Rain: ಭಾರಿ ಗಾಳಿ ಮಳೆಗೆ ನಲುಗಿದ ಬದುಕು

ಭಾನುವಾರ ಪಟ್ಟಣದ ಸಂತೆ ದಿನವಾಗಿದ್ದರಿಂದ ಗಾಂಧಿ ವೃತ್ತ, ಬಸವೇಶ್ವರ ವೃತ್ತ, ಸಂಗೊಳ್ಳಿ ರಾಯಣ್ಣ ವೃತ್ತ ಹಾಗೂ ವಾಲ್ಮೀಕಿ ವೃತ್ತದ ಬಳಿ ನೂರಾರು ವ್ಯಾಪಾರಸ್ಥರು ಕಾಯಿಪಲ್ಲೆ ಮಾಡುತ್ತಿದ್ದರು. ಆದರೆ, ಸಂಜೆ 5 ಗಂಟೆಯ ಸುಮಾರಿಗೆ ಏಕಾಏಕಿ ಸುರಿದ ಬಿರುಗಾಳಿ ಸಹಿತ ಭಾರಿ ಮಳೆಗೆ ವ್ಯಾಪಾರಸ್ಥರು ಅಂಗಡಿಗಳಿಗೆ ಕಟ್ಟಿದ್ದ ತಾಡಪತ್ರೆಗಳು ಹಾರಿಹೋದವು. ರಸ್ತೆಯುದ್ದಕ್ಕೂ ಮಳೆ ನೀರು ನದಿಯಂತೆ ಹರಿದಿದ್ದರಿಂದ ವ್ಯಾಪಾರಿಗಳು ಮಾರಾಟಕ್ಕಿಟ್ಟಿದ್ದ ಕಾಯಿಪಲ್ಲೆಗಳು ಚರಂಡಿ ಪಾಲಾಗಿವೆ.

ಬಿರುಗಾಳಿಯ ತೀವ್ರತೆಗೆ ಪಟ್ಟಣದ ಕುಂಬಾರ ಓಣಿಯ ಶಿಕ್ಷಣ ಸಮಿತಿ ಪ್ರಾಥಮಿಕ ಶಾಲೆಯ ಹತ್ತಿರದ ಬೃಹತ್ ಮರವೊಂದು ಉರುಳಿ ಬಿದ್ದಿದೆ. ಮರ ಬಿದ್ದ ರಭಸಕ್ಕೆ ವಿದ್ಯುತ್ ತಂತಿಗಳು ತುಂಡಾಗಿ ರಸ್ತೆಯ ಮೇಲೆ ಬಿದ್ದವು. ಇನ್ನು ನವನಗರದ ಓಂ ಶಾಂತಿ ಕೇಂದ್ರದ ಬಳಿ ಗಾಳಿಯ ವೇಗಕ್ಕೆ ವಿದ್ಯುತ್ ಕಂಬಗಳು ನೆಲಸಮವಾಗಿವೆ. ಪಟ್ಟಣದ ಹಲವು ವಾರ್ಡ್‌ಗಳಲ್ಲೂ ಗಿಡ-ಗಂಟೆಗಳು ಮುರಿದು ಬಿದ್ದಿವೆ.