ವಿವಿಧ ಗ್ರಾಮಗಳಲ್ಲಿ ಕೆಲಸ ಮುಗಿದಿದ್ದರೂ ಗ್ರಾಮ ಪಂಚಾಯಿತಿಗಳು ಅವುಗಳನ್ನು ವಶಕ್ಕೆ ಪಡೆಯಲು ಹಿಂದೇಟು ಹಾಕುತ್ತಿವೆ. ಗುಣಮಟ್ಟ ಇಲ್ಲದ ಕಾಮಗಾರಿಯನ್ನು ನಿರ್ವಹಿಸುವುದು ಹೇಗೆ? ಎಂಬುದು ಪಂಚಾಯಿತಿಗಳ ಪ್ರಶ್ನೆ.

ತಾಲೂಕಿಗೆ ಪ್ರತಿದಿನ 7.45 ಎಂಎಲ್‌ಡಿ ನೀರಿನ ಬೇಡಿಕೆ ಇದೆ. ಬಹುಗ್ರಾಮ ಯೋಜನೆಯಡಿ ಸರಬರಾಜಾಗುವ ನೀರಿನಲ್ಲಿ ಶೇ. 10ರಷ್ಟು ಕೊರತೆಯಿದೆ. ಎತ್ತರದ ಪ್ರದೇಶದಲ್ಲಿರುವ ಮನೆಗಳಿಗೆ ನೀರು ತಲುಪುತ್ತಿಲ್ಲ. ಇದರಿಂದ ಜನ ಅನಿವಾರ್ಯವಾಗಿ ಬೋರ್‌ವೆಲ್ ನೀರು ಹಾಗೂ ಶುದ್ಧ ಕುಡಿಯುವ ನೀರಿನ ಘಟಕಗಳ ಮೇಲೆ ಅವಲಂಬಿತರಾಗಿದ್ದಾರೆ. ಫ್ಲೋರೈಡ್‌ಯುಕ್ತ ನೀರು ಕುಡಿದು ಜನರ ಆರೋಗ್ಯದ ಮೇಲೂ ದುಷ್ಪ್ಪರಿಣಾಮ ಬೀರುತ್ತಿದೆ.

ಸಾರ್ವಜನಿಕರ ವ್ಯಾಪಕ ದೂರಿನ ಹಿನ್ನೆಲೆಯಲ್ಲಿ ಗ್ರಾಮೀಣ ಕುಡಿಯುವ ನೀರು ಸರಬರಾಜು ಇಲಾಖೆ ಎಚ್ಚೆತ್ತುಕೊಂಡಿದೆ. 0.9 ಮೀಟರ್ ಆಳದಲ್ಲಿ ಪೈಪ್ ಅಳವಡಿಸುವುದು, ಚರಂಡಿ ನೀರು ಬೆರೆಯದಂತೆ ಎಚ್ಚರ ವಹಿಸುವುದು ಮತ್ತು ಅಗೆದ ರಸ್ತೆಯನ್ನು ಮೊದಲಿನ ಸ್ಥಿತಿಗೆ ತರುವುದು ಕಡ್ಡಾಯವೆಂದು ಆದೇಶಿಸಿದೆ. ಸರ್ಕಾರದ ಆಶಯ ಚೆನ್ನಾಗಿದ್ದರೂ ಗುತ್ತಿಗೆದಾರರ ಬೇಜವಾಬ್ದಾರಿಯಿಂದಾಗಿ ಶಿರಹಟ್ಟಿ ತಾಲೂಕಿನ ’ಜಲ ಜೀವನ್ ಮಿಷನ್’ ಹಳ್ಳ ಹಿಡಿದಿದೆ.